Oseas 13 - CHUYA QELLQA La Biblia en Quechua de Ayacucho 2012

Israel nación chinkachisqa kananmanta

¹ Efraín castakuna rimariptinqa lliwmi manchakuqku, Israelpi llapallan ayllukunam respetaqku; ichaqa Baal idolota yupaychasqankuraykum Efraín castakunaqa wañurunku.

² Kunanpas paykunaqa hinallam huchallikuchkanku, qollqenkutapas chulluchispam tanteasqankuman hina idolokunata ruwakuchkanku, hinaspam runakunata ninku: “Qori torillo idoloman sacrificiota qoychik, hinaspa muchaykuychik”, nispanku.

³ Chayraykum paykunaqa achikyay puyu hina waspirunqaku, achikyaq sulla hina chinkarunqaku; wayrapa apasqan qopa hinam chinkarunqaku, wasi uchkunta lloqsiq qosni hinam chinkarunqaku.

⁴ Ñoqaqa Señornikichik Tayta Diosmi kani, Egiptopi kasqaykimantaraqmi Diosnikichik kani. Ñoqamanta huk Diostaqa manam reqsirqankichikchu, ñoqamanta hukqa manam pipas salvasunkichikmanchu.

⁵ Ñoqam chunniqpi reqsirqayki, ñoqataqmi chaki allpapipas waqaycharqayki.

⁶ Mikuyta qoykuptiymi paykuna saksarurqaku, saksaykuspankuñataqmi hatunchakururqaku, hinaspam qonqaruwarqaku.

⁷ Chayraykum paykunapaqqa león hinaña rikurirusaq, ñanpi suyakuq león hinañam paykunataqa wateqasaq.

⁸ Wawanta chinkarachiq ukumari hinam hapiruspay qasqonkutapas llikiparusaq, león hinam paykunataqa mikurusaq, purun animal hinam paykunataqa tisaparusaq.

⁹ Israel miraykuna, ñoqam chinkarachisqaykichik; hinaptinqa, ¿pitaq yanapasunkichik?

¹⁰ ¿Maytaq chay reyniki llaqtaykikunapi salvasunaykipaq? ¿Maypitaq chay kamachiqnikikuna kachkan? Qamkunaqa paykunatam reyta qosunaykichikpaq mañakurqankichik.

¹¹ Piñakuyniypim reytapas qorqaykichik, piñakuyniypitaqmi qechurqaykichikpas.

¹² Efraín castapa mana allin ruwasqanqa waqaychasqam kachkan, huchallikusqankunapas qellqasqam kachkan.

¹³ Nacenanpaq nanaymi chayaramun, Efrainmi ichaqa mana musyakuq wawa hina, maman wachakuptinmi nacemunanpaq kachkaspan chakakurun.

¹⁴ ¿Sepulturapa atiyninmantachu librasqaykichik? ¿Wañuypa makinmantachu qechusqaykichik? Yaw wañuy, ¿maytaq wañuchiq peste onqoynikikuna? Yaw sepultura, ¿maytaq chinkachinaykipaq atiyniki? Kay llaqtata chinkachiy, manam llakipayaymanñachu.

¹⁵ Efraín llaqta musoqmanta hatariptinpas intipa qespimunan lawmantam viento hamunqa, chunniqmantam Diospa wayran hamunqa, yakupa kasqan pukyukunam chakinqa, qori-qollqenkunatapas enemigonkunam apakunqa.

¹⁶ Samariapas Diospa contranpi hatarisqanraykum chinkanqa; espadapa puntanpim wañunqaku, wawakunapas pampaman waqtasqam wañunqaku, wiksayuq warmikunapas wiksanku llikisqam wañunqaku.