Oseas 9 - CHUYA QELLQA La Biblia en Quechua de Ayacucho 2012

Israel castigasqa kananmanta

¹ Israelpa mirayninkuna, ama kusikuymanta pawaykachaychikchu, Diosta mana reqsiq llaqtakuna hinaqa. Diosnikichikmanta karunchakuruspam chuchumika warmi hinaña kachkankichik, trigo erakunapim pagota chaskikunkichik.

² Chayraykum, taqekichikpi trigoykichikpas pisinqa, maqmaykichikpi vinoykichikpas taninqa.

³ Tayta Diospa qosusqaykichik allpamantapas wischusqam kankichik. Efrainmi Egiptoman kutinqa, Asiriapipas mana mikunaykichiktam mikunkichik.

⁴ Tayta Diosmanqa vino ofrendatapas manañam tallinqakuñachu, sacrificio kañasqankupas millakuypaqmi kanqa, ñakariy tantatam mikunqakupas, pipas chayta mikuqqa millakuypaqmi kanqa, kawsanallankupaqñam mikunqakupas, chay mikuyta Tayta Diosman ofreceptinkupas manam chaskinqachu.

⁵ ¿Imatataq Tayta Diospa hatun kusikuy fiestanpi ruwankichik?

⁶ Wañuymanta ayqeptikichikpas Egipto nacionmi hapimusunkichik, Menfis llaqtapim pampasunkichik. Llaqtaykichikpipas chaynataq qori-qollqemanta alhajaykichikpipas mana allin qorakunawan kichkakunam wiñanqa.

⁷ ¡Castigasqa kananku punchawqa ñam chayaramunña! ¡Pagasqa kananku punchawqa ñam chayaramunña! Chaykunataqa Israelpa mirayninkunaqa ñam yachankuña. Qamkunaqa ninkichik: “Profetaqa mana yachayniyuqmi nispam”. “Espiritupa yanapakuyninwan rimaqtapas locopaqmi hapinkichik”. Huchapa intusqan kasqaykichikraykum chaykunataqa rimankichik, llumpay cheqnikuq kasqaykichikraykum chaynataqa tanteankichik.

⁸ Profetanwanmi Tayta Diosqa Efrainta qawachkan, profetakunapaqmi toqllata churachkanku, Diospa templonpipas cheqnisqañam rikurirunku.

⁹ Gabaa llaqtapi ruwasqankuta hinaraqmi llumpayta huchallikurunkichik; Tayta Diosmi ichaqa mana allin ruwaynikichikta yuyaykuspan ñakarichisunkichik.

Huchankurayku ñakarisqankumanta

¹⁰ Tayta Diosmi kaynata nin: Israel miraykunataqa chunniqpi uvasta hinam tarirqani; ñawpaq taytankutapas, higospa punta kaq rurunta hinam tarirqani. Paykunam ichaqa Baal-peorman chayaruspanku idolokunaman wischukuykuspa millakuypaq rikurirurqaku, yupaychasqanku idolokuna hina millakuypaqmi rikurirurqaku.

¹¹ Efrainpa ancha reqsisqa kayninpas alton pawaq urpi hinam pawarikunqa. Efrainpiqa warmikunapas manañam wiksayakunqakuñachu, nitaqmi wachakunqakuñachu.

¹² Wachakuruspanku uywachkaptinkupas qechuruspaymi wañurachisaq. ¡Ay, imaynaraq kanqaku saqeruptiyqa!

¹³ Efrainwan Tiroqa kaqkamallam, palmerakunapa pastokunapa chawpinpi sapinchasqam, ichaqa Efrainmi churinkunata wañuyman apanqa.

¹⁴ Dios Taytalláy, imam merecesqankutayá qoykuy, warmikunatapas qolluqtaña ruwaruy, ñuñunkutapas chakirachiy.

Iraelpa contranpi Diospa piñakusqanmanta

¹⁵ Tayta Diosmi kaynata nin: Gilgal llaqtapim tukuy mana allinkuna ruwayta qallaykurqaku, chaypim ñoqapas paykuna cheqniyta qallaykurqani; tukuy mana allinkuna ruwasqankuraykum temploymantapas paykunata wischurusaq; paykunataqa manañam kuyasaqñachu, llapa kamachiqninkupas mana kasukuqkunam.

¹⁶ Efrainmi onqorun, sapinmi chakirun manañam rurunqachu. Wawa-churiyuqña kaptinpas chay ancha kuyasqan wawantam wañurachisaq.

¹⁷ Diosniymi paykunata mana kasukusqankumanta wischurunqa, hinaptinmi llaqtan-llaqtan purinqaku.