Nehemías 13 - CHUYA QELLQA La Biblia en Quechua de Ayacucho 2012

Nehemiaspa wakin ruwasqankunamanta

¹ Chay tiempopim Moisespa qellqasqan librota llapa runakunapaq leerqaku, chaypim tarirurqaku Amón castakunawan Moab castakunaqa Diospa llaqtanwan wiñaypaq mana haykapipas hukllawakunankupaq.

² Chaynaqa, karqa, Israelpa mirayninkuna Egiptomanta lloqsimuptinku, mikuywan, yakuwan mana chaskisqanraykum, aswanqa Balaamman pagaruspankum Israelpa mirayninkunata ñakachirqaku. Diosmi ichaqa chay ñakachisqanta bendicionman tikrarurqa.

³ Chay leesqanku kamachikuypa imam nisqanta uyariykuspankum Israel runakunamanta llapallan huklaw llaqtayuqkunata rakirqaku.

⁴ Ñawpaqtam, Diospa templonpi almacén cuartokunata nanachikuq sacerdote Eliasib aylluchakururqa Tobiaswan,

⁵ paypaqmi huk hatun cuartota alistapurqa. Chay cuartopim pasaq tiempokunapi waqaychaqku ofrendakunata, inciensota, serviciokunata chaynataq trigomanta, vinomanta hinaspa aceitemanta diezmokunatapas; chaykunataqa levitakunaman, punku nanachikuqkunaman hinaspa takiqkunamanmi qorqaku, chaypitaqmi churaqku sacerdotekunapaq ofrendakunatapas.

⁶ Tukuy chaykuna pasakuptinqa manam ñoqaqa Jerusalén llaqtapichu tarikurqani, aswanqa Babiloniapi rey Artajerjes kimsa chunka iskayniyuq wataña munaychakuchkaptinmi paypa kasqanman kutikurqani. Ichaqa punchawkuna pasaruptinmi reymanta permisota mañakuspay

⁷ Jerusalenman kutimurqani; chayñam yacharurqani Eliasibpa mana allinkuna ruwasqanta. Payqa Tobiasmanmi Diospa templonpa pationpi huk cuartota qoykusqa.

⁸ Chay ruwasqanmantam sinchillataña piñakururqani, hinaspaymi chay cuartomanta Tobiaspa tukuy imankunatapas wischurqani.

⁹ Chaymantam kamachirqani chay cuartota chuyanchanankupaq hinaspa Diospa templonpi serviciokunata, kawsay ofrendakunata hinaspa inciensota maymi kasqanman kutiykachinankupaq.

¹⁰ Yacharurqanitaqmi llapa levitakunaman tupaqninta mana qosqankutapas, chayraykum Tayta Diospa templonpi servikuq levitakunawan takiqkunaqa allpankuman sapakama ripukusqaku.

¹¹ Chaymi kamachikuqkunata qaqchaspay kaynata nirqani: ¿Imanasqataq Tayta Diospa templon kayna saqesqa kachkan? nispay. Chaymantam llapa sacerdotekunatawan levitakunata imam ruwanankuman kaqlla churarqani.

¹² Chaynapim Judá lawpi llapallan yachaqkuna, almacén cuartoman trigomanta, vinomanta hinaspa aceitemanta diezmonkuta apamurqaku.

¹³ Chaymantam chay almacén cuartota nanachikunankupaq, sacerdote Selemiastawan escriba Sadocta hinaspa levitakunamanta Pedaiasta churarqani. Paykunata yanapananpaqñataqmi Zacurpa churin Hananta churarqani; Zacurqa karqa Mataniaspa churinmi. Paykunaqa allin confianza runakunam karqaku. Paykunatam churarqani castamasinkunaman tupaqninkuta aypunankupaq.

¹⁴ Dios Taytalláy, tukuy ima ruwasqaytayá yuyariy, qampaqwan temploykipaq imam ruwasqaytaqa amayá qonqaychu.

¹⁵ Chay punchawkunapim Judá runakunata rikurqani, samana punchawpi vino ruwaqta, trigo qepiqta chaynataq vinota, uvasta, frutakunata, higosta hinaspa tukuy rikchaq qepikunata asnoman cargaspa Jerusalenman apamusqankuta. Chaymi tukuy imata samana punchawpi rantikusqankumanta qaqcharqani.

