Números 16 - CHUYA QELLQA La Biblia en Quechua de Ayacucho 2012

Moisespa contranpi Coré sayarisqanmanta

¹ Izharpa churin Coreymi Moisespa contranpi runakunata umacharqa. Coreyqa karqa Leví ayllumanta Coatpa willkanmi. Coreywan kuskataqmi umacharqaku Rubén ayllumanta kaq Eliabpa churin Datanwan Abirampas chaynataq Peletpa churin On sutiyuq runapas.

² Paykunam Israelpa mirayninkunamanta iskay pachak pichqa chunka kamachikuqkunawan Moisespa contranpi hatarirurqaku. Chay runakunaqa ancha reqsisqa runakunam karqaku.

³ Paykunam huñunakuruspanku Moisespa hinaspa Aaronpa contranpi kaynata nirqaku: ¡Qamkunapa munaychakuynikichikqa kaykamallayá kachun! Diosqa kay runakunataqa llapallantam sapaqcharqa, Tayta Diospas llapanchikwanmi kachkan. ¿Chaynaqa, imanasqataq qamkunalla Tayta Diospa llaqtanpi munaychakuchkankichik? nispanku.

⁴ Chayta uyariruspanmi Moisesqa qonqoranpa pampaman kumuykurqa.

⁵ Hinaspam Coreytawan hamuqmasinkunata nirqa: Paqarinmi Tayta Dios, pim paypa kasqanta hinaspa pim paypaq sapaqchasqa kasqantapas qawachiwasunchik. Tayta Diosqa akllakusqan runallatam kikinmanqa asuykachinqa.

⁶ Chaynaqa, Coré, paqarinmi hamuqmasikikunapiwan incienso qontichinaykichikta apamunkichik,

⁷ hinaspam sansatawan inciensota chay qontichinaykichikman Tayta Diospa qayllanpi churankichik. Tayta Diospa akllakusqan kaqmi kanqa paypa sapaqchakusqan runaqa. Chaynaqa, Leví ayllu runakuna, ¡upallaruychikña! nispa.

⁸ Chaymantam Coreyta Moisés nirqa: Leviypa mirayninkuna uyariykuwaychik:

⁹ Diosman asuykuna carpapi servikuspa Tayta Diospa qayllanpi Israelpa mirayninkunata servinaykichikpaqmi paykunamanta akllasurqankichik. ¿Chaytachu qamkuna yanqapaq hapinkichik?

¹⁰ Qamtawan wawqekikunatam, Leví ayllumanta kasqaykichikrayku Tayta Diosqa qayllanman asuykachisurqankichik. ¿Hinaptinchum sacerdote kaytaraq munachkankichik?

¹¹ ¿Pitaq Aaronqa karqa paypa contranpi rimanaykichikpaq? Qamqa llapallan hamuqmasikikunawanmi Tayta Diospa contranpi hatarirunkichik, nispa.

¹² Moisesqa qayachirqataqmi Eliabpa churin Datantawan Abiramtapas. Ichaqa paykunam nirqaku: Ñoqaykuqa manam hamusaqkuchu.

¹³ ¿Yanqapaqchu rikchakapusunki tukuy imapapas kanan Egipto nacionmanta pusaramuwaspaykiku kay chunniqpi wañurachiwaynikiku? ¿Kamachikuq hinachu ñoqaykupi munaychakuyta munanki?

¹⁴ ¿Maytaq chay tukuy imapa kanan chaynataq tukuy imapa qespinan allpa? ¿Haykapitaq chakrakunatapas hinaspa uvas huertakunatapas qowankiku? ¿Ñawsakunata hinachu llapallaykuta pusaykachawankiku? ¡Manam qayllaykimanqa hamusaqkuchu! nispa.

