Oseas 8 - CHUYA QELLQA La Biblia en Quechua de Ayacucho 2012

Idolokuna yupaychaqkunata qaqchasqanmanta

¹ Trompetata tocay, enemigom Tayta Diospa wasimpa contranpi anka hinaraq hamuchkan; yachachikuyniykunata mana kasukuspanmi pacto ruwasqayta llaqtay pakirun.

² Chaywanpas Israel runakunam qayakuwanqaku: ¡Diosniykupaqñam reqsikuykiku! nispanku.

³ Israelpa mirayninkunam allin kaqta wischupakurunku, chayraykum enemigonkuna qatikachanqa.

⁴ Paykunaqa mana simiywanmi reykunatapas churakurunku, kamachiqninkunatapas mana reqsisqay runakunatam churakuykunku; puchukanankupaqmi qorimantawan qollqemanta idolokunata ruwakurunku.

⁵ Samaria llaqtapi yachaqkuna, qori torillo idoloykichikta wischuychik, qamkunapaqmi llumpa-llumpayta piñakuruni. ¿Haykapikamataq mana chuyanchakuy atiq kankichik?

⁶ Yaw Israel, Samariapi yupaychasqayki qori torilloqa manam dioschu, chayqa runapa ruwasqallanmi; chayraykum pasaypaq ñutusqa kanqa.

⁷ Paykunaqa wayratam tarpurunku ichaqa sinchi para wayratam cosechanqaku. Wiñaq trigonkupas manam rurunqachu chayraykum harinankupas manaña kanqachu, trigota cosecharuptinkupas huklaw llaqtayuq runakunam mikukunqaku.

⁸ ¡Israelmi mikusqa rikurirun! Llapa nacionkunam mana valeqpaq qawaspanku paymanta asikunqaku.

⁹ Purun asno hinam Asiria nacionpi yanapakuyta maskanku, Efrainqa regalokunata qosparaqmi waynankunata maskakurun.

¹⁰ Nacionkunaman chaynataq Asiriaman tributo qoyninkupas, paykunataqa manam yanapanqachu, paykunataqa huklaw nacionkunakama apachiptiymi, reykunapa munaychakuqkunapa ñakarichisqan kanqaku ichaqa manam unaychu ñakarinqaku.

¹¹ Efrainmi huchanta mayllananpaq achkanpi altarkunata ruwakurun, ichaqa chay altarkunam rikurirun huchaman apaqninku altarkunaña.

¹² Sumaq kamachikuyniykunatam paykunaman qellqarqani, paykunam ichaqa qepancharurqaku.

¹³ Aychata mikunankuraykum ofrendatawan sacrificiota kañapuwanku, ichaqa ñoqa Tayta Diosmi chaytaqa mana chaskinichu. Ñoqam llumpay hucha ruwasqankuta qawachkani, chayraykum paykunataqa ñakarichisaq, Egipto nacionmanmi esclavo kanankupaq kutichisaq.

¹⁴ Israelmi unanchaqninta qonqaruspan palaciokunata ruwakurun, Judapas murallasqa llaqtakunatam achkallataña hatarirachin, ñoqam ichaqa palacionkunata ninawan kañasaq, murallankunatapas ninawanmi uchpayachisaq.