Proverbios 14 - CHUYA QELLQA La Biblia en Quechua de Ayacucho 2012

¹ Yachayniyuq warmiqa wasintam takyachin, mana yachayniyuq warmim ichaqa makinkunawan tuñichin.

² Allin kawsakuq runaqa Tayta Diostam kasukun, mana allinta kawsaq runam ichaqa Diostapas qepanchan.

³ Mana yachayniyuq runapa siminmantaqa hatun tukuymi lloqsimun, yachayniyuq runatam ichaqa simin waqaychan.

⁴ Torokuna mana kaptinqa taqepas mana imayuqmi kachkan, torokunapa kallpanwanmi ichaqa cosechapas achkallaña qespin.

⁵ Allin testigoqa cheqap kaqllatam willakun, mana allin testigom ichaqa llullallata willakun.

⁶ Hatun tukuq runaqa yachayta maskaspapas manam tarinchu, yuyaymanayniyuq runapaqmi ichaqa yachay tariypas mana sasachu.

⁷ Mana yachayniyuq runamanta sapaqchakuy, paypa siminmantaqa manam ima yachachikuytapas tariwaqchu.

⁸ Yachayniyuq runataqa yachaymi imaynam kawsananta yachachin, mana tanteoyuq runatam ichaqa mana yachayniyuq kaynin pantachin.

⁹ Mana yachayniyuq runakunaqa huchanmantapas asikunmi, allin runakunam ichaqa Diospa kuyakuyninta tarinku.

¹⁰ Sonqoqa yachakunmi imakunam llakichisqantaqa, paypa kusikuyninwanqa manam kusikunmanchu sapaq runaqa.

¹¹ Mana allin runakunapa wasinqa tuñichisqam kanqa, allin ruwaq runakunapa wasinmi ichaqa llanllarinqa.

¹² Runapaqmi kan allin ñanman rikchakuq ñan, tukupayninmi ichaqa wañuyman apakun.

¹³ Asikuypa chawpinpipas sonqoqa nanakunmi, kusikuyqa waqakuypim tukun.

¹⁴ Mana allin runaqa mana allin ruwasqanwanmi kusikun, allin ruwaq runam ichaqa allin ruwayninwan kusikun.

¹⁵ Mana yuyayniyuq runaqa imataña nisqankutapas chiqappaqmi hapirun, yachayniyuq runam ichaqa allinta tanteakuykuspan imatapas ruwan.

¹⁶ Yachayniyuq runaqa manchakuspam mana allinmanta ayqekun, mana yachayniyuq runam ichaqa hatun tukuspa kikillanpi hapipakun.

¹⁷ Chaylla piñakuruq runaqa mana allinkunallatam ruwan, allin tanteakuq runam ichaqa hawkalla kakun.

¹⁸ Mana yachayniyuq runakunapa pagonqa mana yachayniyuq kaymi, yachayniyuq runakunam ichaqa yachaywan coronasqa kanqaku.

¹⁹ Mana allin runakunaqa allin runakunapa ñawpaqninpim kumuykunqaku, mana allin runakunaqa allin ruwaq runakunapa punkunpim qonqoranqaku.

²⁰ Wakchataqa amistadninkunapas cheqninkum, aputam ichaqa achkallaña kuyanku.

²¹ Runamasinta mana llakipayaq runaqa huchallikunmi, wakchakunata llakipayaqmi ichaqa ancha kusisqa kanqa.

²² Mana allin ruwayta maskaqkunaqa hatun pantaypim tarikuchkanku; allin ruwayta maskaqkunam ichaqa Diospa kuyakuyninta chaskinqaku.

²³ Imapipas llamkakuq runaqa allin kaqkunatam tarin, rimaylla-rimaqmi ichaqa wakchayanqa.

²⁴ Yachayniyuq runapa coronanqa yachayninmi, mana tanteoyuq runapañataqmi mana yachayniyuq kaynin.

²⁵ Cheqap rimaq testigoqa runamasintam libran, llulla testigom ichaqa llullallata riman.

²⁶ Tayta Diosta manchakuqqa hatun waqaychakuytam tarin, churinkunapas chaypim hapipakunku.

²⁷ Tayta Diosta manchakuyqa kawsakuypa qallariyninmi, wañuymantam runata lluptichin.

²⁸ Reypa hatunchakuyninqa kachkan achka runapi munaychakuyninpim, ichaqa mayna penqakuypaqmi mana pipas kamachinanpaq kaptinqa.

²⁹ Mana chaylla piñakuruq runaqa ancha yachayniyuqmi, chaylla piñakuruq runam ichaqa pasaypaq mana yachayniyuq kasqanta qawachikun.

³⁰ Llampu sonqoqa cuerpotam kawsachin, envidiakuymi ichaqa tullupi onqoy hina.

³¹ Wakchata ñakarichiq runaqa unanchaqninpa contranpim hatarichkan, wakchata llakipayaq runam ichaqa unanchaqninta hatunchan.

³² Mana allin runataqa mana allin ruwayninkunallam tuñichin, allin ruwaq runam ichaqa wañunankama Diosman hapipakun.

³³ Yachayniyuq runapa sonqonpiqa yachaymi tarikun, mana tanteoyuq runam ichaqa yachaytapas mana reqsinchu.

³⁴ Allin kaqkunata ruwayqa nacionkunatam hatunchan, hucham ichaqa llaqtakunata penqayman churan.

³⁵ Yachayniyuq runaqa reypa kuyakuynintam tarin, penqayman churaqninmi ichaqa piñakuyninta tarinqa.