¹⁵ Hinaptinmi Moisesqa anchata piñakuruspan Tayta Diosta nirqa: Ofrendankutapas ama chaskiychu, paykunapataqa manam asnollankutapas hapikuykurqanichu, nitaqmi paykunataqa imanarqanipaschu, nispa.

¹⁶ Chaymantam Coreyta Moisés nirqa: Paqarinmi llapallan runaykikunapiwan Tayta Diosman asuykunkichik. Aaronpas chaypim kanqa.

¹⁷ Sapakama qontichinaykichikta apaspaykichikmi chayman inciensota hinankichik, qampas chaynataq Aaronpas qontichinantin rispam chay iskay pachak pichqa chunka runakunawan kuska Tayta Diospa qayllanman qontichinaykichikta churankichik, nispa.

¹⁸ Chaymi sapakama qontichinankuman sansatawan inciensota hinaykuspanku, Diosman asuykuna carpapa punkunpi sayarqaku. Paykunawantaqmi Moiseswan Aaronpas karqaku.

¹⁹ Coreymi Moisespa chaynataq Aaronpa contranpi llaqtata huñuramurqa Diosman asuykuna carpapa punkunman, hinaptinmi Diospa atiynin llapallan chaypi huñunasqa runakunaman rikuriykurqa.

²⁰ Hinaspam Moisestawan Aaronta Tayta Dios nirqa:

²¹ ¡Kay runakunamanta asurikuychik, kunallanmi wañurachisaq! nispa.

²² Chaymi Moiseswan Aaronñataq qonqoranpa pampaman kumuykuspa nirqaku: Dios Taytallayku, runakuna kawsachiq Dios, ¿chulla runapa huchallanmantachu llapa runakunapaq piñakurunki? nispanku.

²³ Hinaptinmi Moisesta Tayta Dios nirqa:

²⁴ Israelpa mirayninkunata niy, Coreypa, Datanpa hinaspa Abirampa kasqanku carpamanta asurikunankupaq, nispa.

²⁵ Chaymi Moisesqa hatarispan wakin ancianokunawan kuska Datanpa chaynataq Abirampa kasqanman rirqaku.

²⁶ Hinaspam chaypi runakunata nirqa: Kay mana allin ruwaq runakunapa carpanmanta asurikuychik, ama imankutapas hapiychikchu, yanqañataq paykunapa huchanmanta qamkunapas wañuruwaqchik, nispa.

²⁷ Chaymi Coreypa, Datanpa hinaspa Abirampa carpanpa muyuriqninmanta runakuna asurikururqaku. Datanwan Abiramñataqmi carpankupa punkunman lloqsiramuspa warminkupiwan hinaspa lliw churinkunapiwan chaypi sayarqaku.

²⁸ Hinaptinmi Moisés nirqa: Kunanmi yachankichik kaykunata ruwanaypaq Tayta Dios kamachimuwasqanta, manam kikillaymantachu kaykunataqa ruwani.

²⁹ Sichum kay runakuna allin wañukuyllata wañunqaku wakin runakunapa wañusqanta hinalla, hinaptinqa chaypim yachankichik Tayta Dios mana kachamuwasqanta.

³⁰ Sichum mancharikuypaq kaqta Tayta Dios ruwaspa paykunata allpapa sonqonman kawsachkaqllata wichiykachiptinmi ichaqa, yachankichik kay runakunaqa Tayta Diospa contranpi hatariq kasqankuta, nispa.

³¹ Chaykunata Moisés rimayta tukuruptillanmi, runakunapa sayasqanku allpa kicharikuykurqa.

³² Hinaspam Coreyta, ayllunkunata, tukuy kapuqninkunata chaynataq paywan kuska kaq llapallan runakunatapas millpururqa.

³³ Chaynapim paykunaqa uku pachaman kawsachkaqlla wichiykurqaku. Hinaptinmi allpa kaqllamanta wichqakururqa. Chaynapim paykunaqa Israelpa mirayninkunamanta chinkarurqaku.

