Mateo 26 - CHUYA QELLQA La Biblia en Quechua de Ayacucho 2012

Jesusta wañurachinankupaq tanteanakusqankumanta

¹ Kaykunata rimayta tukuruspanmi discipulonkunata Jesús nirqa:

² Yachasqaykichikpi hinam iskay punchawmanta Pascua fiesta kanqa, hinaptinmi runapa Churin entregasqa kanqa chakatasqa kananpaq, nispa.

³ Chay punchawkunapim, sacerdo-tekunapa kamachiqninkunawan an-cianokuna, sumo sacerdote Caifaspa palacionpi huñunakururqaku.

⁴ Chaypim tanteanakururqaku engañollawan Jesusta hapiruspa wañurachinankupaq.

⁵ Ichaqa nirqakum: Fiestapiqa ama hapisunchu, chaynapi runakuna ama chaqwakunankupaq, nispanku.

Jesusman perfumeta huk warmipa tallisqanmanta

⁶ Jesusmi Betania llaqtapi kachkarqa “leprayuq” nispa sutichasqanku Simonpa wasinpi.

⁷ Hinaptinmi Jesusman huk warmi asuykurqa rumimanta pomochapi achka qollqepa chanin perfumeta aparikuspa, hinaspam mesapa waqtanpi tiyachkaptin Jesuspa umanman talliykurqa.

⁸ Discipulokunañataqmi chayta qawaykuspanku piñakuspa nirqaku: ¿Imanasqataq kayta usuchin?

⁹ Kay-taqa achka qollqepi rantikuruspam wakchakunata yanapachwan karqa, nispanku.

¹⁰ Chayta musyaruspanmi Jesús nirqa: ¿Imanasqataq kay warmipa contranpi rimankichik? Payqa allintam ñoqapaq ruwachkan.

¹¹ Wakcha runakunaqa qamkunawanmi haykapikamapas kanqa, ñoqam ichaqa mana tukuy tiempochu qamkunawan kasaq.

¹² Kay perfumeta cuerpoyman tallispanqa pampakunaypaqmi alistawachkan.

¹³ Cheqaptapunim nikichik, kay pachapi maypipas kay evangelio willakusqa kaptinmi kay warmipa ruwasqanpas willakusqa kanqa, imam ruwasqanta yuyarinankupaq, nispa.

Jesusta Judas traicionasqanmanta

¹⁴ Chunka iskayniyuq discipulokunapa hukninmi karqa Judas Iscariote, paymi sacerdotekunapa kamachiqninkunawan rimaspan

¹⁵ nirqa: ¿Jesusta entregaykuptiy haykatataq qowankichikman? nispa. Chaymi kimsa chunka qollqeta paga-nankupaq prometerqaku.

¹⁶ Chay-mantapacham Judasqa, Jesusta imaynam entregaykuyta maskarqa.

Discipulonkunawan Jesuspa cenasqanmanta

¹⁷ Mana levadurayuq tantata mikunanku fiestapa qallariyninpim, discipulonkuna Jesusman asuykuspa nirqaku: Pascua mikuyta mikunaykipaq, ¿maypitaq ruwamusaqku? nispanku.

¹⁸ Chaymi payñataq nirqa: Llaqtaman rispa rimapayasqay runata nimuychik: “Yachachikuqmi nin: Wañukunay punchawmi hichpamuchkanña, wasikipim Pascua mikuyta discipuloykunawan mikusaq”, nispa.

¹⁹ Chaymi discipulonkunaqa Jesuspa kamachisqanta kasukuspanku Pascua mikuyta ruwamurqaku.

²⁰ Tutaykaramuptinmi mesaman Jesús tiyaykurqa chunka iskayniyuq discipulonkunapiwan.

²¹ Mikuchkaptinkum Jesús nirqa: Cheqaptapunim nikichik, qamkunamantam hukkaqnikichik traicionawanqa, nispa.

²² Chaymi llumpay llakisqallaña rikuriruspanku sapakama tapurqaku: ¿Ñoqachu Señorlláy? nispanku.

²³ Jesusñataqmi nirqa: Ñoqawan kuska platoman tantanta challpuqmi entregawanqaqa.

²⁴ Cheqaptapunim runapa Churinqa Qellqapa nisqanman hina ruwasqa kanqa, ichaqa, ¡imaynaraq traicionaqnin runa kanqa! Amapas nacenmanchu karqa, nispa.

²⁵ Entregaqnin Judasñataqmi nirqa: Yachachikuq, ¿ñoqachu kani? nispan. Chaymi Jesusñataq nirqa: Qanmi nirunki, nispa.

²⁶ Mikuchkaptinkum Jesusqa, tantata hapiykuspan Diosman graciasta qorqa, hinaspam pakiykuspan discipulonkunaman qoykurqa: Hapiychik hinaspa mikuychik, kayqa cuerpoymi, nispa.

²⁷ Chaymantam vasotapas hapiykuspan Diosman graciasta qorqa, hinaspam paykunaman qoykuspan nirqa: Llapaykichik kaymanta tomaychik.

