Números 8 - CHUYA QELLQA La Biblia en Quechua de Ayacucho 2012

Candelabropa mecheronkunata ratachinankumanta

^1-2 Aaronman ninanpaqmi Moisesta Tayta Dios nirqa: Candelabropi qanchisnintin mecherokunata ratachiptikiqa, candelabropa ñawpaqninmanmi kanchanqa, nispa.

³ Aaronñataqmi chaynata ruwaspan candelabropa ñawpaqninman chay mecherokunata kanchachirqa, chaynataqa ruwarqa Moisesman Tayta Diospa kamachisqanman hinam.

⁴ Chay candelabroqa qorimanta labrasqam karqa, tiyananmanta qallarispa waytankunakamam martillowan labrasqa karqa, chaynaqa ruwasqa karqa Moisesman Tayta Diospa qawachisqanman hinam.

Leví ayllu Diosllapaqña rakisqa kasqanmanta

⁵ Tayta Diosmi Moisesta nirqa:

⁶ Israelpa mirayninkunamanta Leví aylluta rakispa chuyanchay.

⁷ Paykunata chuyanchaspaykiqa kaynatam ruwanki: Paykunatam hucha mayllana yakuwan challanki hinaptinmi lliw cuerponkupi pelonkuta siksikunqaku, taqsakunqakutaqmi pachankutapas, chaynapim chuyanchasqa kanqaku.

⁸ Chaymantam apamuwanqaku malta torota chaynataq fino harinamanta aceitewan chapusqa kawsay ofrendatapas. Qampas apamuwankitaqmi hucharayku ofrendapaq huk malta torota.

⁹ Asuykuwanaykichik carpapa ñawpaqninmanmi Leví ayllu runakunata asuykachinki, Israelpa llapallan mirayninkunatapas huñunankitaqmi.

¹⁰ Leví ayllu runakunata ñoqa Tayta Diospa qayllayman asuykachimuptikim Israelpa mirayninkuna makinkuta paykunapa hawanman churanqaku.

¹¹ Hinaptinmi Aaronñataq Israelpa mirayninkunapa ofrendanta hina Leví ayllukunata ñoqa Tayta Diospa qayllaypi sapaqchapuwanqa, chaynapim Leví ayllukunaqa ima ruwaypipas ñoqa Tayta Diosta serviwanqaku.

¹² Chaymantam Leví ayllukuna makinkuta malta torokunapa umankuman churanqaku, hinaptinmi qam Moisesñataq huknin torota hucharayku ofrendata ofrecemuwanki, huknintañataqmi Leví ayllukunapa huchanta pampachanaypaq lliw kañana ofrendata ofrecemuwanki.

¹³ Hinaspam Leví ayllukunata Aaronpa chaynataq churinkunapa ñawpaqninpi sayachinki, hinaspam ofrendata hina ñoqa Tayta Diospaq sapaqchapuwanki.

¹⁴ Chaynatam Leví ayllukunataqa Israelpa mirayninkunamanta sapaqchapuwanki ñoqallapaqña kanankupaq.

¹⁵ Chaymantañam Leví ayllukunaqa asuykuwanaykichik carpaman asuykunqaku chaypi servikunankupaq. Qanmi paykunata chuyanchaspa ofrendata hina sapaqchapuwanki.

¹⁶ Leví ayllukunaqa Israelpa mirayninkunamantam regalo hina ñoqallapaqña kanqaku. Paykunataqa Israelpa mirayninkunapa llapallan punta kaq wawa-churinkupa rantinpim ñoqallapaqña akllakuni.

¹⁷ Egipto nacionniyuq runakunapa piwi wawa-churinkunata wañurachispaymi Israelpa mirayninkunapa piwi wawa-churinkuta ñoqapaq sapaqchakurqani. Paykunaqa ñoqapam, animalkunapa punta kaq wawankunapas ñoqapataqmi.

¹⁸ Chayraykum Israelpa mirayninkunapa piwi wawa-churinkunapa rantinpi Leví ayllukunataña akllakurqani.

¹⁹ Ñoqam Leví ayllukunata Israelpa mirayninkunamanta regalota hina Aaronman chaynataq churinkunaman qoni. Paykunataqa qoni Israelpa mirayninkunapa rantinpi asuykuwanaykichik carpapi serviwanankupaqmi. Chaynata ruwaptinkum Israelpa mirayninkunapa huchanta pampachasaq. Chaynapim Israelpa mirayninkunaqa santuarioyman mana asuykunqakuchu, chaynapi peste onqoy paykuna ukupi mana kananpaq, nispa.

²⁰ Moiseswan Aaronmi Israelpa llapa-llan mirayninkunapiwan tukuy chaykunata Leví ayllukunawan ruwarqaku, ruwarqakuqa imaynam Moisesman Tayta Diospa kamachisqanman hinam.

²¹ Chaynapim Leví ayllukunaqa chuyanchakuspa pachankutapas taqsakurqaku, hinaptinmi Aaronñataq ofrendata hina Tayta Diospaq sapaqcharqa, hinaspam huchanku pampachasqa kananpaq sacrificiota ruwarqa.

²² Chaymantañam Leví ayllukunaqa Diosman asuykuna carpaman yaykurqaku, chaynapi Aaronpa hinaspa churinkunapa qayllanpi servikunankupaq. Chaynatam Leví ayllukunawan ruwarqaku, imaynam Moisesman Tayta Diospa kamachisqanman hina.

Leví ayllukuna hayka watam llamkanankumanta

²³ Moisestam Tayta Dios nirqa:

²⁴ Leví ayllukunaqa iskay chunka pichqayuq watanmanta hanaymanmi asuykuwanaykichik carpapi imam ruwanankupi serviwanankupaq yaykunqaku.

²⁵ Pichqa chunka watankumantam ichaqa serviwanankumanta samakunqakuña, manañam mastaqa servikunqakuchu.

²⁶ Chaywanpas asuykuwanaykichik carpapiqa llamkanmankuraqmi Leví ayllumasinkuta yanapaspanku, ichaqa amañam imam ruwanankutaqa ruwanqakuñachu. Chaynatam Leví aylluta serviwanankupaq kamachinki, nispa.