Nehemías 6 - CHUYA QELLQA La Biblia en Quechua de Ayacucho 2012

Nehemiaspa contranpi rimanakusqankumanta

¹ Sanbalatwan, Tobías, Arabia lawmanta kaq Gesem hinaspa wakin enemigoykum, Jerusalén llaqtapa murallankuna hatarichiy tukusqaykutawan chaynataq uchkunkunapas wichqasqaña kasqanta yacharurqaku. Punkunkunatam ichaqa manaraq churarqanikuchu.

² Chaymi Sanbalatwan Gesem kachamurqaku kaynata niwanankupaq: Ono qechwapi kaq hukkaqnin llaqtapi huñunakunanchikpaq hamuy, nispa. Paykunaqa chayta tantearqaku mana allinta ruwawanankupaqmi.

³ Chaymi willakuqkunata paykunaman kacharqani kaynata nimunankupaq: Hatun llamkaypim kachkani, manam tiempoy kanchu qamkunawan huñunakunaypaq, sichum saqeruptiyqa kay obram sayarunman, nispa.

⁴ Tawa kutikamam hina chaynallata nichiwarqaku, ñoqapas punta nisqayta hinallataqmi paykunaman kutichirqani.

⁵ Pichqa kaq kutipim Sanbalatqa criadontaña kachamuwarqa mana wichqasqa cartata apachimuwaspan.

⁶ Chay cartam kaynata nisqa: Nacionkunapi runakunam rimachkanku, Gesempas hina chaynallatam nin, qamtaqsi judiokunawan kuska rey Artajerjespa contranpi hoqarikuyta tanteachkanki, chaypaqtaqsi murallatapas kaqmanta hatarichichkankichik. Paykunapa reynin karuyta munaspaykitaqsi

⁷ profetakunatapas churarunki, chaynapi Jerusalén llaqtapi reypaq churasuspayki “Judá nacionpiqa kachkanñam reyqa” ninankupaq. Chay rimaykunataqa rey Artajerjesmanmi willaykunmanku, chaynaqa hamuypuni rimanakunanchikpaq, nispa.

⁸ Chaymi Sanbalatman kaynata nichi-murqani: Chay nisqaykiqa manam cheqapchu, qanmi sonqoykimanta hurqoykuspa chaykunataqa rimachkanki, nispa.

⁹ Paykunaqa manchachiwanankupaqmi kaynata nirqaku: Mancharichiptinchikqa pisi kallpayuq rikuriruspankum llamkayninkutapas mana tukunqakuchu, nispanku. Chaymi Tayta Diosta kaynata maña-kurqani: Dios Taytalláy, kunanyá makillaykuta kallpanchaykuy, nispa.

¹⁰ Chaymantam Mehetabelpa willkan Delaiapa churin Semaiaspa wasinta rirqani, payqa wasinpim wichqakurusqa, paymi kaynata niwarqa: Tayta Diospa templonpi huñunakuspa pakakamusunchik, punkunkunatapas sumaqta wichqakurusun, kunan tutam wañuchisunaykipaq hamunqaku, nispa.

¹¹ Chaymi nirqani: Ñoqa hina qarikunaqa manam ayqenchu, manataqmi salvakunanpaqpas Diospa wasinpiqa pakakunchu. Ñoqaqa manam yaykusaqchu, nispay.

¹² Musyarurqanim Semaiasqa chaykunataqa kikillanmanta rimasqanta, manam Dioschu rimachirqa, aswanqa Tobiaswan Sanbalat pagarusqanraykum chaytaqa rimachkarqa.

¹³ Paykunam pagarurqaku manchachiwananpaq hinaspa huchallichiwananpaq, chaynapi ñoqamanta mana allinkunata rimaspanku penqayman churawanankupaq.

¹⁴ Chaymi kaynata mañakurqani: Dios Taytalláy, Tobiaswan Sanbalatpa ruwasqankutaqa amayá qonqaychu, profetisa Noadiastawan wakin profetakunamantapas amataqyá qonqaychu, paykunam manchachiyta munawanku, nispay.

¹⁵ Muralla ruwaytam tukururqaniku Elul killapa iskay chunka pichqayuq punchawninpi. Chay obratam pichqa chunka iskayniyuq punchawpi qespirachirqaniku.

¹⁶ Llapa enemigoykuwan muyuriqniykupi kaq nacionkunapas, chay ruwasqaykuta yacharuspankum llumpayta mancharikurqaku, penqakuymantam uchuychakuspanku Diosniykupa yanapakuyninwan qespichisqa kasqanta chayraq yuyayta hapirqaku.

¹⁷ Chay punchawkunapim Judá nacionpi ancha reqsisqa runakuna Tobiaswan achka cartakunata apachinakurqaku.

¹⁸ Chaynataqa ruwarqaku Judá lawpi achkallaña runakuna, Arapa churin Secaniaspa masan kasqanrayku, Tobiasman hapipakunankupaq jurasqankuraykum. Tobiaspa churin Johananmi casarakururqa Berequiaspa churin Mesulampa warmi churinwan.

¹⁹ Ñoqapa ñawpaqniypipas allinllatañam Tobiasmantaqa rimaqku, ima rimasqaytapas paymanmi willaqku, Tobiasñataqmi manchachiwananpaq cartakunata apachimuwaq.