Proverbios 11 - CHUYA QELLQA La Biblia en Quechua de Ayacucho 2012

¹ Tayta Diosqa millakunmi suwakuq balanzataqa, cabal pesaqtam ichaqa allinpaq qawan.

² Hatun tukuq runaqa penqaypim kanqa, uchuychakuq runam ichaqa yachayniyuq kanqa.

³ Allin kawsakuq runataqa allin kawsakuyninmi kawsachin; iskay uya runatam ichaqa iskay uya kaynin chinkachin.

⁴ Juicio punchawpiqa qori-qollqepas manam imapaqpas valenqachu; allin kawsakuymi ichaqa runata wañuymanta libranqa.

⁵ Allin kawsakuyqa mana huchayuqpa ñannintam allichan; mana allin runam ichaqa mana allin ruwayninkunawan wichinqa.

⁶ Allin kawsakuq runataqa allin kawsakuyninmi libran, huchasapa runatam ichaqa kikinpa huchallan chaqnarun.

⁷ Mana allin runa wañuruptinqa, tukuy ima suyasqanwan imam munasqanpas paywan kuskam puchukarunqa.

⁸ Allin kawsakuq runataqa sasachakuymantapas Diosmi libraykun, hinaspam mana allin runataña chay sasachakuyman churaykun.

⁹ Iskay uya runaqa rimayninwanmi runamasinta tuñichin, allin kawsakuq runatam ichaqa yachaynin libraykun.

¹⁰ Allin ruwaq runakuna apuyaptinqa llaqtam kusikun, mana allin runakuna wañuruptinñataqmi kusikuymanta pawaykachanku.

¹¹ Allin ruwaq runakunapa bendecisqanwanmi llaqta hatunchasqa, mana allin runakunapa rimayninmi ichaqa llaqtata tuñichin.

¹² Mana yachayniyuq runaqa runamasinmantam mana allinta riman, yachayniyuq runam ichaqa upallakun.

¹³ Cuento qepi runaqa pakasqa kaqkunatam willakachakun, confianza runam ichaqa imam willasqaykitapas pakaykun.

¹⁴ Mana allin kamachikuqkunawanqa nacionpas tuñirunmi; achka consejaqkuna kaptinmi ichaqa takyanqa.

¹⁵ Mana reqsisqata garantizaq runaqa llakipim tarikunqa, mana garantizay munaqmi ichaqa hawka kawsakunqa.

¹⁶ Kuyapayakuq warmiqa respetasqam kanqa; imapiñapas llamkakuq runaqa apuyanqam.

¹⁷ Llakipayakuq runaqa kikintapas allintam ruwakun, mana llakipayakuq runam ichaqa kikillan mana allinta ruwakun.

¹⁸ Mana allin runapa pagonqa mana allin kaqkunallam; allinta kawsakuqmi ichaqa allin pagota chaskikunqa.

¹⁹ Allin kawsakuyqa kawsaymanmi apakun, mana allin kawsaymi ichaqa wañuyman apakun.

²⁰ Tayta Diosqa millakunmi huchallapi yuyaymanaqtaqa, mana huchallikuspa kawsakuqwanmi ichaqa kusikun.

²¹ Mana allin runaqa castigasqapunim kanqa, allin kawsakuqmi ichaqa librasqa kanqa.

²² Kuchipa chuñunpi qorimanta anillo hinam mana yachayniyuq kuyayllapaq warmiqa.

²³ Allin ruwaq runakunaqa allin kaqkunallatam munanku, mana allin runakunapa munayninmi ichaqa piñakuyta hatarichin.

²⁴ Imallantapas qokuykuq runaqa qosqanmantapas mastaraqmi chaskikun, maqlla runam ichaqa wakchayayman chayanqa.

²⁵ Kuyakuywan qokuykuq runaqa tukuy imayuqmi kanqa, runamasinman mikuykachiq runaqa saksachisqam kanqa.

²⁶ Trigon kachkaptin mana rantikuy munaq runataqa llaqtamasinkunam ñakanqa, kusikuywan rantikuqtam ichaqa bendecinqa.

²⁷ Allin kaqkunata maskaq runaqa yanapakuytam tarinqa, mana allinta maskaq runatam ichaqa mana allin hayparunqa.

²⁸ Kapuqninkunapi hapipakuq runaqa chakisqa rapi hinam wichirunqa, allin kawsakuq runam ichaqa musoq rapi hinaraq ikllirinqa.

²⁹ Wasinta sasachakuyman apaq runaqa tukuy ima hatallisqantam wischurunqa, pisi yuyayniyuq runaqa yachayniyuq runapa criadonmi kanqa.

³⁰ Allin kawsakuypa rurunqa kawsaymi, alma ganaqmi ichaqa allin yachayniyuq.

³¹ Allin kawsakuq runa pagonta kay pachallapiraq chaskiptinqa, aswanraqmi mana allin runawan huchasapapas pagonkutaqa chaskinqaku.