Números 21 - CHUYA QELLQA La Biblia en Quechua de Ayacucho 2012

Arad llaqtata vencerusqankumanta

¹ Canaán lawpi Arad llaqtapa reyninmi, Neguev lawpi yacharqa. Paymi uyarirurqa Israelpa mirayninkuna Atarimman riq ñanninta hamusqankuta, chaymi paykunawan peleaspan wakinta presocharurqa.

² Hinaptinmi Israelpa mirayninkunañataq Tayta Diosman prometekuspanku nirqaku: Kay runakunata vencerachiwaptikikuqa llapallan llaqtankutam purmarachisaqku, nispanku.

³ Chaymi Israel miraykunapa mañakusqanta Tayta Dios uyarispan yanapaykuptin cananeokunata venceruspanku llaqtankutapas purmarachirqaku. Chay-raykum chay sitiota Horma nispa suti-charqaku.

Broncemanta maqta uruta ruwasqanmanta

⁴ Hor orqomantam Israel runakuna Puka lamar qocha lawman lloqsirqaku Edom nacionta muyunankupaq. Runakunañataqmi ñan risqankupi hukmanyarurqaku.

⁵ Hinaspam Diospa contranpi chaynataq Moisespa contranpi rimaspa nirqaku: ¿Imapaqtaq Egipto nacionmanta hurqomuwarqankiku kay chunniqpi wañunaykupaq? Mikuypas yakupas manam kanchu. Maná sutiyuq mikuytapas amirunikuñam, nispanku.

⁶ Chaymi venenoyuq maqta urukunata Tayta Dios kachaykamurqa; chay maqta urukuna kachuptinmi Israelpa mirayninkunaqa achkaq wañurqaku.

⁷ Hinaptinmi Moisesman rispanku llapa runakuna nirqaku: Tayta Diospa chaynataq qampa contraykipi rimaspam huchallikuruniku. Chaynaqa, Diostayá mañakuy kay maqta urukunata ñoqaykumanta chinkachinanpaq, nispanku. Chaymi Tayta Diosta llapa runakunapaq Moisés mañakurqa.

⁸ Hinaptinmi Moisesta Tayta Dios nirqa: Maqta uruta ruwaspa kaspiman churay, chaynapim maqta urupa kachusqankuna chayta qawaspanku mana wañunqakuchu, nispa.

⁹ Moisesmi broncemanta maqta uruta ruwaruspan kaspiman churarurqa. Hinap-tinmi maqta urupa kachusqan runakuna, broncemanta maqta uruta qawaspanku mana wañuqkuchu.

Moab nacionta muyusqankumanta

¹⁰ Chaymanta lloqsispankum Israelpa mirayninkuna Obot lawpi campamen-tonkuta sayachirqaku.

¹¹ Obot lawmanta pasaspankum Ije-abarim chunniqpi samarurqaku, chayqa kachkan Moab nacionpa intipa qespimunan lawninpim

¹² Chaymanta lloqsispankum Zered wayqopi samarurqaku.

¹³ Chay wayqomanta pasaspankum Arnón mayupa waklawninpi samarurqaku. Chay mayum amorreokunapa allpanpa chunniq lawninmanta lloqsimuspan amorreokunapa allpanta moabitakunapa allpanmanta rakinan.

¹⁴ Chayraykum “Tayta Diospa Guerrankuna” nispa sutichasqa libropi nichkan: “Sufá llaqtapi Vaheb lawnintam pasarqaniku, wayqonkunatawan Arnón mayupa patantam rirqaniku.

¹⁵ Ar lawman riq mayu patantam rirqaniku, Moabpa linderontam pasarqaniku”, nispa.

¹⁶ Arnón mayumantam Beer sutiyuq pozokama rirqaku, chay pozopa kasqanpim Moisesta Tayta Dios nirqa: Yakuta qonaypaq runakunata huñumuy, nispa.

¹⁷ Chayraykum Israelpa mirayninkuna kaynata takirqaku: Pozomanta yaku lloqsimuchun. Pozomanta takisun.

