Nehemías 9 - CHUYA QELLQA La Biblia en Quechua de Ayacucho 2012

Israel runakunapa mañakusqanmanta

¹ Hina chay killapa iskay chunka tawayuq punchawninpim, Israelpa mirayninkuna huñunakurqaku ayunanankupaq, hinaspam qachqa pachawan churakuspanku umankumanpas allpawan machqekurqaku.

² Huklaw llaqtayuqkunapa mirayninkunamanta rakikuspankum, kikinkupa huchankutawan ñawpaq taytankupa huchakunata willakurqaku.

³ Maymi kasqankupi sayachkaptinkum Tayta Diospa kamachikuynin librota kimsa horata leerqaku, kimsa horataqmi huchankutapas willakurqaku, hinaspankum Tayta Diosta yupaycharqaku.

⁴ Levitakunamanta Josueywan, Bani, Cadmiel, Sebanías, Buni, Serebías, Bani hinaspa Quenani, tabladilloman qespiruspanku kallpawan Tayta Diosta qayakurqaku.

⁵ Chay-mantam levitakunamanta Josueywan Cadmiel, Bani, Hasabnías, Serebías, Hodías, Seba-nías hinaspa Petaías, kaynata nirqaku: Hatarispa wiñaymanta wiñaykama yupaychasqanchik Tayta Diosta hatun-chaychik. Dios Taytallayku, tukuy imamantapas aswanqa sutikiyá hatunchasqa kachun.

⁶ Qam sapallaykim Diosqa kanki, cielokunatapas, chaskakunatapas, cielokunapa hawanpi kaqkunatapas, qanmi ruwarqanki; kay pachatawan chaypi kaqkunatapas, lamar qochakunatawan chaypi kaqkunatapas, qanmi ruwarqanki, qanmi tukuy chaykunata kawsachinki, chaymi hanaq pachapi kaqkuna yupaychasunki.

⁷ Dios Taytalláy, Abramta akllaykuq Diosmi kanki, Caldea lawpi Ur llaqtamantam hurqomurqanki, hinaspam Abrahamwan suticharqanki.

⁸ Qanmi allin sonqoyuq kasqanta qawaykurqanki, chaymi paywan huk pactota ruwarqanki, Canaán, Het, Amor, Ferez, Jebús hinaspa Gerges runakunapa allpanta, Abrahampa mirayninman qonaykipaq. ¡Huklla rimaq kasqaykiraykum imam nisqaykita cumplirqanki!

⁹ Egipto nacionpi imaynam taytaykupa ñakarisqantam qawarqanki, Puka lamar qochapa patanpi qayakusqankutam uyarirqanki.

¹⁰ Faraonpa hinaspa yanapaqninkunapa contranpim admirakuypaq hatun señalkunata ruwarqanki, Egipto runakuna llumpayta hatunchakuspa Israelpa mirayninkunata imam ruwasqantam yacharqanki, chaynapim sutikitapas ancha reqsisqata ruwarqanki, chaynam kunankamapas kachkan.

¹¹ Israelpa qayllanpim lamar qochata iskayman rakinarqanki, chaki allpantam paykunata pasachirqanki; qatimuqninku enemigonkunatam ichaqa, rumita wischuchkaq hinaraq uku-uku yakuman wischuykurqanki.

¹² Punchawmi sayanpa puyuwan pusarqanki, tutanñataqmi sayanpa ninawan pusarqanki, chaynatam rinanku ñanta achkirqanki.

¹³ Sinaí orqopa hawanmanmi uraykamurqanki, hanaq pachamantam paykunata rimapayamurqanki, reglamentoykikunatawan yachachikuynikikunatam qorqanki, estatutoykikunatawan allin kamachikuykunatam qorqanki.

¹⁴ Samana punchawnikita sapaqchanankupaqmi kamachirqanki, serviqniki Moisesnintakamam kamachikuykunata, decretokunata hinaspa yachachikuykunata qorqanki.

¹⁵ Yarqaymanta kaptinkum cielomanta mikuyta qomurqanki, yakumanta kaptinkum qaqamanta yakuta hurqomurqanki, prometesqayki allpaman yaykunankupaqmi kamachirqanki.

¹⁶ Paykunawan ñawpaq taytaykum ichaqa hatun tukuq rumi sonqo runakuna karqaku, chayraykum kamachikuynikikunata mana kasukurqakuchu.

¹⁷ Manam kasukuyta munarqakuchu, nitaqmi paykunapaq tukuy ima ruwasqaykitapas yuyarirqakuchu, contraykipi hatarispankum, Egipto nacionpi esclavo kayta munaspanku kutinankupaq kamachiqninkuta akllarqaku. Chaywanpas qamqa pampachakuq Diosmi kanki, llampu sonqo hinaspa kuyapayakuqmi kanki, anaqta piñakuq hinaspa kuyapayakuq kasqaykiraykum paykunataqa mana saqerurqankichu.

¹⁸ Qorita chulluchispa huk torillota ruwakuruspankum nirqaku: “Kaymi Egipto nacionmanta hurqomuwaqninchik diosqa” nispanku. Chaykunawanmi llumpayta piñachisurqanki.

¹⁹ Ichaqa qanmi kuyapayakuq kasqaykirayku paykunataqa chunniqpipas mana saqerurqankichu. Sayanpa puyum paykunamanta mana asurirqachu punchawpi ñanta pusananpaq, tutanpas chay sayanpa ninam paykunamanta mana asurirqachu rinanku ñanta kanchananpaq.

²⁰ Yachachinanpaqmi Espirituykita qorqanki, mikunankupaqpas mana pisiytam maná tantata qorqanki, yakumanta kaptinkupas mana pisiytam yakuta qorqanki.

