Oseas 4 - CHUYA QELLQA La Biblia en Quechua de Ayacucho 2012

Israelpa mirayninkunata Dios qaqchasqanmanta

¹ Israelpa mirayninkuna, Tayta Diospa nisqanta uyariychik. Tayta Diosmi kay pachapi runakunapaq piñakun, cheqap kaqpas, llakipayakuypas, Diosta manchakuypas kay pachapiqa manañam kanñachu.

² Aswanqa yanqamanta juramentaywan llullakuymi, wañuchinakuywan suwakuymi, cheqninakuywan waqllikuymi mirakuchkan, manaña tukuytam wañuchinakuchkanku.

³ Chayraykum kay nacionqa sinchi llakipi tarikun, kay nacionpi runakunam mana kallpayuq rikurirunku; purun animalkunapas, alton pawaq urpikunapas, lamar qochapi challwakunapas wañuchkankum.

Sacerdotekunata Tayta Dios qaqchasqanmanta

⁴ Tayta Diosmi nin: Sacerdotekuna, qamkunam huchayuqqa kankichik. Ama pipas runamasinta qaqchachunchu yanqamanta tumpaspa.

⁵ Tuta punchawmi huchallikunkichik, profetakunatapas huchamanmi tanqaykunkichik, chayraykum mamaykichikta wañurachisaq.

⁶ Mana yachayniyuq kasqanraykum llaqtayqa chinkachisqa karqa. Yachachikuyniyta wischupakusqaykiraykum sacerdote kaynikimantapas qarqorusqayki; Diosnikipa kamachikuyninkunata qonqarusqaykiraykum ñoqapas miraynikikunata qonqarusaq.

⁷ Sacerdotekuna mirasqankuman hinam runakuna astawan contraypi huchallikurqaku. Chayraykum ñoqapas respetasqa kayninta penqayman churarusaq.

⁸ Llaqtaypa huchallikusqanmantam paykunaqa mikunku, chayraykum paykunaqa aswanraq huchallikuyman llaqtayta tanqanku.

⁹ Chayraykum sacerdotekunatapas chaynataq runakunatapas, mana allin kawsayninkuman hina ñakarichispay imam ruwasqankuman hina castigasaq.

¹⁰ Ñoqa Tayta Diosmanta karunchakurusqankuraykum mikuspankupas mana saksanqakuchu, mirayta munaspankupas manam miranqakuchu.

Idolokunata Israelpa yupaychasqanmanta

¹¹ Chuchumika warmikunawan kakuspa vinowan aqawan machakusqankuraykum mana yuyayniyuq rikurirunku.

¹² Llaqtaymi kullumanta idolokunata tapukun, chay kulluñataqmi paykunaman kutichin. Aychankupa munasqanta ruwaspankum mana allin ñanninta pasakunku, chuchumikayaruspam ñoqa Diosninkumanta karunchakurunku.

¹³ Orqokunapa puntanman qespispankum hatun sachakunapa ukunpi idolonkupaq animalkunata wañuchispa ofrecenku. Warmi churinkunawan llumchuyninkunañataqmi waqllikuypi purichkanku.

¹⁴ Ichaqa, hayka qariwanña churikichik puñukuptinpas hukwan-hukwanña llumchuynikichik waqllikuptinpas paykunataqa manam castigasaqchu; qamkunapunipas chuchumika warmikunawan, idolokunata qachakuyninwan serviq warmikunawan qachakusqaykichikrayku. Chayraykum mana yachayniyuq llaqtaqa tuñichisqa kanqa.

¹⁵ Israelpa mirayninkuna, qamkuna waqllikuspa huchallikuptikichikpas, amayá Judá ayllukunaqa huchallikuchunkuchu. Amaña Gilgal llaqtamanpas riychikñachu, nitaq Bet-avén orqomanpas seqaychikñachu, Tayta Diospa sutinpipas amaña juraychikñachu.

¹⁶ Israelpa mirayninkuqa, qamkunaqa manaraq mansasqa loca vaquilla hinam kankichik, chaynaqa, ¿imaynataq Tayta Diospas ovejakunata hina sumaq pastopiraq michisunkichikman?

¹⁷ Efrainmi idolokunaman qokurun, ¡hinayá chayna kawsachun!

¹⁸ Upyanankupaq trago tukuruptinpas chuchumika warmikunawanmi qachakunku, kamachiqninkupas millakuypaq kaqkunatam kuyarunku.

¹⁹ Rapranpi apachkaq hinam muyuq wayra paykunata aparunqa, idolokunaman sacrificio ofrecesqankumantapas penqakunqakum.