Números 22 - CHUYA QELLQA La Biblia en Quechua de Ayacucho 2012

Balaamta rey Balac qayachimusqanmanta

¹ Chaymanta lloqsispankum Moab law pampakunapi Israelpa mirayninkuna samarurqaku, chay pampakunaqa kachkan Jordán mayupa waklawninpim hinaspa Jericó llaqtapa chimpanpim.

² Amorreokunapa contranpi Israelpa mirayninkuna tukuy ima ruwasqankutam Ziporpa churin rey Balac yacharurqa.

³ Moabitakunapas Israelpa mirayninkuna achkallaña kasqankuraykum anchallataña mancharikurqaku.

⁴ Chaymi moabitakunaqa Madianpi ancianokunata nirqaku: Pastota toro mikuchkaq hinachá kay runakunaqa muyuriqninchikpi tukuy imanchiktapas tukurunqaku, nispanku. Chay tiempopiqa Ziporpa churin Balacmi Moab nacionpa reynin karqa.

⁵ Chayraykum payqa Beorpa churin Balaamman kacharqa. Balaamqa Eu-frates mayupa hichpan Amav law Petor llaqtapim yacharqa. Rey Balacmi runankunata kacharqa Balamman kaynata nimunankupaq: Egipto nacionmantam allpapas tapaykuq runakuna lloqsiramunku, hinaspam hichpallaypiña kachkanku.

⁶ Chaylla hamuspa kay runakunata ñakaykapuway, paykunaqa ñoqamanta aswan atiyniyuq runakunam. Ñakaykuptikiqa ichapas ven-ceruspay allpaymanta qarqoruyman. Ñoqaqa yachanim pitapas bendeciptikiqa bendecisqa kasqanta chaynataq ñakaykuptikipas ñakasqa kasqanta, nispa.

⁷ Chaynapim Moab nacionniyuq ancianokuna chaynataq Madián ancianonkuna Balaamman adivinaqpa pagonta aparikuspanku pasarqaku. Balaampa kasqanman chayaruspankum rey Balacpa kunasqanta willarqaku.

⁸ Balaamñataqmi paykunata nirqa: Kunan tutayá kaypi samaychik. Tayta Diospa imam niwasqanta paqarin willa-naypaq, nispa. Chaynapim Moab nacionmanta riq ancianokunaqa Balaampa wasinpi samarurqaku.

⁹ Ichaqa Diosmi Balaamman rikuriykuspan nirqa: ¿Pikunataq kay samakuqkunaqa? nispa.

¹⁰ Chaymi Tayta Diosta Balaam nirqa: Moab nacionpa reynin Ziporpa churin Balacmi kaynata kunamuwasqa:

¹¹ “Egipto nacionmantam allpapas tapaykuq runakuna lloqsiramun chaynaqa hamuspayki ñakaykapuway, icharaqpas contrankupi peleaspay qarqoruyman”, nispa.

¹² Hinaptinmi Balaamta Tayta Dios nirqa: Paykunawanqa ama riychu, amataq chay runakunatapas ñakamuychu. Paykunaqa ñoqapa bendecisqay runaykunam, nispa.

¹³ Achikyaruptinmi rey Balacpa kachamusqan kamachikuqkunata Balaam nirqa: Llaqtaykichikman kutikuychik, Tayta Diosmi mana munanchu qamkunawan rinayta, nispa.

¹⁴ Moab nacionpi kamachikuqkunañataqmi kutiruspanku rey Balacta nirqaku: Balaamqa manam ñoqaykuwan hamuyta munanchu, nispa.

¹⁵ Ichaqa rey Balacmi yapamanta achka hinaspa ancha reqsisqa kamachikuqkunataña kacharqa.

¹⁶ Chaymi Balaampa kasqanman chayaruspanku Ziporpa churin rey Balacpa kunasqanta nirqaku: Ama hina kaspayki chaylla hamuy,

¹⁷ ñoqaqa ancha reqsisqatam ruwasqayki, imam mañawasqaykitam ruwasaq. Hamuspayki kay runakunata ñakay-kapuway, nispanku.

¹⁸ Ichaqa Balaammi kaynata nirqa: Yachasqan palacio huntataña qorita, qollqeta rey Balac qowaptinpas Tayta Diospa kamachiwasqanpa contranpiqa manam imatapas ruwaymanchu.

¹⁹ Chaywanpas ama hina kaspayá kunan tuta kaypi samakuychik, imatawanraqsi Tayta Dios niwanqa, nispa.

²⁰ Chay tutam Balaamman Tayta Dios rikuriykuspan nirqa: Chay runakuna pusaqniki hamuptinqa riyá, ichaqa ñoqapa nisqallaytam ruwanki, nispa.