²⁸ Kayqa musoq pactota ruwasqay yawarniymi. Kay yawarmi achkaqpa rantinpi chaqchusqa kanqa, chaynapi huchanku pampachasqa kananpaq.

²⁹ Kunanmantaqa manañam uvaspa rurunmanta tomasaqñachu, maypacham Taytaypa munaychakuyninpi qamkunawan kuska musoq vinota tomanaykama, nispa.

Jesusta Pedro negananmanta

³⁰ Himnokunata takiruspankum, Olivos moqoman pasarqaku.

³¹ Hinaptinmi Jesús nirqa: Kunan tutam llapallaykichik saqewankichik, qellqasqam kachkan: “Michiqta wañurachiptiymi ovejakuna cheqerunqa”, nispa.

³² Ichaqa kawsariramuspaymi qamkunata Galileapi musoqmanta huñusqaykichik, nispa.

³³ Pedroñataqmi nirqa: Llapallankuña saqesuptikipas ñoqaqa manam saqesqaykichu, nispa.

³⁴ Jesusñataqmi nirqa: Cheqaptapunim niki, kunan tutam manaraqpas utulu waqachkaptin kimsa kutikama negawanki, nispa.

³⁵ Hinaptinmi Pedroñataq nirqa: Qanwan kuska wañunay kaptinpas manapunim negasqaykichu, nispa. Chaymi wakin discipulokunapas chaynallata nirqaku.

Getsemaní huertapi Jesuspa mañakusqanmanta

³⁶ Getsemaniyman chayaruptinkum discipulonkunata Jesús nirqa: Kayllapi tiyachkaychik, wakpi mañakamunaykama, nispa.

³⁷ Chaymantam Pedrotawan Zebedeopa iskaynin churinkunata pusarikurqa, hinaspam sinchillataña llakikuyta qallaykurqa.

³⁸ Chaymi paykunata nirqa: Sonqoymi ancha llakisqa kachkan wañukunaypaq hinaña, kaypi qepaspayá rikchaysiwaychik, nispa.

³⁹ Hinaspanmi waklawniqman pasaspan pampakama kumuykuspan kaynata mañakurqa: Taytalláy, atina kaptinqa ñoqamantayá qechuruy kay ñakariyta, ichaqa amayá ñoqapa munasqaychu ruwasqa kachun, aswanqa qampa munasqaykiyá, nispa.

⁴⁰ Discipulonkunapa kasqanman kutispanmi puñuchkaqta tariykurqa, chaymi Pedrota nirqa: ¿Manachum huk horallatapas rikchaysiwayta atirqankichik?

⁴¹ Rikchaspayá Diosta mañakuychik ama tentasqa kanaykichikpaq. Espirituykichikqa chayllam kachkan yanapasunaykichikpaq, cuerpoykichikmi ichaqa mana kallpayuq kachkan, nispa.

⁴² Huktawan kutispanmi kaynata mañakurqa: Taytalláy, sichum ñakarinay kaptinqa, qampa munasqaykiyá ruwasqa kachun, nispa.

⁴³ Kutimuspanmi discipulonkunata huktawan puñuchkaqta tariykurqa, puñuymi ñawinkuta wichqaypaq-wichqarqa.

⁴⁴ Chaymi paykunata saqeykuspan huktawan kutispan kay kimsa kaqpipas hina chaynallata mañakurqa.

⁴⁵ Chaymanta kutiramuspanmi discipulonkunata nirqa: ¿Hinallaraqchu puñuspa samach-kankichik? Runapa Churinta huchasapakunapa makinman entregananku horam chayaramunña.

⁴⁶ ¡Hatariychik, hakuchikña! Entregawaqniymi hamuchkanña, nispa.

Jesusta presochasqankumanta

⁴⁷ Chaynata Jesús rimachkaptinraqmi Judas chayaramurqa, payqa discipulonkunapa hukninmi karqa. Paywanmi achkallaña runakuna hamurqa espadayuq hinaspa kaspi aptarisqa. Chay runakunaqa karqa sacerdotekunapa, judiokunapa chaynataq kamachiqkunapa kachamusqanmi.

⁴⁸ Traicionaq Judasmi runakunata kaynata yachachimurqa: Ñoqapa muchaykusqay kaqmi, paytam hapinkichikqa, nispa.

⁴⁹ Chaymi Jesusman asuykuspan nirqa: ¡Yachachikuq, rimaykullayki! nispan. Chaynata niruspanmi muchaykurqa.

⁵⁰ Jesusñataqmi nirqa: Yaw amigo, ¿imamantaq hamurqanki? nispa. Chaymi llapa runakuna asuykuspa Jesusta hapirurqaku.

⁵¹ Ichaqa Jesuswan kaqkunapa hukninmi, espadanta hurqoykuspan sumo sacerdotepa serviqninpa rinrinta qorururqa.

⁵² Hinaptinmi Jesús nirqa: Espadaykita maymi kasqanman kutiykachiy, espadawan wañuchiqkunaqa espadawantaqmi wañuchisqa kanqaku.

