Proverbios 18 - CHUYA QELLQA La Biblia en Quechua de Ayacucho 2012

¹ Kikillanpaq munaq runaqa imatapas kikillanpaqmi maskan, imataña nisqapas manam kasukunchu.

² Mana yachayniyuq runataqa manam imapas qokunchu yachaymantaqa, payqa yachaysapapaqmi hapikun.

³ Penqakuyqa mana allin ruwaykunawan kuskam hamun, penqaypi kayñataqmi hatun tukuywan kuska hamun.

⁴ Runapa rimayninqa uku-uku yaku hinam, yachayqa pukyumanta kallpaq yaku hinam.

⁵ Manam allinchu mana allin ruwaqman sayapakuspa mana huchayuqta sentenciaruyqa.

⁶ Mana yachayniyuq runaqa siminwanmi piñanakuyta hatarichin, siminraykum maqachikunpas.

⁷ Mana yachayniyuq runaqa tuñichikunallanpaqmi riman, rimasqallanwanmi waskata kunkanman churakun.

⁸ Cuento qepi runapa rimasqankunaqa miskillañam, tukuy ukukamaraqmi yaykukunpas.

⁹ Mana llamkakuq runaqa tuñichikuq runawanmi wawqella kanku.

¹⁰ Tayta Diospa sutinqa mana tuñichiy atina torre hinam, allin runaqa chayman kallpaspam amparakun.

¹¹ Apuqa tukuy ima kapuqnintam alto perqakunawan cercosqa llaqtata hina qawan.

¹² Tuñichisqa kayqa hatun tukuypa qepantam hamun, hatunchasqa kayñataqmi uchuychakuypa qepanta hamun.

¹³ Mana allinta uyarichkaspa contestayqa penqakuypaq hinaspa mana yachayniyuq kaymi.

¹⁴ Onqoqtaqa kallpanchakuyninmi hatarichinqa ichaqa, ¿pitaq hukmanyasqa runataqa hatarichinman?

¹⁵ Yachayniyuqkunawan yuyaymanayniyuqkunaqa yachay maskasqankutam tarinku.

¹⁶ Regalowanqa ima punkupas kichakuykunmi, munayniyuq runakunapa qayllanmanpas chayachikunmi.

¹⁷ Puntata quejakuq runaqa mana huchayuqpaqmi rikchakun, contraparten hamuruspan llullakusqanta niykunankama.

¹⁸ Piñanakuytaqa Diosllam tanichin, piñanakuqkunatapas payllam rakinan.

¹⁹ Piñachisqa runaqa cercosqa llaqta hina mana yaykuy atinam, piñanakuyqa wawqentintapas rejillayuq punku hinam rakinan.

²⁰ Runaqa siminpa ruruntam mikunqa, siminmanta lloqsiqwanmi saksanqa.

²¹ Wañuypas kawsaypas runapa rimayninpim tarikun, chayta kuyaqqa ruruntam mikunqa.

²² Warma yananta tariruq runaqa allin kaqtam tarirun, Tayta Diospa kuyakuynintam hayparun.

²³ Wakcha runaqa ruegakuspam riman, apu runam ichaqa manchakuypaqta contestakun.

²⁴ Kanmi sasachakuyman pusakuq amigokuna, kantaqmi wawqemantapas aswan hapipakunapaq hina amigokunapas.