Diospa angelninwan Balaam tuparusqanmanta

²¹ Achikyaruptinmi Balaamqa china asnonpi sillakuykuspan Moabpi kamachikuqkunawan rirqa.

²² Ichaqa Tayta Diosmi Balaampa risqanwan piñakururqa. Chaymi Tayta Diospa angelnin ñawpaqninpi sayaruspa harkarurqa. Chayqa pasakurqa iskay serviqninkunawan compañachikuspa china asnonpi sillada richkaptinmi.

²³ Asnonqa Tayta Diospa angelninta ñanpi espadan hapirisqata rikuruspan ñanmanta muyuruspan llutannintaña rirqa, chaymi Balaamqa asnonta ñanman kutinanpaq maqarqa.

²⁴ Ichaqa Tayta Diospa angelninmi cercosqa uvas chakrakunapa chawpinta riq kichki ñanpi sayarurqa.

²⁵ Chay asnom huktawan angelta rikuruspan perqa kuchuman qemikuruspan Balaampa chakinta perqaman qemirurqa, chaymi Balaamqa huktawan asnonta maqarqa.

²⁶ Ichaqa Tayta Diospa angelninmi ñawparuspan manaña pasay atina kichki ñanpi sayarurqa.

²⁷ Hinaptinmi chay asnoqa Tayta Diospa angelninta rikurusqanrayku pampaman laqakururqa. Chaymi Balaam piñakuruspan tawnanwan asnonta waqtaparurqa.

²⁸ Chaymi asnota Tayta Dios rimarirachiptin Balaamta chay asno nirqa: ¿Imanarqaykitaq kimsakamaña maqawanaykipaq? nispa.

²⁹ Chaymi Balaam nirqa: Burlakuwasqaykiraykum maqayki, makiypi espada kaptinqa kunallanmi wañurachikiman, nispa.

³⁰ Hinaptinmi Balaamta asnon nirqa: ¿Manachum ñoqaqa asnoyki kani? Ñoqaqa sillakunayki asnoykim kani, unayñam ñoqaqa apaykachayki manam huk kutillatapas kaynataqa ruwarqaykichu, nispa. Hinaptinmi Balaam nirqa: Arí chaynam, nispa.

³¹ Chaymi Balaampa ñawinta Tayta Dios kichaykurqa, hinaptinmi Diospa angelninta espadan hapikusqata ñanpi sayachkaqta rikururqa. Chaymi Balaam pampakama kumuykurqa.

³² Hinaptinmi Tayta Diospa angelnin nirqa: ¿Imanasqataq kimsakamaña asnoykita maqaparunki? Ñoqaqa qamta harkanaypaqmi hamurqani, manam allinchu Moabman riynikiqa.

³³ Asnoqa rikuruwaspanmi ñawpaqniymanta kimsa kutikama muyururqa, mana chaynata ruwaptinqa wañurachikimanñam karqa, asnoykitam ichaqa mana wañuchiymanchu karqa, nispa.

³⁴ Hinaptinmi Tayta Diospa angelninta Balaam nirqa: Huchallikurunim. Ñanpi sayaruspa harkawasqaykitaqa manam yacharqanichu, mana allinpaq rikchakapusuptikiqa kutikusaq, nispa.

³⁵ Ichaqa Tayta Diospa angelninmi Balaamta nirqa: Hinata chay runakunawan riy, ichaqa ñoqapa nisqallaytam rimanki, nispa. Chaymi Balaamqa rey Balacpa kachamusqan runakunawan rirqa.

Balaamta rey Balac chaskisqanmanta

³⁶ Balaampa hamusqanta rey Balac yacharuspanmi Moab nacionpa patanpi llaqtakama chaskiqnin lloqsirqa. Chay llaqtaqa kachkan Arnón mayupa hichpanpim.

³⁷ Hinaspanmi Balaamta rey Balac nirqa: ¿Manachu ñoqa qamtaqa qayachimurqayki? ¿Imanasqataq mana hamuyta munarqankichu? ¿Manachum ñoqaqa llumpay reqsisqata ruwaykiman karqa? nispa.

³⁸ Hinaptinmi rey Balacta Balaam nirqa: Arí, qawaykuqnikim hamurqani. Aswanqa manam munasqaytachu rimasaq, Diospa rimachiwasqallantam, nispa.

³⁹ Chaymantam rey Balacwan Balaam rispa Quiriat-huzot llaqtaman chayarurqaku.

⁴⁰ Chaypim toronkunatawan ovejankunata rey Balac nakachirqa Balaammanwan riysiqnin kamachikuqkunaman convidananpaq.

⁴¹ Paqarinnintintam Balaamta Bamot-baal moqoman rey Balac pusarqa. Chaymantam Israelpa mirayninkunapa campamentonpa patallanta qawarirqaku.