Nehemías 4 - CHUYA QELLQA La Biblia en Quechua de Ayacucho 2012

Enemigonkupa asipayasqanmanta

¹ Jerusalenpa murallan hatarichis-qaykuta Sanbalat uyariruspanmi llumpayta piñakururqa, hinaspam ñoqayku judiokunamanta burlakuspan,

² wawqenkunapa chaynataq Samaria tropakunapa qayllanpi kaynata nirqa: ¿Imatataq kay mana kallpayuq judiokuna ruwachkanku? ¿Yapamantachu murallakunata hatarichispanku sacrificiokunata ofrecenqaku? ¿Yaqachu huk punchawllapi tukurunqaku? ¿Yaqachu waknaña allpa ukumanta llapa kañasqa rumikunata hurqospa musoqyachinqaku? nispa.

³ Paywantaqmi kachkarqa Amón ayllumanta Tobiaspas, paypas kaynatam nirqa: Wak perqasqanku murallata qawaychik, waktaqa china atoqllapas qespiruspanqa tuñirachinqam, nispa.

Nehemiaspa mañakusqanmanta

⁴ Chaymi kaynata mañakurqani: Diosnillayku, asipayawasqankuta uyariy, kikinkumanyá kamikuyninkuta kutichiy, enemigonkupa makinman wichispayá huklaw nacionman preso apasqa kachunku.

⁵ Kay mana allin ruwasqankutaqa ama pampachaychu, qayllaykimantaqa amayá huchankutapas chinkachiychu, paykunaqa muralla hatarichisqaykumantam kamiwanku, nispa.

Enemigonkupa amenazasqanmanta

⁶ Chaywanpas hinam llamkarqaniku, chaymi llapa runakuna kusikuyllawanña perqasqankurayku chawpikama hatarirachirqaniku.

⁷ Ichaqa Sanbalat, Tobías, Arabia lawmanta kaqkuna, Amón lawmanta kaqkuna hinaspa Asdod lawmanta kaqkunam, Jerusalén llaqtapa murallankuna allichasqaykuta chaynataq raqrankunatapas wichqasqaykuta uyariruspanku sinchillataña piñakururqaku.

⁸ Hinaspam Jerusalenta atacamunankupaq llapallanku rimanakururqaku, chaynapi hukmanyachiwanankupaq.

⁹ Chaymi Diosniykuta mañakuspayku llaqtata tuta punchaw waqaychanankupaq runakunata churarqaniku paykunamanta defiendekunaykupaq.

¹⁰ Judá runakunam ichaqa kaynata quejakurqaku: Rumi hurqoqkunawan allpa wischuq-kunam pisiparunkuña, manañam perqa hatarichiytaqa atiymankuñachu, nispanku.

¹¹ Enemigoykupas kaynatam nirqaku: Mana pipa musyasqallantam chawpinkuman yaykuruspa wañurachisun, hinaspam llamkayninkuta chayllapi sayarachisun, nispanku.

¹² Ichaqa llapa enemigoykupa hichpanpi yachaq judiokunam hamuspanku chunkay-chunkayta willawaqku maynintam atacamuwanankutapas.

¹³ Chaymi murallapa qepanpi, tuñisqa lawkunapi hinaspa manaraq perqa ancha hatarichisqa lawkunapi runakunata ayllun-ayllun churarqani espadantintakama, lanzantintakama hinaspa flechantintakama.

¹⁴ Hinaspaymi mancharisqallaña kasqankuta qawarispay, llapa kamachikuqkunatawan ancha reqsisqa runakunata hinaspa llapa runakunata kaynata nirqani: Ama paykunataqa manchakuychikchu, Diosninchikpa ancha atiyniyuq kasqantayá yuyariychik, chaynaqa aylluykichik, churikichikkuna, warmikichik hinaspa wasikichikrayku peleaychik, nispay.

¹⁵ Allin armasqa kasqaykuta llapa enemigoyku yacharusqankuta chaynataq Diosniykupas paykunapa tukuy ima rimanakusqankuta yanqacharusqanta yacharuspaykum, murallapi perqayniykuman sapakama kutiykurqaniku.

¹⁶ Chay punchawmantam wakin runaykuna perqa ruwaypi llamkarqaku, wakinñataqmi qasqonku wasanku harkachikunata churakuykuspanku lanzakunawan, escudokunawan, flechakunawan armasqa karqaku. Kamachikuqkunañataqmi llapa Judá runakunata yanaparqaku.

¹⁷ Muralla perqaqkunapas, rumi qepiqkunapas, allpa wischuqkunapas, huknin makinkuwanmi obrapi llamkarqaku, hukninwanñataqmi espadata hapirqaku.

¹⁸ Perqaqkunam llamkaspanku sapakama weqawninkupi espadayuqkama karqaku, trompeta tocaqñataqmi ñoqawan kuska karqa.

¹⁹ Chaynata ruwanankupaqqa ñoqam llapa kamachikuqkunata, ancha reqsisqa runakunata hinaspa llapa runakunatapas kaynata nirqani: Ruwananchikqa hatu-hatunmi, ñoqanchikñataqmi murallapi karupikama churanasqa kachkanchik.

²⁰ Chaynaqa, maypipas trompeta tocaqta uyarispaykichikmi ñoqaykuman huñukamunkichik. Diosninchikmi ñoqanchikpaq peleanqa, nispay.

²¹ Wakin runakuna lanza hapirisqa kaptinkum ñoqaykuñataq achikyasqanmanta tutaykunankama llamkarqaniku.

²² Chay tiempopim runakunata kaynata nirqani: Sapakamam yanapaqnikichikwan kuska Jerusalén ukullapi kankichik, chaynapi tutan cuidanakuspa punchawñataq obrapi llamkananchikpaq, nispay.

²³ Chaynapim ñoqapas, aylluykunapas, runaykunapas hinaspa compañaqniy llaqta nanachikuqkunapas pachaykutaqa mana hurqokurqanikuchu, aswanqa bañakunallaykupaqñam chustukuykuq kaniku.