Proverbios 17 - CHUYA QELLQA La Biblia en Quechua de Ayacucho 2012

¹ Fiestakunata ruwaspa peleollapi kawsaymantaqa, chaki tantallatapas mikuspa hawka kawsakuymi aswan allinqa.

² Taytanta penqayman churaq warmapiqa yachayniyuq criadonmi munaychakunqa, chay warmapa wawqenkunawan kuskam herenciatapas chaskinqa.

³ Crisolpim qollqetaqa chulluchinku, hornopim qoritaqa chulluchinku, Diosñataqmi runapa sonqonta chuyanchan.

⁴ Mana allin ruwaq runaqa mana allin runapa rimasqantam uyarin, llulla runañataqmi llullamasinpa rimasqanta uyarin.

⁵ Wakcha runamanta burlakuq runaqa unanchaqninpa contranpim hatarin, sasachakuypi tarikuqmanta asikuqqa castigachikunqapunim.

⁶ Yuyaqkunapa coronanqa willkankunam, wawa-churikunapa hatunchakuyninñataqmi tayta-maman.

⁷ Allin rimaykunapas mana yachayniyuqpa siminpiqa manam tupanchu, llullakuypas kamachikuqpa siminpiqa manam tupanchu.

⁸ Sobornoman amañasqa runapaqqa soborno chaskiypas hampi hinaraqmi, chayna runaqa mayman risqanpipas allinraqmi lloqsin.

⁹ Pampachay yachaq runaqa kuyakuytam maskan, mana pampachay munaqmi ichaqa kuyaqninwanpas cheqnirachikun.

¹⁰ Yachayniyuq runaqa qaqchaykusqam yuyayta hapin, mana yachayniyuq runam ichaqa pachak kutikama azotesqapas mana uyarikuq.

¹¹ Mana kasukuq runaqa peleollatam maskan, ichaqa huk punchawmi mana llakipayakuq runawan tuparunqa.

¹² Wawankunata suwarachikuq ukumariwan tuparuymi aswan allinqa, tanteasqallanpi hapipakuq mana yachayniyuq runawan tuparuymantaqa.

¹³ Allin ruwaqninta mana allinwan kutichipuqpa wasinmantaqa, sasachakuypas manam asurinqachu.

¹⁴ Qocharayaq yakuta kachaykuq runa hinam piñanakuyta qallarichiq runaqa, manaraq imapas kachkaptin chaymantaqa ayqekuy.

¹⁵ Mana allin runata mana huchayuqpaq hapispa inocente runatañataq huchayuqpaq hapiqtaqa Diosmi anchata cheqnin.

¹⁶ ¿Imapaqtaq mana yachayniyuq runata qollqe servinman yachayta rantinanpaq mana entiendeq kachkaptinqa?

¹⁷ Cheqap amigoqa tukuy tiempom kuyakun, sasachakuy tiempopipas cheqap wawqen hinam.

¹⁸ Mana yachayniyuq runaqa runamasinpa rantinpim sayaykun, hinaspam hukpa debekusqanta qepikurun.

¹⁹ Maqanakuylla kuyaq runaqa huchatam kuyan, badulaki runaqa kikillanmi tuñichikuchkan.

²⁰ Mana allin ruwaq runaqa manam haykapipas allin kaqtaqa tarinqachu; llulla runaqa tuñinqapunim.

²¹ Mana yachayniyuq warmapa taytan kayqa llakikuytam apamun, mana yachayniyuqpa taytanqa manam kusikuyta tarinchu.

²² Kusisqa sonqoqa allin hampim, llakikuymi ichaqa runata onqochin.

²³ Mana allin ruwaq runaqa allin arreglota qewinanpaqmi pakasqallapi sobornachikun.

²⁴ Yachayniyuq runaqa yachayniyuq kaytam maskan, mana yachayniyuqmi ichaqa maypi tukuruytapas mana yachanchu.

²⁵ Mana yachayniyuq warmaqa taytantam piñachin mamantañataqmi rabiachin.

²⁶ Mana huchayuq runata sentenciayqa manam allinchu, allin kawsakuq runata azoteypas manam allinchu.

²⁷ Aslla rimayqa yachayniyuq kaymi, yachayniyuq runaqa controlakuytam yachan.

²⁸ Mana yachayniyuq runapas upallakuspanqa yachayniyuqpaq hapisqam, siminta wichqakuq runam ichaqa allin tanteakuq.