Nahúm 2 - CHUYA QELLQA La Biblia en Quechua de Ayacucho 2012

¹ Nínive llaqta, chinkachisuqnikim hamuchkan. Harkasuqniki perqakunapiyá vigilaqkunata churay, yaykumunan ñantayá wateqay, espadatayá weqawnikiman watakuy, tropaykikunatayá peleanaykipaq huñuy.

² Tayta Diosmi Jacobpa hatun kayninta huktawan hatarichinqa, Israelpa hatun kaynintam Tayta Dios kutichipunqa, suwakuna tukuy imanta suwaruspa mana kallmayuq uvasta hinaña saqeruchkaptinkupas.

³ Tropankunapa escudonpas pukam, tropankunapas puka pachawan pachasqam, carretankunapas rawraq nina hinam, guerrapaq allichakuruptinkuqa sachakunapas katkatatanraqmi.

⁴ Carretakunam plazakunaman kallpanku, qapariywanmi callenta kallpanku, lenwachkaq nina hinaraqmi rikchayninkupas, llipya hinaraqmi kallpachkankupas.

⁵ Capitanninkunatam rey qayachkan, paykunañataqmi sarunakustin kallpachkanku llaqtata harkaq perqapa kasqanman defiendekunankupaq.

⁶ Mayukunapa punkunkunam kichakuykun, palacioñataqmi tuñiykamun.

⁷ Reinatam presota apachkanku, criadankunam waqaspa qatichkanku, qasqonkuta takakuspam palomakuna hinaraq waqachkanku.

⁸ Nínive llaqtaqa, yakunta mana takyachiq raqrasqa qocha hinam. ¡Ama ayqeychikchu! ¡Kutimuychik! nispa qayachkaptinkupas, manam pipas kutimunchu.

⁹ ¡Qori-qollqeta suwakuychik! Nínive llaqtapa tukuy ima kapuqninqa mana tukuymi.

¹⁰ Nínive llaqtaqa purmachisqa chunniq mana imayuqmi qeparun. Sonqonkupas manchakuymantam hukmanyarun, moqonkupas pasaypaqtam katkatatarun, lliwmi mana kallpayuqña qeparunku, uyankupas pasaypaqtam ayayarun.

¹¹ ¿Imataq pasarun leonpa machayninta hinaspa uña leonkunapa uchkunta? Chaypiqa leonpas wawankunawan kuskam mana pipa manchachisqan hawka yachakuqku.

¹² Leonqa mikunanpaq hapiruspanmi chinanmanwan uñankunaman rakinaq. Machaynintapas suwakamusqanwanmi anchallataña huntachiq.

Nínive llaqta chinkachisqa kananmanta

¹³ Tukuy Atiyniyuq Tayta Diosmi kaynata nin: Nínive llaqta, contraykipim kachkani, guerrapaq carretaykikunatam kañaykuspa qosnita hina chinkarachisaq; uña leonnikikunatam espadawan wañuchisaq, suwakuytapas chawpikimantam chinkachisaq, willasuqnikikunapa rimasqanpas manañam uyarikunqañachu.