¹⁶ Jerusalenpi yachaq Tiro llaqtayuq runakunapas, challwakunatawan tukuy imakunata apamuspankum samana punchawpiraq Jerusalenpi yachaq runakunaman rantikurqaku.

¹⁷ Chayraykum Judá lawpi kamachikuqkunata kaynata qaqcharqani: Qamkunaqa samana punchawta sarutyas-paykichikmi huchallikuchkankichik.

¹⁸ Ñawpaq taytaykichikkunapas chaynatam ruwarqaku, chayraykum ñoqanchikmanpas chaynataq kay llaqtamanpas kay sasachakuykunata Diosninchik apamurqa. Chaynaqa, ¿samana punchawpi mana samaspachu Tayta Diosta aswanraq piñachiypi richkankichik? nispa.

¹⁹ Chaymi kamachirqani viernes tarde inti seqaykuymanta Jerusalén llaqtapa punkunkunata wichqaspanku samana punchaw tutaykuykama ama kichanankupaq. Hinaspaymi wakiqnin criadoykunata punkukunapi churarqani, chaynapi samana punchawpiqa ama ima cargapas yaykumunanpaq.

²⁰ Hinaptinmi negociantekunapas hinaspa tukuy imata rantikuqkunapas achka kutita Jerusalén llaqta hawapi qeparurqaku.

²¹ Ñoqañataqmi paykunata kaynata qaqcharqani: ¿Imanasqataq qamkunaqa perqapa qepanpi qeparunkichik? Sichum huktawan chaynata ruwaptikichikqa presocharusqaykichikmi, nispa. Chaymantapunim paykunaqa manaña sa-mana punchawpiqa kutimurqakuñachu.

²² Levitakunatapas kamachirqanim chuyanchakuspanku punkukunata waqaychanankupaq chaynapi samana punchawta Diosllapaqña sapaqcha-nankupaq. ¡Dios Taytalláy! Amayá qonqaruychu kay ruwasqaytapas, hinaspa kuyapayakuynikiman hina llakipayariykullaway, nispa.

²³ Chay tiempopiqa rikurqanitaqmi imaynam Judá castamanta wakiqnin runakuna Asdodmanta, Amonmanta hinaspa Moabmanta kaq warmikunawan casarakurusqankutapas.

²⁴ Chaynapi wakiqnin churinkupas Asdod runakunapa rimaynintawan, huklaw nacionniyuq runakunapa rimayninta rimaqku, Judá runakunapa rimaynintam ichaqa mana rimaqkuchu.

²⁵ Chaymi paykunawan atipanakuspay ñakaykurqani, paykunamantam wakinta azoterqani, chukchankutapas chutaparqani, hinaspam Diosrayku jurachispay kaynata nirqani: Amam warmi churikichikkunatapas nitaq qari churinkunatapas paykunapa churinkunawanqa casarachinkichikchu, nitaqmi kikikichikpas chaynataqa ruwankichikchu.

²⁶ Israel nacionpa reynin Salomonpas chaynata ruwaspam huchallikurqa; pay hina Tayta Diospa ancha kuyasqan reyqa manam mayqan nacionpipas karqachu. Paytam Israel nacionpi rey kananpaq Tayta Dios churarqa. Ichaqa paytapas huklaw nacionniyuq warmikunam huchallirachirqa.

²⁷ Chayraykum ñoqaykuqa mana munanikuchu, huklaw llaqtayuq warmikunawan casarakuspa Diosnin-chikpa contranpi huchallikunaykichikta, nispay.

²⁸ Sacerdote Eliasibpa churin Joiadapa huknin churintam, Horón llaqtayuq Sanbalatpa masan kasqanrayku ladoymanta qarqorurqani.

²⁹ Dios Taytalláy, amayá paykunata qonqaychu. Paykunaqa sacerdote kayninkutam millakuypaqta ruwarunku, sacerdotekikunaña chaynataq levitaykikunaña kanankupaq pacto ruwasqaykitam millakuypaqta ruwarunku.

³⁰ Chaynatam sacerdotekunatawan levitakunatapas huklaw nacionniyuq kaqkunamanta chuyancharqani, hinaspam sapakamata imam ruwayninkuman churarqani.

³¹ Kamachirqanitaqmi tiempollanpi yantatawan chaynataq punta kaq rurukunata apamunankupaqpas. ¡Dios Taytalláy, amamá qonqarullawankichu, yanapaykuwanaykipaqmi yuyarillawanki!