Nehemías 2 - CHUYA QELLQA La Biblia en Quechua de Ayacucho 2012

Nehemiasta rey Artajerjespa yanapasqanmanta

¹ Rey Artajerjes iskay chunka wataña munaychakuchkaptinmi, Nisán killapi, vinopas paypa ñawpaqninpiña kachkaptin, vinota payman servichkaptiy, sinchi llakisqata qawaykuwaspan,

² kaynata tapuykuwarqa: ¿Imanasqataq llakisqa kachkanki? Manam onqosqaqa kawaqchu, ima sasachakuypichá kachkanki, nispa. Chaymi llumpayta mancharikuspay,

³ reyta nirqani: Reynilláy, ¡wiñaypaqyá kawsakuy! ¿Imaynataq manaqa llakikuymanchu taytaykunapa pampakusqan llaqta hinalla purmasqa chaynataq punkunkunapas hina kañasqalla kachkaptinqa? nispay.

⁴ Reyñataqmi niwarqa: ¿Imatataq munanki qampaq ruwanayta? nispa Chaymi hanaq pachapi munaychakuq Diosta mañakuspay,

⁵ reyta nirqani: Reynilláy, allinpaq rikchakapusuptikiqa chaynataq kuyapayakuynikita haypay-kuptiyqa, Judá nacionman kutinaypaq-yá kachaykuway, chaynapi taytaykunapa pampakusqan llaqtata musoqmanta hatarichimunaypaq, nispay.

⁶ Hinaptinmi reyqa, reinapas waqtanpi tiyachkaptin, kaynata niwarqa: ¿Hayka unaytaq illanki hinaspa haykapitaq kutimunki? nispa. Haykapim kutimunayta niykuptillaymi riruyá niwarqa.

⁷ Reytaqa nirqanitaqmi: Reynilláy, allinpaq rikchakapusuptikiqa, Eufrates mayupa waklawninpi kamachikuqkunapaqyá cartakunata qoykuway, chaynapi Judá lawman chayanaykama ama harkawanankupaq.

⁸ Huk cartatañataq sachaykikunata waqaychaq Asafpaq, chaynapi qerukunata qowananpaq, chaykunawan templopa punkunkunata, llaqtapa perqanta hinaspa yachanay wasitapas ruwachinaypaq, nispay. Chaymi reyqa cartakunata qoykuwarqa, Tayta Diospa yanapawasqanman hina.

⁹ Eufrates mayupa waklawninman chayaruspaymi, reypa cartankunata kamachikuqkunaman qorqani. Reymi kamachirqa tropakunapa capitanninku-natawan sillada tropakunata waqay-chawanankupaq.

¹⁰ Ichaqa Horón llaq-tayuq Sanbalatwan Amón llaqtapi kamachikuq Tobiasmi yacharuspanku, Israelpa mirayninkunapa allinninpaq risqaymanta sinchita piñakururqaku.

Murallata hatarichinankupaq Nehemiaspa kallpanchasqanmanta

¹¹ Jerusalén llaqtaman chayaruspay kimsa punchawña kachkaspaymi,

¹² tuta hatarispay wakin qarikunapiwan pasarqaniku, ichaqa manam pimanpas willarqanichu Jerusalenpi imam ruwanaypaq Diospa sonqoyman churasqantaqa. Ñoqapa sillakusqay animalmanta huk animalqa manam rirqachu.

¹³ Chay tutam, qechwaman riq punkunta lloqsispay Dragonwan sutichasqa pukyu lawninta Muladarwan sutichasqa punkukama rirqani, hinaspaymi Jerusalenpa tuñisqa murallankunatawan kañasqa punkunkunata qawamurqani.

¹⁴ Chaymantam pukyuman riq punkuman hinaspa reypa ruwachisqan qochaman rirqani, ichaqa sillakusqay animalmi chayninta mana pasayta atirqachu.

¹⁵ Hina chay tutallam wayqonta wichayman rirqani, hinaspaymi perqata qawaramuspay qechwaman riq punkunta kutimurqani.

¹⁶ Llapa kamachikuqkunam ichaqa mana yacharqakuchu maytam risqaytapas nitaq imam ruwamusqaytapas. Chaykamaqa manataqmi imam ruwanaytapas willarqanichu judiokunamanpas, sacerdotekunamanpas, gobernadorkunamanpas nitaq llamkaqkunamanpas.

¹⁷ Chaymi paykunata nirqani: Qamkunaqa qawachkankichikmi sasachakuypi kasqanchikta. Jerusalén llaqtapa perqankunapas tuñichisqam kachkan, punkunkunapas kañasqam kachkan. Chaynaqa, hatarispayá Jerusalenpa perqanta kaqllamanta hatarichisun, amaña penqaypi kananchikpaq, nispa.

¹⁸ Paykunamanqa willarqanitaqmi Dios-niypa yanapawasqantawan reypa niwasqankunatapas, hinaptinmi nirqaku: ¡Hatarispayá perqasunchik! nispanku. Chaynatam ruwanankupaq kallpanchakurqaku.

¹⁹ Ichaqa Horón llaqtayuq Sanbalatwan Arabia lawmanta kaq Gesem hinaspa Amón llaqtapi kamachikuq Tobiasmi chayta yacharuspanku, kaynata nispa asipayawarqaku: ¿Imatataq kayta ruwachkankichik? ¿Reypa contranpichu hoqarikuchkankichik? nispanku.

²⁰ Ñoqañataqmi paykunata nirqani: Hanaq pachapi munaychakuq Diosmi yanapawanqaku, ñoqayku serviqninkunaqa hatarispaykum perqasaqku. Qamkunaqa ama chapukamuwaykuchu, manataqmi Jerusalén llaqtayuqchu kankichik, nispa.