Proverbios 12 - CHUYA QELLQA La Biblia en Quechua de Ayacucho 2012

¹ Corregisqa kayta kuyaqqa yachayta kuyaqmi; corregisqa kayta cheqniqmi ichaqa mana yachayniyuq.

² Allin runaqa Diospa kuyakuynintam chaskinqa, mana allin yuyaymanaqtam ichaqa castiganqa.

³ Mana allinpi kawsaq runaqa manam takyanmanchu, allin ruwaq runakunapa sapinmi ichaqa mana kuyurichisqa kanqa.

⁴ Allin warmiqa qosanpa coronanmi, mana allin warmim ichaqa qosanpaqpas tullu nanaynin.

⁵ Allin ruwaq runakunaqa allin kawsakuypim yuyaymananku; millay runakunam ichaqa engañayllapi yuyaymananku.

⁶ Mana allin runapa rimayninqa wañuchikuq trampa hinam; allin runapa rimayninmi ichaqa runamasinta wañuymanta salvanqa.

⁷ Mana allin runakunaqa Dios tuñichiptinmi chinkarunqaku, allin ruwaq runakunapa wasinmi ichaqa takyanqa.

⁸ Runaqa yachayniyuq kasqanraykum alabasqa, mana allin sonqoyuq runam ichaqa despreciasqa.

⁹ Runakunapa despreciasqan kaspapas mikunayuq kaymi aswan allinqa, ancha reqsisqa kachkaspa mana mikunayuq kanamantaqa.

¹⁰ Allin ruwaq runaqa uywankunatapas nanachikunmi, mana allin runam ichaqa mana llakipayanchu.

¹¹ Llamkakuq runaqa saksasqam kanqa, qella runam ichaqa yanqakunallapi tiempota usuchin.

¹² Mana allin runakunapa wichichiqnin trampaqa kikinkupa mana allin munayllankum, allin runakunam ichaqa achkanpi ruruq sacha hina.

¹³ Mana allin runaqa kikinpa llullakusqallanwanmi chaqnarachikun, allin runam ichaqa sasachakuymantapas lluptinqa.

¹⁴ Runaqa rimasqankunapa rurunwanmi saksan, makinkunawan ruwasqanmantam pagota chaskikun.

¹⁵ Mana yachayniyuq runapaqqa imaña ruwasqanpas allinpaqmi rikchakapun, yachayniyuq runam ichaqa rimapayasqapas uyarikun.

¹⁶ Mana yuyayniyuq runaqa piñakuynintam chaylla qawachikun, yachayniyuq runam ichaqa kamiqnintapas pampachaykun.

¹⁷ Allin testigoqa cheqap kaqtam willakun, mana allin testigom ichaqa llullata willakun.

¹⁸ Nanay simikunapa rimayninqa espada hinam kuchukun, yachayniyuq runapa rimayninmi ichaqa hampi.

¹⁹ Cheqap rimaq runaqa wiñaypaqmi takyanqa, llulla rimaq runam ichaqa chaylla chinkarunqa.

²⁰ Mana allinlla yuyaymanaq runakunapa sonqonpiqa engañollam kachkan, allinllata consejakuq runapa sonqonpim ichaqa kusikuy kachkan.

²¹ Allin ruwaq runataqa manam imapas pasanqachu, mana allin runatam ichaqa rikchaqmana ñakariykuna ñakarichinqa.

²² Tayta Diosqa cheqninmi llulla runakunataqa, cheqap rimaqkunatam ichaqa kuyan.

²³ Yachayniyuq runaqa yachayninmantapas manam alabakunchu, mana yachayniyuqmi ichaqa mana yuyayniyuq kayninta qawachikun.

²⁴ Llamkakuq runaqa munaychakunqam, qella runam ichaqa munaychakusqa kanqa.

²⁵ Llakikuyqa runapa sonqontam ñakarichin, kuyakuywan rimaymi ichaqa kusichin.

²⁶ Allin ruwaq runaqa runamasintam allin ñanninta pusan, mana allin runakunam ichaqa pantachin.

²⁷ Qella runaqa, animal hapisqantañapas manam kankanchu, llamkakuq runam ichaqa apuyanqa.

²⁸ Allin kawsakuyqa kawsayman apakuq ñanmi, mana allin kawsaymi ichaqa wañuyman apakun.