Números 19 - CHUYA QELLQA La Biblia en Quechua de Ayacucho 2012

Millakuypaq rikuriruspa imaynam chuyanchakunankumanta

¹ Moisestawan Aarontam Tayta Dios kaynata nirqa:

² Ñoqa Tayta Diosmi kaynata kamachini: Israelpa mirayninkunata niy sumaqnin sano puka vacata apamunankupaq, chay vacaqa mana haykapipas yugo churkusqam kanan.

³ Chay vacatam sacerdote Eleazarman qonkichik, payñataqmi campamentopa waklawninman pusachispan qayllanpi nakachinqa.

⁴ Sacerdote Eleazarñataqmi chay vacapa yawarninman dedonta challpuspan ñoqaman asuykamuwanaykichik carpa lawman qanchis kutikama challanqa.

⁵ Chaymantam hina Eleazarpa qayllanpi chay vacata kañanqaku. Qarantapas, aychantapas, yawarnintapas chaynataq akantapas lliwtam kañanqaku.

⁶ Eleazarñataqmi cedro kaspita, hisopopa kallmanta chaynataq guindo qaytuta hapiykuspan chay vaca kañasqankuman wischuykunqa.

⁷ Chay sacerdotem pachankunata taqsakuspan kikinpas bañakunqa, hinaspañam campamentoman kutiykunqa. Payqa tutaykunankamam millakuypaq kanqa.

⁸ Vacata kañaqpas pachankunata taqsaspanmi kikinpas bañakunqa. Paypas tutaykunankamam millakuypaq kanqa.

⁹ Chaypaq sapaqchasqa runam kañasqanku vacapa uchpanta huñuykuspan campamentomanta hawaman chaypaq akllasqa sitiopi churamunqa. Chay uchpatam Israelpa mirayninkuna waqaychanqaku, chaynapi yakuman polvospa chaywan chuyanchakunankupaq. Chayqa hucha pampachana ofrendam.

¹⁰ Uchpa hoqariqpas pachankunatam taqsakunqa, hinaspam tutaykunankama millakuypaq kanqa. Chayqa wiñaypaq kamachikuymi Israelpa mirayninkunapaq chaynataq qamkunawan yachaq huklaw llaqtayuqkunapaqpas kanqa.

¹¹ Wañusqa runapa ayanta llapchaq runaqa qanchis punchawmi millakuypaq kanqa.

¹² Kimsa kaq punchawpim chuyanchakuna yakuwan chuyanchakunqa hinaspam qanchis kaq punchawpi chuya kanqa. Sichum kimsa kaq punchawpi chaynataq qanchis kaq punchawpipas mana chuyanchakuspaqa millakuypaqmi kanqa.

¹³ Pipas wañusqa runapa ayanta llapcharuchkaspa mana chuyanchakuqqa ñoqa Tayta Diospa carpaytam millakuypaqta ruwachkan. Chayna runaqa Israel ukumantam chinkachisqa kanqa. Payqa chuyanchana yakuwan mana challachikusqanraykum hina millakuypaq kanqa.

¹⁴ Pipas carpallanpi wañuruptinqa kay kamachikuyman hinam ruwankichik: Wañuqpa kasqan carpapi tarikuqkunapas chaynataq yaykuqkunapas qanchis punchawpunim millakuypaq kanqaku.

¹⁵ Kicharayaq mankakunapas otaq tapanwan mana sumaq tapasqa mankakunapas millakuypaqmi kanqa.

¹⁶ Pipas chaychaypi kachkaspan, espadawan wañuchisqa runapa ayanta, kikillanmanta wañuruqpa ayanta, ayapa tullunta otaq sepulturanta llapcharuq runaqa qanchis punchawmi millakuypaq kanqa.

¹⁷ Chay millakuypaq runata chuyanchanankupaqqa, wañuchisqa vacapa uchpanta mankaman polvospam chayman chayraq wisimusqa yakuta tallinqaku.

¹⁸ Chaymantam chuyanchasqa runa hisopopa kallmanta hapiykuspan chay yakuman challpuspan chaywan chay runapa yachanan carpata challanqa; challanqataqmi chay carpapi servicionkunamanwan chaypi yachaq runakunamanpas chaynataq tulluta, wañuchisqapa ayanta, kikillanmanta wañuqpa ayanta otaq sepulturata llapcharuq runamanpas.

¹⁹ Chuya kaq runam kimsa kaq punchawpi chaynataq qanchis kaq punchawpi chay millakuypaq kaq runaman challanqa. Qanchis kaq punchawpi chuyancharuptinmi pachankunata taqsakuspan bañakunqa. Ichaqa tutaykunankamam millakuypaq kanqa.

²⁰ Millakuypaq kachkaspa mana chuyanchakuq runaqa, ñoqaman asuykamuwanaykichik carpata qachachasqanraykum llaqtamanta chinkachisqa kanqa. Chuyanchana yakuwan mana challachikusqanraykum payqa millakuypaq kanqa.

²¹ Chayqa wiñaypaq kamachikuymi kanqa. Chuyanchana yakuwan challaq runapas pachankunatam taqsakunqa. Pipas chuyanchana yakuta llapchaq runaqa tutaykuqkamam millakuypaq kanqa.

²² Millakuypaq kaq runapa imapas llapchasqanqa millakuypaqmi kanqa, millakuypaq kaq runata llapchaqpas tutaykunankamam millakuypaq kanqa, nispa.