⁵³ ¿Manachu yachanki Taytayta kunan mañakuykuptiy wara-waranqa angelkunata kachamuwananta?

⁵⁴ Chayna kaptinqa manachiki Qellqapa kaykuna pasakunanmanta nisqankuna cumplikunmanchu, nispa.

⁵⁵ Chaymantam llapa runakunata Jesús tapurqa: ¿Suwata hina hapiwanaykichikpaqchu espadayuqkama chaynataq kaspiyuqkama hamurqankichik? Ñoqaqa sapa punchawmi templopi yachachispay qamkunawan karqani, ichaqa manam presochawarqankichikchu.

⁵⁶ Tukuy kaykunaqa pasakun profetapa qellqasqan cumplikunanpaqmi, nispa. Llapa discipulokunañataqmi Jesusta sapallanta saqeruspanku ayqekurqaku.

Jesusta juzgasqankumanta

⁵⁷ Jesustam presocharuspanku sumo sacerdote Caifaspa wasinman pusarqaku. Chaypim llaqtapa kamachiqninkunawan Diospa leynin yachachiqkuna huñunasqa kachkarqaku.

⁵⁸ Pedroñataqmi karu qepallanta sumo sacerdotepa wasinpa pationkama qatirqa. Chaypim guardiakunawan tiyaykurqa imam pasakusqanta qawananpaq.

⁵⁹ Sacerdotekunapa kamachiqninkunawan cortepi kaqkunam, Jesuspa contranpi llulla rimaykunata maskarqaku, chaykunawan wañuyman sentencianankupaq.

⁶⁰ Ichaqa achka runakuna paypa contranpi llullakunata nichkaptinkupas manam ima pruebatapas tarirqakuchu. Chaymantam iskay llulla testigokuna hamururqaku,

⁶¹ paykunam nirqaku: Kay runam nirqa: “Ñoqaqa templota tuñirachispam kimsa punchawllapi musoqmanta hatarirachisaq”, nispa.

⁶² Hinaptinmi sumo sacerdote sayarispan Jesusta tapurqa: ¿Manachu imallatapas rimarinki? ¿Contraykipi kaykuna rimachkaptinkuqa manachu imallatapas kutipakunki? nispa.

⁶³ Jesusmi ichaqa upallalla karqa. Chaymi sumo sacerdote nirqa: Kawsaq Diospa sutinpim tapuyki: ¿Qamchu Diospa Churin Cristo kanki? nispa.

⁶⁴ Jesusñataqmi nirqa: Arí, qanmi nirunki. Ñoqapas nikichiktaqmi, kunanmantam runapa Churinta rikunkichik Tukuy Atiyniyuq Diospa alleqninpi tiyachkaqta hinaspa puyupi hamuchkaqta, nispa.

⁶⁵ Hinaptinmi sumo sacerdoteñataq pachanta llikipakuspan nirqa: ¡Kay runaqa Diospa contranpim rima-run! ¿Imapaqñataq testigokunatapas munachwan? Diospa contranpi rimasqantaqa qamkunapas uyarichkankichikmi.

⁶⁶ Chaynaqa, ¿imaninkichiktaq? nispa. Chaymi paykunañataq nirqaku: ¡Huchayuqmi, wañuchun! nispanku.

⁶⁷ Hinaspankum Jesuspa uyanman toqaspanku takarqaku, wakinñataqmi uyanpi laqechuspanku

⁶⁸ nirqaku: Cristo kaspaykiqa pim maqasusqaykitayá niykuwayku, nispanku.

Jesusta Pedro negasqanmanta

⁶⁹ Hawa patiopi Pedro tiyachkaptinmi huk criada asuykuspan nirqa: Qampas Galilea lawmanta kaq Jesus-wanmi purirqanki, nispa.

⁷⁰ Pedroñataqmi llapallanpa qayllanpi negakurqa: Imatachá rimakunkipas, nispa.

⁷¹ Chaymantam punkuman pasarqa, hinaptinmi chaypi kaqkunaman huk criada nirqa: Kay runapas Nazaret llaqtayuq Jesus-wanmi purichkarqa, nispa.

⁷² Chaymi Pedroqa juraspanraq kaqllamanta negakurqa: Wak runataqa manam reqsinichu, nispa.

⁷³ Tumpa unaymantam chaypi kaq runakuna Pedroman asuykuspa nirqaku: Cheqaptapunim qampas paykunapa parten kanki, chayqaya rimasqaykipas sutilla, nispanku.

⁷⁴ Hinaptinmi Pedroqa ñakaspanraq jurarqa: ¡Wak runataqa manam reqsinichu! nispa. Rimayta tukuruptillanmi utulu waqa-ramurqa.

⁷⁵ Chaymi Pedro yuyarirurqa: “Manaraq utulu waqachkaptinmi kimsa kutikama negawanki” nispa Jesuspa nisqanta. Hinaspam hawaman lloqsiruspa qapariywan waqakurqa.