²¹ Tawa chunka watam chunniqpi mikuchirqanki, manam imamantapas pisichirqankichu, pachankupas manam mawkayarqachu, chakinkupas manam punkirqachu.

²² Nacionkunata llaqtakunatam qorqanki, sapa ayllumanmi allpankuta qorqanki. Chaynapim Hesbonpa reynin Sehonpa munaychakusqan allpatapas, chaynataq Basanpa reynin Ogpa munaychakusqan allpatapas hapikuykurqaku.

²³ Churinkutapas cielopi chaskakunata hinañam qorqanki, hinaspam ñawpaq taytaykuman prometesqayki allpaman pusarqanki.

²⁴ Paykunam Canaán allpaman yaykuspanku hapikuykurqaku, chay allpapi yachaqkunatam paykunapa qayllanpi uchuycharqanki, reyninkunatawan runankunatam paykunapa makinman churarqanki, chaynapi paykunawan munasqankuta ruwanankupaq.

²⁵ Hapikuykurqakutaqmi murallasqa llaqtakunatapas, tukuy imapa qespinan allpakunatapas, tukuy imayuq wasikunatapas, toqosqa pozokunatapas, uvas chakrakunatapas, olivos sachakunatapas, tukuy rikchaq fruta sachakunatapas. Saksanankukama mikuspankum wirayarqaku, tukuy ima qosqaykitam mikuspa kusikurqaku.

²⁶ Paykunam ichaqa mana kasukurqakuchu, contraykipi hatarispankum kamachikuynikita qepancharqaku, qanman kutirikamunankupaq rimapayaqninku profetaykikunatapas wañurachispankum llumpayta piñachisurqanki.

²⁷ Chaymi ñakarichisqa kanankupaq enemigonkuman qoykurqanki, ñakariyninkupim qayakamusurqanki, qamñataqmi hanaq pachamanta uyariykurqanki, kuyapayakuynikiman hinam libraqninkunata kachamurqanki, chaynapi enemigonkumanta libramunankupaq.

²⁸ Ichaqa hawkayayta tariruspankum kaqmanta mana allinkunata ñawpaqnikipi ruwarqaku, chaynapim enemigonkupa makinpi saqerurqanki, ñakariyninkupi kaqmanta qayakamusuptikim hanaq pachamanta uyariykamurqanki, kuyapayakuynikiman hinam achka kutipi libraykurqanki.

²⁹ Kamachikuynikikunaman kutirikunankupaqmi anyarqanki, paykunam ichaqa hatun tukuspanku kamachikuynikikunata mana kasukurqakuchu, yachachikuynikikunapa contranpi huchallikuspam sarutyarqaku, chay yachachikuykunaqa kawsaytam qon pipas kasukuqninmanqa, mana kasukuq hinaspa rumi sonqo kaspankum mana kasukurqakuchu.

³⁰ Paykunataqa watantin-watantinmi pacienciaykurqanki, Espirituykiwan hinaspa profetaykikunawanmi qaqchachirqanki, paykunam ichaqa mana kasukurqakuchu, chayraykum kay pachapi nacionkuna munaychakunanpaq kachaykurqanki.

³¹ Chaywanpas llumpay llakipayakuq kasqaykiraykum mana chinkarachirqankichu nitaq saqerurqankichu. Qamqa llampu sonqo hinaspa kuyapayakuq Diosmi kanki.

³² Dios Taytallayku, qamqa tukuy atiyniyuqmi kanki, manchakuypaq atiyniyuqmi kanki, pacto ruwasqaykitawan hatun kuyakuynikita cumpliqmi kanki. Llapa reyniykupas, kamachiqniykupas, sacerdoteykupas, profetaykikunapas, taytaykupas chaynataq llapa runakunapas ñakarisqankutaqa amayá asllapaqqa hapiychu. Chaykunam pasawarqaku Asiria nacionniyuq reykunapa tiemponmanta kunankama.

³³ Chaywanpas Diosnillayku, tukuy imapas pasawasqankumantaqa mana huchayuqmi kanki, qamqa imatapas allintam ruwarqanki, ñoqaykum ichaqa mana allinkunata ruwarqaniku.

³⁴ Reyniykupas, kamachiqniykupas, sacerdoteykupas tayta-mamaykupas manam kamachikuynikikunata ruwayman churarqakuchu, yachachikuynikikunatawan qaqchasqaykikunatapas manam kasukurqakuchu.

³⁵ Paykunaqa kay nacionpi munaychakuchkaspankupas, tukuy ima allin kaqkunata paykunaman qochkaptikipas, tukuy imapa qespinan hatu-hatun allpata qochkaptikipas, manam qamtaqa yupaychasurqankichu, nitaqmi mana allin ruwayninkutapas saqerqakuchu.

³⁶ ¡Diosnillayku, kunanyá qawarillawayku! Ñawpaq taytaykuman qosqayki nacionpim esclavo kachkaniku, rurunkunata mikunankupaq qosqayki allpapim esclavo kachkaniku.

³⁷ Allpapa achkallaña rurunkunapas reykunapañam rikurirun, huchaykuraykum paykunaña ñoqaykumantapas munaychakuchkanku, ñoqaykupipas chaynataq animalniykupipas paykunañam munasqankuta ruwachkanku; chayraykum hatun ñakariypi kachkaniku, nispanku.

Kamachikuqkunapa contrato ruwasqankumanta

³⁸ Chayraykum ñoqaykuqa, chunkay-chunkayta prometekuspa huk contratota qellqaniku, chay contratopim kamachiqniykupas, sacerdotekunawan levitakunapas firmaspa sellonkuta churachkanku.