Mateo 23 - CHUYA QELLQA La Biblia en Quechua de Ayacucho 2012

Fariseokunata Jesús qaqchasqanmanta

¹ Chaykunapa qepantam, runakunatawan discipulonkunata Jesús nirqa:

² Diospa leynin yachachiqkunawan fariseokunaqa Moisespa kamachikuyninkunatam allinta reqsinku.

³ Chaynaqa, kasukuspayá paykunapa imam nisusqaykichikta ruwaychik. Ichaqa amayá paykunapa imam ruwasqantaqa qati-pakuychikchu, paykunaqa manam yachachisqankuman hinachu kawsanku.

⁴ Paykunaqa sasa kaqkunatam llasaq qepita qepichichkaq hina runakunaman kamachinku, ichaqa manam chulla dedollankuwanpas kuyuchiyta munankuchu.

⁵ Imatapas ruwanku runakuna qawanallanpaqmi. Qellqapi kaqkunatam as-asta qellqaruspa cajachakunaman churaruspa urkunkuman hinaspa makinkuman watakuyta gustanku, pachankupa patankunapipas hatun pomponkunataraqmi warkurunku.

⁶ Convidokunapipas hinaspa sinagogakunapipas puntallapi tiyaytaraqmi munanku.

⁷ Plazakunapipas hatun respetowan rimaykuspa “ya-chachikuq” ninankutaraqmi munanku.

⁸ Qamkunaqa amayá “yachachikuq” nispaqa sutichachikuychikchu. Qamkunaqa wawqentin hinallam kankichik, hukllataqmi Yachachiqnikichikpas.

⁹ Kay pachapiqa amataqyá pitapas “taytay” nispaqa sutichaychikchu, Taytaykichikqa chullallam, payqa hanaq pachapim kachkan.

¹⁰ Amataqyá “pusakuq” nispapas sutichachikuychikchu, pusasuqnikichikqa chullallam, payqa Cristom.

¹¹ Qamkuna ukupi allin reqsisqa kaqqa serviqnikichikmi kanan.

¹² Pipas hatunchakuqqa uchuychasqam kanqa, pipas uchuychakuqñataqmi hatunchasqa kanqa.

¹³ ¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa Diospa munaychakuyninman yaykuqkunatam harkaypaq-harkachkankichik. Manam qamkunapas yaykuyta munankichikchu nitaqmi yaykuy munaqkunatapas yaykunankuta munankichikchu.

¹⁴ [¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa viudakunapa llapa imankuta qechuspam allin runa tukuspa una-unaytaraq Diostapas mañakunkichik. Chayraykum llumpay castigasqa kankichik].

¹⁵ ¡Iskay uya fariseokuna hinaspa Diospa leynin yachachiqkuna, imay-naraq kankichik! Qamkunam qatiq-nikichikta maskaspa tukuy hinastinpi purimunkichik, tariruspañataqmi qamkunamantapas iskay kuti mastaraq infiernopi castigasqa kananpaq ruwa-runkichik.

¹⁶ ¡Runakunata pusaq ñawsakuna, imaynaraq kankichik! Qamkunam ninkichik: “Sichum pipas templorayku juraptinqa manam imananchu. Templopi qorirayku juraspam ichaqa cumplinanpuni”, nispaykichik.

¹⁷ ¡Mana yachayniyuq ñawsakuna! ¿Mayqantaq aswan allinqa: Qorichu icha Diospaq qorita sapaqchaq templochu?

¹⁸ Qamkunaqa ninkichiktaqmi: “Altarpa sutinpi jurayqa manam imananchu, altarpa hawanpi ofrendarayku juraspam ichaqa cumplinanpuni”, nispaykichik.

¹⁹ ¡Mana yachayniyuq ñawsakuna! ¿Mayqantaq aswan allinqa: Ofrendachu icha Diospaq ofrenda sapaqchaq altarchu?

²⁰ Pipas altarpa sutinpi juraqqa manam altarpa sutillanpichu jurachkan, aswanqa altarpa hawanpi kaqkunamantawanmi.

