Nehemías 1 - CHUYA QELLQA La Biblia en Quechua de Ayacucho 2012

Jerusalén llaqtapaq Nehemiaspa mañakusqanmanta

¹ Kaykunam Hacaliaspa churin Nehemiaspa rimarisqankuna. Rey Artajerjes iskay chunka wataña munaychakuchkaptinmi, Quisleu killapi ñoqa Nehemías Susa llaqtapi, reypa palacionpi kachkarqani.

² Hinaptinmi wawqey Hanani chayaramurqa Judamanta kaq wakin runakunapiwan. Paykunatam tapurqani Jerusalenmantawan preso apasqa kanankumanta puchuqkuna imayna kasqankumanta.

³ Chaymi niwarqaku: Preso apasqa kanankumanta lluptispa hinapi qepaqkunaqa hatun ñakariypi hinaspa penqakuypaqmi kallachkanku. Jerusalenpa murallanpas hinallam tuñisqa kachkan, punkunkunapas hina kañasqam kachkan, nispanku.

⁴ Chaykunata uyarispaymi tiyaykuspay waqarqani, achka punchawmi llakisqa karqani, hinaspaymi ayunaspay hanaq pachapi Tayta Diosta

⁵ kaynata mañakurqani: Hanaq pachapi munaychakuq Diosnilláy, qamqa hatun manchakuypaq Diosmi kanki, pacto ruwasqaykita mana qonqaqmi kanki, kuyasuspayki kamachisqaykikuna kasukuqtaqa kuyapayaqmi kanki.

⁶ Israel llaqtaykipaq kay serviqnikipa tuta punchaw qayakamusqantayá uyariykamullaway, qampa contraykipi Israel runaykikuna huchallikusqaykutam kunan willakamullayki, ñoqapas aylluykunawan kuskam huchallikuruniku.

⁷ Contraykipim tukuy mana allinta ruwaruniku, serviqniki Moisesman qosqayki kamachikuykunatapas, decretokunatapas chaynataq reglamentokunatapas, manam kasukurqanikuchu.

⁸ Yuyariyá serviqniki Moisesman kayna nisqaykita: “Huchallikuptikichikqa huklaw nacionkunamanmi cheqechisqaykichik.

⁹ Ñoqaman kutirikamuspa kamachikuyniykunata kasukuptikichikqa, karu llaqtakunapi cheqechisqa kasqaykichikmanta huñumuspaymi, sutiy hatunchasqa kananpaq akllasqay sitioman kutichimusqaykichik”, nispayki.

¹⁰ Israelpa mirayninkunaqa serviqnikikunam kaniku, chaymi hatun atiynikiwan librawarqankiku.

¹¹ Dios Taytalláy ruegakuykim, kay serviqnikipa mañakuynintayá uyariykamullaway, sutikita hatunchay munaq serviqnikikunapa mañakuynintapas uyariykuyá. Kunanmi mañakamullayki ima ruwasqaypipas yanapaykuwanaykipaq, chaynataq reywanpas kuyapayaykachiwanaykipaq, nispa. Chay tiempopiqa reypa coperonmi karqani.