Números 5 - CHUYA QELLQA La Biblia en Quechua de Ayacucho 2012

Diosman mana asuykunanpaq hina kaqkunamanta

¹ Moisestam Tayta Dios nirqa:

² Israelpa mirayninkunata kamachiy, leprawan onqoqkunata, qeya ispaywan onqoq qarikunata, wañuqpa ayan llapcharuqkunata campamentomanta qarqonankupaq.

³ Qaritapas warmitapas millakuypaq kaqkunataqa campamentomanta qarqoychik, chaynapi ñoqapa yachanay campamento mana qachachasqa kananpaq, nispa.

⁴ Chaymi Israelpa mirayninkunaqa, Moisesman Tayta Diospa kamachisqanman hina ruwaspanku, chayna runakunata campamentonmanta hawaman chaylla qarqorurqaku.

Runamasinkupa contranpi huchallikuspanku imaynam ruwanankumanta

^5-6 Israelpa mirayninkunaman ninanpaqmi Moisesta Tayta Dios kaynata nirqa: Qaripas otaq warmipas ñoqa Tayta Diosta qepanchawaspa runamasinpa contranpi ima mana allintapas ruwaspaqa huchayuqmi kanqa.

⁷ Huchanta willakuspam runamasinpa contranpi mana allin ruwasqanmanta pagapunqa; ichaqa pagasqanmanmi yapanqa pagasqanpa pichqa parteman rakisqapa huknin partenta.

⁸ Chay ruwasqanmanta qopunanpaq mana pipas reclamaq kaptinqa, ñoqa Tayta Diospaqñam sacerdoteman qonqa. Hucha pampachanapaq carnero ofrendatapas qowanqataqmi, chayta sacerdote ofrecewaptinmi chay mana allin ruwasqanmanta pampachasaq.

⁹ Tukuy imakunamantapas Israelpa mirayninkuna ñoqapaq sapaqchapuwasqankuqa sacerdotepaqmi kanqa.

¹⁰ Ñoqapaq sapaqchaspa sacerdoteman apasqanku ofrendakunaqa sacerdotepaqmi kanqa, nispa.

Warminta qosan celosaptin imaynam ruwanankumanta

^11-12 Israelpa mirayninkunaman ninanpaqmi Moisesta Tayta Dios kaynata nirqa: Sichum hukkaqnin warmi hukwan waqllikuruspan qosanta saqerunman,

¹³ otaq qosanpa mana yachasqanta hukkaqnin qariwan puñurunman, ichaqa huchallikusqanta mana pipas rikunmanchu, otaq mana pipas tariruptinqa,

¹⁴ qosanmi chay warminta celosanman, celosanmantaqmi mana cheqapta huchallikuchkaptinpas.

¹⁵ Chaynaqa, imayna kaptinpas, chay runam warminta sacerdoteman pusanqa, hinaspam warminrayku iskay kilo cebada kutata apanqa, ichaqa amam aceiteta tallinqachu nitaqmi inciensotapas hinanqachu. Chay ofrendaqa celosmanta kawsay ofrendam, hinaspapas mana allin ruwasqanmanta yuyarichina ofrendam.

¹⁶ Sacerdotem chay warmita asuykachimunqa ñoqa Tayta Diospa qayllayman.

¹⁷ Chaymantam allpamanta vasopi ñoqapaq sapaqchasqa yakuta wisispa santuario ukupi allpata hoqarispa chayman chaqrunqa.

¹⁸ Sacerdotem chay warmita ñoqa Tayta Diospa qayllaypi sayaykachispan chukcha watakusqanta paskarunqa, hinaspam hapiykachinqa celosrayku hucha yuyarina kawsaykunamanta ofrendata. Sacerdotepa makinpiñataqmi ñakay apamuq qatqe yaku kanqa.

¹⁹ Sacerdoteñataqmi jurachispan ninqa: “Sichum huk runawan mana huchallikurqankichu hinaspa manataq qosaykitapas traicionarqankichu, nitaq piwanpas millakuypaq kaqtaqa ruwarqankichu, hinaptinqa ñakay apamuq kay qatqe yakuta tomaptikim mana imapas pasasunkichu.

²⁰ Sichum qosaykita traicionaspa millakuypaq kaqta ruwarqanki otaq hukwan kakurqanki hinaptinqa

²¹ Tayta Diosyá runamasikikunapa ñakasqanta ruwasunki, mana wachakuyta atiptikim wiksaykipas punkirunqa.

²² Ñakay apamuq yakuta tomaruptikim castigo qanman chayasunki”, nispa. Hinaptinmi chay warmiñataq ninqa: “Nisqaykiman hinayá kachun”, nispa.

²³ Chaymantam kay ñakaykunata sacerdote qellqaspan qatqe yakuwan mayllanqa.

²⁴ Hinaspam chay warmiman ñakay apamuq qatqe yakuta tomachinqa, chaynapi ukunta qatqeyarachinanpaq.

²⁵ Chaymantam sacerdoteqa, chay war-mimanta celosrayku kawsay ofrendata chaskinqa. Chay ofrendatam ñoqa Tayta Diospa qayllaypi sacerdote kuyuchispan altarpi ofrecewanqa.

²⁶ Hucha yuyarinapaq kawsay ofrendamantam sacerdote huk aptayta altarpi kañapuwanqa. Chaymantam chay warmiman qatqe yakuta tomachinqa.

²⁷ Sichum chay warmi qosanta traicionaruptinqa ñakay apamuq yakum warmipa ukunta qatqenqa, mana wachakuyta atiptinmi wiksanpas piernanpas punkipakurunqa. Hinaptinmi chay warmiqa llaqta qawananpaq ñakasqa kanqa.

²⁸ Sichum chay warmi mana millakuypaq kaqta ruwaspa inocente kaptinmi ichaqa wawankunapas kanqa.

²⁹ Celosmanta kamachikuyniymi kay: Pi warmipas qosanta traicionaspan millakuypaq kaqta ruwaptinqa,

³⁰ otaq yanqamanta warminta qosan celosaptinqa, chay warmitam ñoqa Tayta Diospa qayllaypi sayachinqa, hinaptinmi sacerdoteñataq tukuy kay yachachikuykunaman hina ruwanqa.

³¹ Warminpa imapas hucha ruwasqanmantaqa qosanqa mana huchayuqmi kanqa, chay warmim ichaqa mana allinta ruwaspa huchallikusqanmanta ñakarinqa.