Proverbios 15 - CHUYA QELLQA La Biblia en Quechua de Ayacucho 2012

¹ Llampu simiqa piñakuytam tanichin, nanay simim ichaqa aswan mismirichin.

² Yachayniyuq runapa siminmantaqa yachaymi lloqsimun, mana yachayniyuqpa siminmantañataqmi mana allin rimaykunalla lloqsimun.

³ Tayta Diospa ñawinqa tukuy hinastinpim kachkan, allin runatapas mana allin runatapas qawaspan.

⁴ Llampu simiqa kawsay qokuq sacha hinam, mana allin rimaymi ichaqa sonqota llakichin.

⁵ Mana yachayniyuq warmaqa taytanpa corregisqantam wischupakun, chaskikuq warmam ichaqa yachayniyuq kayninta qawachikun.

⁶ Allin ruwaq runapa wasinpiqa imapas achkanpim tarikun, mana allin runamanmi ichaqa ganakusqanpas sasachakuyllata apamun.

⁷ Allin yachayniyuq runakunapa siminqa yachaytam tarpun, mana yachayniyuq runakunam ichaqa mana chaynataqa ruwankuchu.

⁸ Tayta Diosqa millakunmi mana allin runakunapa ofrendantaqa, allin ruwaq runakunapa mañakuynintam ichaqa kusikuywan chaskiykun.

⁹ Tayta Diosqa millakunmi mana allin runapa ñannintaqa allin kawsakuq runatam ichaqa kuyan.

¹⁰ Allin ñanta saqeruq runataqa allinniqtam corregina, corregisqa kayta mana munaq runaqa wañunqapunim.

¹¹ Wañuywan wañusqakunapa kasqanpas Tayta Diospa qayllanpim kachkan, aswanraqmi runakunapa imaynam kawsasqanqa paypa rikusqallan kachkan.

¹² Mana kasukuq runaqa qaqchaykuqnintapas cheqninmi, yachayniyuq runakunawanpas manam hukllawakunchu.

¹³ Kusisqa sonqoqa runapa uyantam kuyapata ruwan, onqosqa sonqom ichaqa runata llakichin.

¹⁴ Allin tanteakuq runaqa yachaytam maskan, mana yuyayniyuq runam ichaqa mana allin rimasqanta mikunqa.

¹⁵ Llakisqa sonqoyuq runapaqqa sapa punchawmi sasachakuylla, kusisqa sonqoyuq runapaqmi ichaqa sapa punchaw kusikuylla.

¹⁶ Wakchalla kaspapas Diosta kasukuymi aswan allinqa, apu kachkaspa sasachakuypi kawsanamantaqa.

¹⁷ Cheqnikuywan poqosqa torota mikunamantaqa, kuyakuywan yuyuta mikukuymi aswan allinqa.

¹⁸ Chaylla piñakuruq runaqa piñanakuyllatam hatarichin, llampu sonqo runam ichaqa tanichin.

¹⁹ Qella runapa ñanninqa kichkakunapa huntasqan ñan hinam, allin kawsakuq runapa ñanninmi ichaqa hatun ñan hinaraq.

²⁰ Yachayniyuq warmaqa taytantam kusichin, mana yachayniyuq warmam ichaqa mamanmantapas penqakun.

²¹ Mana yachayniyuq runaqa pantasqanwanmi kusikun; yachayniyuq runam ichaqa pantaruspanpas allin ñanman kutirikun.

²² Imataña ruwayta munasqapas mana tapurikuspa ruwasqaqa manam allinqa lloqsinchu; tapukacharikuspa ruwasqam ichaqa ima tanteasqanchikpas allin lloqsinqa.

²³ Runaqa tupaqninpi contestasqanwanmi kusikun, ¡mayna allinraqmi tiempollanpi rimayqa!

²⁴ Kawsay ñanqa wichaymanmi rin, yachayniyuq runatam wañuymanta libran.

²⁵ Hatun tukuq runapa wasintaqa Tayta Diosmi tuñichin, viudapa herenciantam ichaqa takyachin.

²⁶ Tayta Diosqa millakunmi mana allin runakunapa tanteasqantaqa, sumaq rimaykunawanmi ichaqa kusikun.

²⁷ Apuyayllata maskaq runaqa wasintam tuñichin, sobornachikuyta cheqniqmi ichaqa kawsakunqa.

²⁸ Allin ruwaq runaqa manaraq rimachkaspam allinta tanteakun, mana allin runam ichaqa siminpa atipasqanta mana allinllata kacharin.

²⁹ Mana allin runamantaqa Tayta Diosqa karupim kachkan, allin ruwaq runapa mañakuynintam ichaqa uyarin.

³⁰ Allin ñawiwan qawariyqa sonqotam kusichin, allin willakuyqa musoq kallpatam qokun.

³¹ Allin kawsananpaq rimapayasqata chaskikuq runaqa yachayniyuqkunawanmi kawsanqa.

³² Corregisqa kayta mana munaq runaqa kikillanmi penqayman churakun; corregisqa kayta chaskikuqmi ichaqa yachayta tarin.

³³ Tayta Diosta kasukuyqa yachayta haypaymi, hatunchasqa kayqa uchuychakuywanmi qallarin.