³⁴ Allpa ukuman wichiqkunapa qapariyninta uyarispankum, chay muyuriqpi tarikuq Israel mirayninkuna ayqespa nirqaku: Yanqañataq ñoqanchiktapas allpa millpuruwachwanchik, nispanku.

³⁵ Tayta Diospa qayllanmanta nina rikuriramuspanñataqmi chay incienso qontichiq iskay pachak pichqa chunka runakunata ruparurqa.

^36-37 Aaronpa churin sacerdote Eleazarman ninanpaqmi Moisesta Tayta Dios kaynata nirqa: Kañasqakunapa chawpinmanta chay qontichinakunata hurqomuspa sansankunata karuman wischumuchun. Chay qontichinakunaqa ñoqapaq sapaqchasqam.

³⁸ Huchallikuruspa wañuq runakunapa qontichinankuqa, inciensota ñoqa Tayta Diosman ofrecemuwasqankuraykum chuyanchasqa kachkan. Chaynaqa, llaspayachispa chaywan altarpa hawanman laqachun, Israelpa mirayninkunapaq señal kananpaq, nispa.

³⁹ Hinaptinmi sacerdote Eleazar, chay kañarachikuq runakunapa broncemanta qontichinankuta huñuruspan llaspayachispa altarman laqarurqa,

⁴⁰ chayta qawaspa Israelpa mirayninkuna yuyarispanku pipas mana Aaronpa mirayninmanta kaspaqa Tayta Diosman inciensota ama ofrecenanpaq, chaynapi Coreywan runankuna hina mana wañurunankupaq. Chaymi Eleazar ruwarqa imaynam Moisesman Tayta Diospa kamachisqanman hina.

⁴¹ Paqarinnintinmi Israelpa mirayninkuna Moisespa chaynataq Aaronpa contranpi rimaspanku nirqaku: Qamkunam Tayta Diospa llaqtanta wañuchichkankichik, nispanku.

⁴² Moisespa chaynataq Aaronpa contranpi kaq runakuna muyuriqninkuman huñunakuruptinkum, Diosman asuykuna carpaman Moiseswan Aarón pasarqaku, hinaptinmi carpata puyu tapaykuptin Tayta Diospa atiynin rikuriykurqa.

⁴³ Moiseswan Aarón carpapa ñawpaqninman chayaruptinkum,

⁴⁴ Moisesta Tayta Dios nirqa:

⁴⁵ Kay runakunapa chawpinmanta asuriychik, kunallanmi paykunata wañuchisaq, nispa. Hinaptinmi paykuna qonqoranpa pampaman kumuykurqaku.

⁴⁶ Moisesmi Aaronta nirqa: Altarmanta sansata qontichinaman churaspa inciensota hinaspayki chaylla runakunapa kasqanman kallpaspa huchankuta pampachananpaq Tayta Diosta mañakamuy. Tayta Diosmi sinchita piñakurun, chaymi runakuna wañuyta qallaykunkuña, nispa.

⁴⁷ Hinaptinmi Aaronqa, Moisespa kamachisqanman hina, qontichinata hapispan runakunapa kasqanman kallparqa. Tayta Diospa piñakuyninñataqmi runakunata wañuchichkarqaña. Chaymi Aaronqa inciensota kañaspan Tayta Diosta mañakurqa runakunapa huchanta pampachananpaq.

⁴⁸ Chaymantam Aaronqa wañuqkunapa chaynataq kawsaqkunapa chawpinpi sayaykurqa, hinaptinmi chay wañuyqa chayraq tanirurqa.

⁴⁹ Chay punchawpim chunka tawayuq waranqa qanchis pachaknin runakuna wañururqaku. Coreywan wañuqkunaqa manam chay wañuqkunawan yupasqachu karqaku.

⁵⁰ Wañuy taniruptinmi Aarón kutirirqa Diosman asuykuna carpapa punkunpi Moisespa kasqanman.