Miqueas 4 - CHUYA QELLQA La Biblia en Quechua de Ayacucho 2012

Tayta Diospa munaychakunanmanta

¹ Tukupay tiempokunapim Tayta Diospa templonpa kasqan orqo wakin orqokunapa hawanpi churasqa kanqa, hatun orqokunamantapas aswan hatunmi kanqa, hinaptinmi payman llapallan nacionkuna rinqaku.

² Llapallan nacionkunam chayman rispanku ninqaku: Tayta Diospa akllakusqan orqoman hakuchik, Jacobpa Diosninpa wasinman risunchik; paymi yachachiwasun paypaq hina kawsakuyta, paypa munasqanman hinaña purisunchik, nispanku. Sión moqomantam kamachikuy lloqsimunqa, Jerusalenmantañataqmi Tayta Diospa Chuya simin lloqsimunqa.

³ Tayta Diosmi llapa llaqtakunata juzganqa, karupi kaq atiyniyuq nacionkunatapas derechonmanmi churanqa. Paykunañataqmi espadankutapas rejakunamanña tikranqaku, lanzankutapas rutunakunamanñam tikranqaku. Manañam nacionpura peleanqakuñachu, guerrapaqpas manañam mastaqa allichakunqakuñachu.

⁴ Sapakamam uvas plantankupa higos sachankupa llantunpi tiyakunqaku, manañam pipas paykunataqa manchachinqachu. Tukuy Atiyniyuq Tayta Diosmi chaynata nin.

⁵ Llapa llaqtakunaña diosninkupa sutinpi hapipasqa kawsaptinkupas, ñoqanchikqa Tayta Diospa sutinpi hapipakuspam wiña-wiñaypaq kawsakusun.

Israel huktawan hatarichisqa kananmanta

⁶ Tayta Diosmi kaynata nin: Chay punchawpim wistu ovejakunata, chinkasqa ovejakunata, ñakarichisqay ovejakunata huñumusaq.

⁷ Wistu ovejakunamantam taksa llaqtata hatarichisaq, llapa chinkasqamantañataqmi kallpasapa nacionta ruwasaq, hinaspaymi ñoqa Tayta Diosñataq Sión moqopi wiña-wiñaypaq paykunapi munaychakusaq.

⁸ Ancha kuyasqay Jerusalén llaqtayta waqaychaq Sión moqo, huktawanmi llaqtaypa capitalnin kanki, huktawanmi ñawpaqta hina kuyayllapaq kanki.

⁹ Chaynaqa, ¿imanasqataq llumpayta qayaykachakunki? ¿Manachum reyniki kapusunki? ¿Consejasuqnikichu wañukun wachakuq warmi hina ñakarinaykipaq? nispa.

¹⁰ Sión llaqtapi yachaqkuna, wachakuq warmi hinayá qewipakuychik, kunanqa llaqtamanta lloqsispam purunkunapiña yachankichik. Babilonia nacionkama chayaruspam chaypiña librasqa kankichik, chaypiñam enemigoykikunapa makinmanta Tayta Dios librasunkichik.

¹¹ Kunanqa achkallaña nacionkunam qampa contraykipi huñunakuruspa ninku: “Sión llaqta millakuypaq ruwasqa kasqanta qawaspa asikusun”, nispanku.

¹² Paykunaqa manam yachankuchu Tayta Diospa imam tanteasqantapas, nitaqmi entiendenkuchu rimapayasqantapas, manataqmi yachakunkuchu gavillata hina Tayta Diospa huñusqan kanankutapas.

¹³ Sión llaqta, hatarispayki trillay, waqraykikunatapas fierromantam ruwasaq, silluykikunatapas broncemantam ruwasaq, achkallaña nacionkunamanta qechusqaykikunatapas Tayta Diospaqñam sapaqchanki, kay pachapi munaychakuq Señormanmi ofrecenki.