Nehemías 12 - CHUYA QELLQA La Biblia en Quechua de Ayacucho 2012

Sacerdotekunamantawan Levitakunamanta

¹ Salatielpa churin Zorobabelwan hinaspa Josueywan kutimuq sacerdotekunawan levitakunam kaykuna karqaku. Sacerdotekunamantam karqaku Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Iddo, Gineto, Abías,

⁵ Mijamín, Maadías, Bilga,

⁶ Semaías, Joiarib, Jedaías,

⁷ Salú, Amoc, Hilcías hinaspa Jedaías. Paykunawan ayllunkunam Josueypa tiemponpi sacerdotekunapa kamachiqninkuna karqaku.

⁸ Levitakunamantam karqaku Jesúa, Binúi, Cadmiel, Serebías, Judá hinaspa Matanías. Paykunam ayllunkunapiwan takiqkuna karqaku,

⁹ Bacbuquiaswan Uniñataqmi wawqenkunapiwan kuska sapakama imam ruwanankuta ruwarqaku.

¹⁰ Jesuam karqa Joiacimpa taytan, Joiacimñataqmi Eliasibpa, Eliasibñataqmi Joiadapa.

¹¹ Joiadam karqa Jonatanpa taytan, Jonatanñataqmi Jaduapa.

¹² Joiacimpa tiemponpi sacerdotekunapa ayllunkunapi kamachikuqkunam karqaku: Seraías, Meraías, Jeremiaspa ayllunmanta Hananías,

¹³ Esdraspa ayllunmanta Mesulam, Amariaspa ayllunmanta Johanán,

¹⁴ Melicupa ayllunmanta Jonatán, Sebaniaspa ayllunmanta José,

¹⁵ Harimpa ayllunmanta Adna, Meraiotpa ayllunmanta Helcai,

¹⁶ Idopa ayllunmanta Zacarías, Ginetonpa ayllunmanta Mesulam,

¹⁷ Abiaspa ayllunmanta Zicri, Miniaminpa ayllunmantawan Moadiaspa ayllumanta Piltai,

¹⁸ Bilgapa ayllunmanta Samúa, Semaiaspa ayllunmanta Jonatán,

¹⁹ Joiaribpa ayllunmanta Matenai, Jedaiaspa ayllunmanta Uzi,

²⁰ Salaipa ayllunmanta Calai, Amocpa ayllunmanta Eber,

²¹ Hilciaspa ayllunmanta Hasabías, Jedaiaspa ayllunmanta Natanael.

²² Eliasibpa, Joiadapa, Johananpa hinaspa Jaduapa tiemponpi levitakunam sapa ayllupi kamachikunankupaq listasqa karqaku, chaynallataqmi sacerdotekunapas, Persia nacionpi rey Dariopa tiemponkama.

²³ Leví ayllupi kamachikuqkunapas, Eliasibpa churin Johananpa tiemponkamam, Crónicas libropi listasqa karqaku.

²⁴ Levitakunapa kamachiqninkunam karqaku: Hasabías, Serebías, Jesúa, Cadmiel. Paykunapa chimpanpiñataqmi karqaku castankuna, chaynapi muyuyninpi Tayta Diosta yupaychaspa payman graciasta qonankupaq. Chaynatam kamachikurqa Diospa serviqnin David.

²⁵ Mataniaswan, Bacbuquías, Obadías, Mesulam, Talmón hinaspa Acubñataqmi punku nanachikuqkuna karqaku.

²⁶ Paykunam gobernador Nehemiaspa, yachachikuq sacerdote Esdraspa hinaspa Josueypa churin Joiacimpa tiemponpi kawsarqaku. Josueyqa karqa Josadacpa churinmi.

Llaqtapa murallankunata Diospaq dedicasqankumanta

²⁷ Jerusalén llaqtapa murallankunata Diospaq dedicanankupaqmi, tukuy hinastinpi yachaq levitakunata maskamurqaku, hinaspam Jerusalén llaqtaman pusarqaku, kusikuyllawanña graciasta qospanku, platillokunawan, arpakunawan takispa dedicanankupaq.

²⁸ Chaymi takiq levitakuna huñunakamurqaku Jerusalén llaqtapa muyuriqnin llaqtakunamantawan Netofa lawpi llaqtachakunamantapas.

²⁹ Hamurqakutaqmi Gilgal, Geba hinaspa Azmavet lawpi chakrakunamantapas. Chaykunamantaqa hamurqaku, Jerusalén llaqtapa muyuriqninpi llaqtachakunata kikinkupaq hatarirachisqankuraykum.

³⁰ Sacerdotekunawan levitakunam chuyanchakurqaku. Chuyancharqakutaqmi llapa runakunatapas, punkukunatapas chaynataq perqakunatapas.

