Oseas 5 - CHUYA QELLQA La Biblia en Quechua de Ayacucho 2012

Israel castigasqa kananmanta

¹ Sacerdotekuna kayta uyariychik, Israelpa mirayninkuna chaylla uyariychik, reypa mirayninkuna uyariychik: Mizpa lawpi tranpa churasqa hina, chaynataq Tabor orqopi challwanapaq malla hina kasqaykichikmantam juzgasqa kankichik.

² Sitim qechwapi llaqtayta wichichisqaykichikmantam llapallaykichik castigasqa kankichik.

³ Efraintaqa reqsinim, Israelpa mirayninkunaqa manam pakasqachu. Efraín, chuchumika hinañam kawsachkanki huchapakuyllapim kachkanki; Israelpas anchatam huchallikurun.

⁴ Mana allin ruwasqaykichikmi Diosman kutirikunaykichikta harkarusunkichik, chuchumika hina kawsakuynikichikmi Tayta Diosta reqsikunaykichiktapas harkarusunkichik.

⁵ Hatun tukuq kayninmi Israelpa contranpi declaranqa, huchankuraykum Israelpas chaynataq Efraimpas wichinqaku, paykunawan kuskam Judapas wichinqa.

⁶ Huk punchawmi ovejaykichikmanta vacaykichikmanta ofrenda aparisqa ñoqa Tayta Diosta maskawankichik, ichaqa qamkunamanta karunchakurusqayraykum mana tariwankichikchu.

⁷ Mana reqsisqa runakunapa churinta wachakuspam ñoqa Tayta Diosta qepancharuwankichik; chayraykum qamkunapas kapuqnikichikkunapas huk killallapi tukusqa kankichik.

Israelwan Judá castigasqa kanankumanta

⁸ Gabaa llaqtapi cornetata tocaychik, Ramá llaqtapi trompetata tocaychik. Bet-avén llaqtapiwan Benjaminpi, ¡guerra! nispa qapariychik.

⁹ Israel ayllukunamanmi cheqaptapuni imam pasananmanta willachini, castigasqay punchawmi Efrainpas chinkanqa.

¹⁰ Judá nacionpa kamachiqninkunaqa chakrankupa linderonkunata miraykachikuqmanmi rikchakunku, chayraykum paykunaman piñakuyniyta lloqllata hina chayachimusaq.

¹¹ Efrainmi ñakarichisqa kachkan, pipañapas munaychakusqanmi kachkan, idolokunata qatisqanraykum chaynaqa kachkan.

¹² Pacha mikuq puyu hinam Efraín castakunata tukurusaq, ismuchichkaq hinam Judá castakunatapas chinkarachisaq.

¹³ Onqoyninta Efraín qawakuykuspanmi, heridanta Judá qawakuykuspanmi, Asiria nacionpa reyninman kallpaspanku yanapakuyninta maskanqaku. Ichaqa payqa manam onqoyninmantaqa nitaq nanayninmantapas hampiyta atinqachu.

¹⁴ Efrainmanmi león hina pawaykusaq; Judamanñataqmi uña león hina pawaykusaq. Kikiypunim paykunata llikiparusaq; simiypi aparikuptiyqa manam pipas librayta atinqachu.

¹⁵ Huchankuta reqsikuspanku maskaqniy hamunankukamam maymi kasqayman kutikusaq. Ñakariyninkupim anchata maskawanqaku.