¹⁸ Kamachikuqkunam varankuwan toqorqaku, kamachiqkunam tawnankuwan kicharqaku, nispa. Chay chunniqmantam Israelpa mirayninkuna Matana lawkama rirqaku.

¹⁹ Chaymantam Nahaliel lawkama rispa Bamot lawkama chayarurqaku.

²⁰ Bamotmantam Moab nacionpi qechwa pampakama rispa Pisga orqopa puntanman chayarurqaku; chaymantam tukuy hinastin chunniqkuna rikukun.

Rey Sehonta vencesqankumanta

²¹ Israelpa mirayninkunam amorreokunapa reynin Sehonman kachaspan kaynata nichimurqaku:

²² Ama hina kaspa allpayki chawpinta pasarachiwayku. Manam tarpusqa chakra ukuntachu nitaq uvas huertantachu risaqku, manataqmi pozoykipi yakutapas tomasaqkuchu. Allpaykita pasarunaykukamam hatun ñanllanta risaqku, nispanku.

²³ Rey Sehonmi ichaqa mana munarqachu allpanpa chawpinta Israelpa mirayninkuna pasananta, chaymi llapallan tropankunata huñuruspan chunniqman lloqsirqa, hinaspam Jahaza llaqtakama chayaruspan Israelpa mirayninkunapa contranpi pelearqa.

²⁴ Ichaqa Israelpa mirayninkunam kutichikuspanku vencerurqaku, hinaspam Arnón mayumanta qallaykuspa Jaboc mayukama otaq amonitakunapa allpanpa tukupayninkama hapikuykurqaku; amonitakunapa linderonqa mana pasay atinam karqa.

²⁵ Chaynatam Israelpa mirayninkuna amorreokunapa Hesbón llaqtata chaynallataq wakiq llaqtakunatapas hapikuykuspanku chaypi yachakurqaku.

²⁶ Hesbón llaqtaqa karqa amorreokunapa reynin Sehonpa yachananmi. Rey Sehonqa moabitakunapa ñawpaq reyninta venceruspam allpantapas Arnón mayukama qechururqa.

²⁷ Chayraykum takiqkunapas kaynata takiqku: Rey Sehonpa tiyanan Hesbón llaqtaman hamuychik, yapamanta hatarichispa murallankunata perqaychik.

²⁸ Hesbón llaqtamantam nina lloqsirqa, Sehonpa llaqtanmantam lenwachkaq nina lloqsirqa; Moab nacionpim Ar llaqtata kañarurqa, Arnonpi yachaq runakunatam ruparurqa.

²⁹ ¡Ay, Moab runakuna, Quemos idolopa runankuna! Chinkachisqañam kachkankichik. Quemos idolom qari churikichiktapas lluptirachin, Quemos idolom warmi churikichiktapas presocharachin. Amorreokunapa reynin Sehonwanmi chaynata ruwarachin.

³⁰ Paykunatam vencerurqaniku, Hesbón llaqtamantam Dibón llaqtakama purmarachirqaniku. Nofa llaqtamantam Medeba llaqtakama, ninawan kañaykurqaniku, nispanku.

Basanpa reyninta vencesqankumanta

³¹ Chaynapim Israelpa mirayninkuna amorreokunapa allpanpi yacharqa-ku.

³² Moisesmi Jezer llaqtata qawamunankupaq kacharqa. Chaymi Israelpa mirayninkuna chay llaqtapa taksa llaqtankunatawan kuskata hapikuykuspanku, chaypi yachaq amorreokunata qarqorurqaku.

³³ Chaymantam Basán lawman kutichkaptinku Basán nacionpa reynin Og llapallan tropankunapiwan lloqsimurqa Edrei lawpi Israelpa mirayninkunawan peleananpaq.

³⁴ Hinaptinmi Moisesta Tayta Dios nirqa: Ama manchakuychu, chay reytaqa runantinkunatam qanman qoykusqayki. Hesbón llaqtapi yachaq amorreokunapa reynin Sehonta hinam rey Ogtapas ruwanki, nispa.

³⁵ Chaynapim rey Ogta, churinkunata chaynataq llapallan runankunatapas wañurachirqaku. Manam pitapas puchurqakuchu, hinaspam allpankutapas hapikuykurqaku.