Mateo 18 - CHUYA QELLQA La Biblia en Quechua de Ayacucho 2012

Pim punta kaq kasqanmanta

¹ Chaypa qepallantam discipulonkuna Jesusman asuykuspa tapurqaku: ¿Pitaq Diospa munaychakuyninpi mayorqa? nispanku.

² Jesusñataqmi huk warmata qayaykuspan chawpinkupi sayaykachispan

³ nirqa: Sichum warmakuna hina mana kaspaykichikqa, cheqaptapunim Diospa munaychakuyninmanqa mana yaykunkichikchu.

⁴ Diospa munaychakuyninpiqa pipas kay warma hina uchuychakuqmi mayorqa.

⁵ Pipas ñoqapa sutiypi kay warmata hina kuyakuywan chaskiqqa ñoqatam chaskiwan, nispa.

Pitapas huchallichiqqa sinchi castigasqa kananmanta

⁶ Ñoqapi iñiq taksakunamanta mayqellantapas huchallichiqtaqa, allinchá kanman molino rumita kunkanman wataruspanku lamar qochaman wischuykuyninkuqa.

⁷ ¡Mayna llakikuypaqmi runata kay pachapi imapas huchallichiq kaqkunaqa! Chaykunaqa kanqapunim, ichaqa ¡imaynaraq kanqa runamasinta huchaman tanqaq runaqa!

⁸ Chaynaqa, sichum makikipas otaq chakikipas huchaman apasuptikiqa qoruruspayá qanmanta wischuruy, allinqa kanman huknin makiyuqllañapas otaq qoru chakiyuqllañapas wiñaypaq kawsakuynikim, iskaynin makintin otaq iskaynin chakintin wiñaypaq rawrachkaq ninaman wischusqa kanay-kimantaqa.

⁹ Sichum ñawiki huchallichisuptikiqa, hurqokuruspa qanmanta karuman wischuruy, allinqa kanman huk-nin ñawiyuqllañapas wiñaypaq kawsa-kuynikim, iskay ñawintin wiñaypaq infiernoman wischusqa kanaykimantaqa.

Chinkasqa ovejawan rikchanachisqanmanta

¹⁰ Amayá kay uchuychakunamantaqa mayqantapas usuchiychikchu. Hanaq pachapiqa paykunapa angelninkunam Taytaypa uyanta tukuy tiempo qawachkanku.

¹¹ [Runapa Churinqa chinkasqakunata salvaqmi hamurqa]

¹² ¿Imaynataq rikchakapusunkichik? ¿Manachum huk runapa pachak ovejankunamanta huknin chinkaruptin, isqon chunka isqonniyuqta orqopi saqeykuspan chinkaruqta maskamun?

¹³ Cheqaptapunim nikichik, tariruspanñataqmi chay isqon chunka isqonniyuq mana chullaruq ovejakunamantapas mastaraq kusikun.

¹⁴ Chaynam hanaq pachapi kaq Taytaykichikpas mana munanchu kay taksakunamanta hukllanpas chinkanantaqa.

Imaynam pampachanamanta

¹⁵ Sichum runamasiki contraykipi huchallikuruptinqa, rispayki sapallanpi rimapayaykamuy. Pantasqanta reqsikuptinqa paywanmi allinyanakurunki.

¹⁶ Mana kasusuptikiqa hukta otaq iskay testigota pusay, chaynapi iskay otaq kimsa testigopa qayllanpi rimapayanaykipaq.

¹⁷ Paykunatapas mana kasuptinqa huñunakuypiyá llapallanman niy, paykunatapas mana kasuptinqa Diosta mana reqsiqpaq otaq impuesto cobraqpaqñayá hapiychik.

¹⁸ Cheqaptapunim nikichik, kay pachapi watasqaykichikqa hanaq pachapipas watasqataqmi kanqa, kay pachapi paskasqaykichikpas hanaq pachapipas paskasqataqmi kanqa.

¹⁹ Nikichiktaqmi, sichum kay pachapi iskayllapas huk sonqolla imatapas mañakuptikichikqa, hanaq pachapi Taytaymi qamkunapaq ruwanqa.

²⁰ Maypipas iskayllapas otaq kimsallapas ñoqapa sutiypi huñunakuptinkuqa, paykunapa chawpinpim ñoqapas kachkani, nispan.

²¹ Hinaptinmi Pedroñataq Jesusman asuykuspan nirqa: Señorlláy, ¿hayka kutikamataq contraypi wawqey huchallikuptin pampachasaq? ¿Qanchis kutikamachu? nispa.

²² Jesusñataqmi nirqa: Manam qanchiskamallachu, aswanqa qanchis chunka kutitam qanchistakama, nispa.

Mana pampachay munaq sirvientemanta

²³ Chayraykum Diospa munaychakuyninqa rikchakun serviqninkunata cuenta mañaq reyman.

²⁴ Cuenta mañayta qallaykuptinmi waranqanpi-waranqanpi debeqnin runata pusamurqaku.

²⁵ Mana pagayta atiptinmi, reyñataq kamachikurqa, chay debeqninta, warmintinta, churinkunatawan hinaspa tukuy imankunatawan kuskata esclavopaq rantikamunankupaq, chaynapi debesqanta pagananpaq.

²⁶ Hinaptinmi chay serviqninqa reypa ñawpaqninpi qonqorakuykuspa ruegakurqa: “Señorlláy, tumpatawanyá suyaykuway, lliwtachiki pagapullasqayki”, nispa.

²⁷ Chaymi reyqa llakipayarispan debesqanta pampachaykurqa, hinaspam kachaykurqa.

²⁸ Chay sirvienteñataqmi lloqsiruspan pachaklla debeqnin sirvientemasinwan tuparurqa, hinaspam kunkamanta hapiruspan nirqa: “Debewasqaykita paga-puway”, nispan.

²⁹ Hinaptinmi sirvientemasinqa ñawpaqninpi qonqorakuykuspan ruegakurqa: “Ama hina kaspayá suyaykullaway, lliwtam pagapullasqayki”, nispan.

³⁰ Paymi ichaqa mana munaspan paganankama carcelman wichqarachirqa.

³¹ Chayta rikuruspanku sirvientemasinkuna llumpayta llakikururqaku, hinaspankum imam pasakusqanmanta reyman willaykamurqaku.

³² Chaymi reyqa qayarachimuspan nirqa: ¡Mana allin runa! Ruegawaptikim lliw debewasqaykita pampacharqayki.

³³ ¿Manachu qampas sirvientemasikita llakipayariykuwaq karqa? nispan.

³⁴ Hinaspam reyqa llumpayta piñakuruspan kamachikurqa lliw debesqanta pagapunankama castiganankupaq.

³⁵ Chaynatam hanaq pachapi kaq Taytaypas qamkunawan ruwanqa, runamasikichikta tukuy sonqoykichikwan mana pampachaptikichikqa, nispan.