²¹ Pipas templo-rayku juraqqa, manam temploraykullachu jurachkan, aswanqa chaypi yachaq Diosmantawanmi.

²² Hanaq pacharayku juraqpas, Diospa trononrayku chaynataq chaypi tiyaq Diosraykum jurachkan.

²³ ¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunam hierbabuenamanta, anismanta hinaspa cominomanta diezmoykichikta qonkichik; allin ruwayta, kuyapayakuyta hinaspa iñiyniyuq kaytam ichaqa qonqarunkichik. Kay hatun kamachikuykunatam kasukunaykichik, diezmo qoytapas ama qonqaspa.

²⁴ ¡Runakunata pusaq ñawsakuna! ¡Qamkunaqa toma-naykichikmantam chuspichata suysunkichik, camellotam ichaqa enterollata millpurunkichik!

²⁵ ¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa vasotawan platotapas hawallantam mayllankichik, ukuykichikmi ichaqa suwakuywan hinaspa mana allinkuna munaywan huntasqa kachkan.

²⁶ ¡Ñawsa fariseo! Puntataqa vasopa hinaspa platopa ukuntaraqyá mayllay, chaynapim hawanpas mayllasqa kanqa.

²⁷ ¡Iskay uya fariseokuna hinaspa Diospa leynin yachachiqkuna, imaynaraq kankichik! Hawaykichikqa yuraq-yuraq sepultura hina suma-sumaq allichasqam kachkan, ukuykichikmi ichaqa wañusqakunapa tullunwan hinaspa millakuypaq kaqkunawan huntasqa asnarichkan.

²⁸ Qamkunaqa hawallaykichikpim allin ruwaqman rikchakunkichik, sonqoykichikpim ichaqa iskay uya mana allin ruwaqkuna kachkankichik.

²⁹ ¡Iskay uya fariseokuna hinaspa Diospa leynin yachachiqkuna, imaynaraq kankichik! Qamkunaqa profetakunapaqmi hatun sepulturakunata ruwapunkichik, allin ruwaq runakunapa sepulturankunatam adornankichik,

³⁰ hinaspam ninkichik: “Sichum ñawpaq taytanchikkunapa tiemponpi kawsaspaqa, manachá llapa profetakunata wañuchiqmasinchu kachwan karqa”, nispaykichik.

³¹ Chaynata nispaykichikmi profetakunata wañuchiq runakunapa miraynin kasqaykichikta reqsikunkichik.

³² Chaynaqa, ¡Ñawpaq taytaykichikkunapa qallarisqantayá qamkunaña tukupaychik!

³³ ¡Maqta urukuna! ¡Maqta urupa mirayninkuna! ¿Imaynatataq infiernopi castigasqa kanaykichikmanta lluptinkichik?

³⁴ Chayraykum profetakunata, yachayniyuqkunata hinaspa yachachikuqkunata kachamusqaykichik; wakintam wañu-chinkichik, wakintam chakatankichik, wakintañataqmi sinagogakunapi azotenkichik hinaspam llaqtan-llaqtan qatikachankichik.

³⁵ Chaynapim qamkunaman chayasunkichik llapallan allin ruwaq runakunapa yawarnin, allin ruwaq Abelpa yawarninmanta qallaykuspa Berequiaspa churin Zacariaspa yawarninkama. Paytam templomanta altarman rinapi wañurachirqankichik.

³⁶ Cheqaptapunim nikichik, chay llapallan castigoqa kunan tiempopi kawsaq miraykunamanmi chayamusunkichik.

Jerusalenpi yachaqkunamanta Jesuspa waqasqanmanta

³⁷ ¡Jerusalén, Jerusalén! ¡Profetakunata wañuchispam qanman kachamusqakunata rumiwan chamqapanki! ¡Hayka kutitataq wawaykikunata huñuykuyta munarqani! imaynam chiwchinkunata wallpa rapran ukupi oqllaykuq hina, ichaqa manam munarqankichu

³⁸ Chayraykum wasikichikpas chunninqa.

³⁹ Kunanmantaqa manañam rikuwankichikñachu: “Señorpa sutinpi hamuqyá hatunchasqa kachun”, ninaykichikkama.