³¹ Chaymi Judá nacionpi kamachikuqkunata murallapa hawanman seqanankupaq kamachirqani, takiqkunatapas iskaymanmi rakirurqani. Hukninmi alleq lawman muralla hawanta Muladarwan sutichasqa Punku lawman rirqaku.

³² Paykunapa qepantam Osaías rirqa Judapi wakin kamachikuqkunapiwan.

³³ Chay kamachikuqkunam karqaku: Azarías, Esdras, Mesulam,

³⁴ Judá, Benjamín, Semaías hinaspa Jeremías.

³⁵ Sacerdotekunamantam trompetata tocastin rirqaku Jonatanpa churin Zacarías; Jonatanqa karqa Semaiaspa churinmi, Semaiasñataqmi Matanias-pa, Mataniasñataqmi Micaiaspa, Micaias-ñataqmi Zacurpa, Zacurñataqmi Asafpa;

³⁶ paykunawantaqmi wawqenkunapas rirqaku. Paykunam karqaku: Semaías, Azarael, Milalai, Gilalai, Maai, Natanael, Judá hinaspa Hanani, paykunam Diospa serviqnin Davidpa ruwasqan tocanakunata tocarqaku. Sacerdote Esdrasñataqmi ñawpaqninkuta rirqa.

³⁷ Pukyuwan sutichasqa punkuman chayaruspankum, “Davidpa Llaqtanwan” sutichasqanku llaqtapa gradasninta muralla hawantakama wichayman seqarqaku, hinaspam Davidpa palacionpa hichpanta rispa Yakuwan sutichasqa punkuman chayarqaku. Chay punkuqa kachkan llaqtapa intipa qespimunan lawninpim.

³⁸ Takiqkunamanta hukninñataqmi ichoq lawman rirqaku, hornowan sutichasqa torrentakama rakta perqaman chayanankukama. Ñoqañataqmi wakin runakunawan kuska murallapa hawantakama qepankuta rirqani.

³⁹ Efraín punkunta, Mawkawan sutichasqa punkunta, Challwawan sutichasqa punkunta, Hananeelwan sutichasqa torrenta hinaspa Pachakwan sutichasqa torrenta rispaykum Ovejakunawan sutichasqa punkukama chayarqaniku, hinaspam guardiakunapa sayanan punkupi sayarurqaniku.

⁴⁰ Chaymantam iskayman rakinasqa takiqkuna, Tayta Diospa templonpi sapakama maymi kanankuman churakuykurqaku. Ñoqapas riqmasiy kamachikuqkunawan kuskam chaypi sayarqaniku.

⁴¹ Trompetakunata tocaq sacerdotekunam kaykuna karqaku: Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Uzi, Johanán, Malquías, Elam hinaspa Ezer. Takiqkunañataqmi Izrahiaspa dirigisqan kallpawan takirqaku.

⁴³ Chay punchawpim achkallaña ofrendakunata ofrecespanku kusikurqaku, Tayta Dios kusichisqanrayku sinchillataña kusikurqaku. Warmikunawan wawakunapas ancha kusisqam karqaku, chaymi Jerusalenpi kusikuyqa karukamaraq uyarikurqa.

Sacerdotekunapaqwan levitakunapaq mikuymanta

⁴⁴ Chay tiempopim, qori-qollqetawan, ofrendakunata, punta kaq rurukunata hinaspa diezmokuna waqaychana almacenkunata nanachikuq runakunata akllarqaku, chaynapi kamachikuypa nisqanman hina, sacerdotekunapaq chaynataq levitakunapaq tupaqnin apamusqankuta waqaychanankupaq. Judá runakunam kusisqa karqaku sacerdo-tekunapa hinaspa levitakunapa servikusqankuwan.

⁴⁵ Sacerdotekunawan levitakunam takiqkunawan hinaspa punku waqaychaqkunawan kuska Tayta Diosta servirqaku, ruwarqakutaqmi chuyanchana kaqkunatapas; chaykunataqa ruwarqaku Davidpa hinaspa churin Salomonpa kamachisqanman hinam.

⁴⁶ Davidpa chaynataq Asafpa tiemponpipas karqam takiqkunapa directornin, chaynapi takikunawan yupaychaspa Diosman graciasta qonankupaq.

⁴⁷ Zorobabelpa chaynataq Nehemiaspa tiemponpim, lliw Israel runakuna, sapa punchaw, takiqkunamanwan punku waqaychaqkunaman mikunankuta qorqaku; levitakunamanpas tupaqnintam qorqaku, paykunañataqmi Aaronpa mirayninmanta kaq sacerdotekunaman tupaqninkuta qorqaku.