Oseas 12 - CHUYA QELLQA La Biblia en Quechua de Ayacucho 2012

¹ Efrainmi wayrata mikun, tukuy punchawmi intipa qespimunan lawmanta hamuq wayrata qatichkanku; llullakuytawan wañuchinakuyllatam mirachinku. Paykunaqa Asiria nacionwanmi contratota ruwarunku, Egiptomanñataqmi aceiteta astanku.

² Tayta Diosmi Judá castakunawan juiciopi tarikun, Jacobpa mirayninkunatam mana allin kawsasqankumanta ñakarichinqa, ruwayninkuman hinam pagapunqa.

³ Jacobqa mamanpa wiksallanmantaraqmi wawqenta talonninmanta hapimurqa, hatun runaña kaspanmi Dioswan pelearqa.

⁴ Angelwan peleaspam kallpanman hina vencerurqa, bendeciykunanpaqmi weqenwan mañakurqa, Diospas Bet-elpi tariruspanmi payta rimapayarqa.

⁵ Tukuy Atiyniyuqmi Diosninchikqa, ¡Tayta Diosmi sutinpas!

⁶ Israel miraykuna, Diosnikichikman kutirikuychik, llakipayakuytawan allin kawsakuyta ruwaychik, ama pisipaspa Diospi hapipakuychik.

⁷ Negociantekunaqa suwakuq balanzatam hatallinku, paykunaqa runamasin engañayllatam maskanku.

⁸ Efrainmi kaynata nin: Ñoqaqa anchatam apuyaruni, qori-qollqetam llumpayta huñukuruni; manam pipas musyanqachu apuyanaypaq engañasqaytaqa, nispa.

⁹ Egiptopi kasqaykichikmantapunim ñoqa Tayta Diosqa Diosnikichik kani. Purunpi tupasqanchikpi hinam huktawan carpakunapi kawsachisqaykichik.

¹⁰ Profetakunatam rimapayarqani anchallatañam profetizarqaku, rikchanachiykunawanmi profetankunatakama rimapayarqani.

¹¹ Galaad runakunaqa mana allin runakunam, Gilgal llaqtapim idolonkupaq torokunata sacrificarqaku, chayraykum altarninkupa ruminkunapas chakrakunapi wischusqa purmanqa.

¹² Jacobmi Aram lawman ayqekurqa, Israelmi warmirayku oveja michiypi llamkarqa.

¹³ Tayta Diosmi huk profetantakama Israelta Egipto nacionmanta hurqomurqa, huk profetantakamam paykunata Tayta Dios waqaycharqa.

¹⁴ Ichaqa Efrainmi Tayta Diosta llumpayta piñachirqa, chayraykum runa wañuchisqanmanta paganqa, tukuy mana allin ruwasqanmantam Tayta Dios ñakarichinqa.