Proverbios 16 - CHUYA QELLQA La Biblia en Quechua de Ayacucho 2012

¹ Runaqa tukuy imatapas tanteanmanmi, ichaqa Tayta Dios munaptinmi ruwasqa kanqa otaq manapas.

² Runapaqqa imaña ruwasqanpas allinpaqmi rikchakapun, chaywanpas Tayta Diosmi runapa imam tanteasqanta juzganqa.

³ Ima ruwasqaykitapas Tayta Diospa makinman churay, hinaptinqa imaña ruway munasqaykipas ruwasqam kanqa.

⁴ Tayta Diosqa munasqanman hinam imakunatapas ruwarqa, mana allin ruwaq runatapas mana allin punchawpaqmi ruwarqa.

⁵ Tayta Diosqa millakunmi hatun tukuq runataqa, chayna runaqa haykapipas castigasqapunim kanqa.

⁶ Kuyakuywan hinaspa cheqap kaqwanmi huchataqa pampachana, runaqa Tayta Diosta kasukuspallam mana allinmanta sapaqchakunqa.

⁷ Runapa ñannin Tayta Diospa munasqanpaq hina kaptinqa, Tayta Diosmi chay runataqa enemigonkunawan hawkayaypi kawsachinqa.

⁸ Mana allinkunata ruwaspa apuyaymantaqa mana engañaspa asllatapas ganakuymi aswan allinqa.

⁹ Runaqa sonqonpim imaynam kawsananta tantean, ichaqa Tayta Diosmi purinan ñantaqa allichan.

¹⁰ Reyqa Diospa rantinpim riman, imata juzgaspapas manam pantanchu.

¹¹ Tayta Diospam mana suwakuq balanzawan cabal pesoqa, pesokunaqa paypa ruwasqallanmi.

¹² Reykunaqa millakunkum mana allin ruwaykunataqa, paykunapa munaychakuyninqa sapinchakun allin ruwaypim.

¹³ Reykunaqa kusikun imam kaqta rimaqkunawanmi, paykunaqa kuyan cheqap rimaqkunatam.

¹⁴ Reypa piñakuyninqa wañuytam apamun, yachayniyuq runam ichaqa tanichin.

¹⁵ Reypa kusikuyninpiqa kawsaymi tarikun, paypa kuyakuyninqa poqoy para hinam.

¹⁶ Qorimantapas aswan allinqa yachayta tariymi, qollqemantapas aswan allinqa yachayniyuq kaymi.

¹⁷ Allin ruwaq runaqa mana allinmantam sapaqchakun, imaynam kawsasqanta qawakuqqa vidantam waqaychan.

¹⁸ Hatun tukuypa qepantam waqapakuy hamun, qari tukuypa qepantañataqmi llakikuy hamun.

¹⁹ Wakchakunawan uchuychakuymi aswan allin hatun tukuqkunawan apuyanamantaqa.

²⁰ Rimapayasqa uyarikuq runaqa allinmi kanqa, Tayta Diosman hapipakuq runaqa mayna kusisqam kanqa.

²¹ Yachayniyuq runataqa “yachayniyuq” nispam sutichanku, miski simi runaqa yachaytam mirachin.

²² Allin tanteakuyqa hatalliqninpaqmi kawsachikuq yaku; mana yachayniyuqta yachachiyqa, mana yuyayniyuqpa ruwayninmi.

²³ Allinta tanteakuq runaqa yachaywanmi riman, rimaspanmi yachayta cheqechin.

²⁴ Sumaq rimaykunaqa abejapa miskin hinam, almapaqmi miski, cuerpopaqñataqmi hampi.

²⁵ Runapaqmi kan allin ñanman rikchakuq ñan, tukupayninmi ichaqa wañuyman apakun.

²⁶ Llamkaqtaqa yarqayninmi llamkapakuyman tanqan, yarqayninmi llamkananpaq hikutan.

²⁷ Mana allin runaqa mana allin ruwayllatam maskan, siminpas rawrachkaq nina hinam.

²⁸ Mana allin runaqa peleollatam hatarichin, cuento qepi runaqa kuyanakuqkunatapas rakinanmi.

²⁹ Mana allin runaqa kuyanakuqmasintapas pantachinmi, hinaspam mana allin ñanninta pusan.

³⁰ Mana allinta ruway munaqqa ñawinwanmi qemchipayan, mana allinta ruwaruspanmi kachupakun.

³¹ Kawsakuyninpi allinta ruwaspa machuyaruq runapaqqa umanpi soqonkunapas corona hinam.

³² Qari-qari kaymantapas aswan allinqa mana chaylla piñakuruymi; llaqtakuna venceymantapas aswan allinqa genionchik controlakuymi.

³³ Suerteta runa chamqaptinpas, imayna kanantaqa Diosllam yachan.