Mateo 15 - CHUYA QELLQA La Biblia en Quechua de Ayacucho 2012

Runata imam huchallichisqanmanta

¹ Jerusalenmanta hamuq fariseo-kunawan Diospa leynin yacha-chiqkunam Jesusta tapurqaku:

² ¿Imanasqataq discipuloykikuna ñawpaq taytanchikkunapa costumbrenta mana kasukunkuchu? Paykunaqa mikunankupaqpas manam makinkuta mayllakunkuchu, nispanku.

³ Chaymi Jesusñataq nirqa: ¿Imanasqataq qamkunapas ñawpaq taytaykichikkunapa costumbrenta kasuspaykichik Diospa kamachikuynintañataq mana ruwayman churankichikchu?

⁴ Diosmi nirqa: “Tayta-mamaykita respetay, pipas tayta-mamanta ñakaqqa wañunqam”, nispa.

⁵ Qamkunam ichaqa kaynata yachachinkichik: Huk runaqa atinmanmi tayta-mamanta kayna niyta: “Manam yanapaykimanchu, lliw kapuqniytam Diosmanña qoykuni”, nispa.

⁶ Pipas chayna niqqa manañam tayta-mamanta yanapananñachu, nispaykichik. Chaynata yachachispam Diospa kamachikuyninta yanqacharunkichik costumbrekichikta ruwanaykichikrayku.

⁷ ¡Iskay uya runakuna! Allintam profeta Isaiasqa qamkunamanta kaynata nirqa:

⁸ “Kay runakunaqa simillamantam yupaychawanku, sonqonkum ichaqa ñoqamanta karupi kachkan.

⁹ Paykunaqa yanqapaqmi yupaychawankupas, yachachikuyninkupas runakunapa kamachisqallanmi” nispa.

¹⁰ Hinaspam runakunata qayaykuspan Jesús nirqa: Uyarispa entiendeychik:

¹¹ Manam imapas mikusqanchu runataqa huchallichin, aswanqa mana allinkuna rimasqanmi, nispan.

¹² Chaymi discipulonkuna Jesusman asuykuspa nirqaku: ¿Yachankichum nisqaykiwan fariseokuna piñakurusqanta? nispanku.

¹³ Payñataqmi nirqa: Hanaq pacha Taytaypa mana tarpusqan plantaqa sapinmanta chutasqam kanqa.

¹⁴ Fariseokunataqa ama kasuychikchu. Paykunaqa ñawsakunam kanku, ñawsamasinku pusaqkunam. Ñawsapura pusanakuspaqa iskayninkum uchkuman wichiykunqaku, nispan.

¹⁵ Pedroñataqmi nirqa: Chay rikchanachiypa imam ninanta willaykuwayku, nispa.

¹⁶ Chaymi Jesús nirqa: ¿Qamkunapas manachu entiendenkichik?

¹⁷ ¿Manachum entiendenkichik runapa mikusqanqa wiksaman yaykuspa letrinaman lloqsisqanta?

¹⁸ Runapa rimasqanmi ichaqa sonqonmanta lloqsimun, chaymi runataqa huchallichin.

¹⁹ Runapa sonqonmantaqa lloqsimun mana allin yuyaymanaykunawan wañuchinakuykuna, waqllikuykuna, huchapakuykuna, suwakuykuna, llullakuykuna hinaspa kamikuykunam.

²⁰ Tukuy chaykunam runataqa huchallichin, manam makinta mana mayllakuspa mikusqanchu, nispa.

Tiro llaqtayuq warmipa wawanta sanoyachisqanmanta

²¹ Chaymanta lloqsispanmi Tiro hinaspa Sidón lawman Jesús rirqa.

²² Hinaptinmi chaylawpi cananea warmi, kaynata qaparispan Jesusman asuykurqa: ¡Davidpa Churin Señorlláy, kuyapayariykullaway! ¡Warmi wawallaytam demonio llumpayta ñakarichichkan! nispan.

²³ Jesusñataqmi mana imatapas nirqachu. Chaymi discipulonkuna Jesusman asuykuspa ruegarqaku: Wak warmita kutikunanpaq niy, qepanchiktam qayaykachakustin hamuchkan, nispanku.

²⁴ Chaymi Jesús nirqa: Taytayqa kachamuwan Israelpa mirayninkunamanta kaq chinkasqa ovejakunallamanmi, nispan.

²⁵ Chay warmiñataqmi ñawpaqninpi qonqorakuykuspan nirqa: ¡Señorlláy, yanapaykullaway! nispan.

²⁶ Jesusñataqmi nirqa: Manam allinchu warmakunamanta tantanta qechuruspa allqokunaman wischuykuyqa, nispan.

²⁷ Hinaptinmi chay warmiñataq nirqa: Arí, chaynam Señorlláy, ichaqa allqokunapas dueñonpa mesanmanta wichiqtam mikunku, nispa.

²⁸ Chaymi Jesús nirqa: ¡Yaw warmi, mayna hatunmi iñiynikiqa! Munasqaykiyá ruwasqa kachun, nispa. Hinaptinmi chaypunilla warmi wawan sanoyarurqa.

Onqoqkunata Jesús sanoyachisqanmanta

²⁹ Jesusmi chaymanta lloqsispan Galilea qochapa patanman chayarurqa, hinaspam orqoman qespispan chaypi tiyaykurqa.

³⁰ Chaymanmi achkallaña runakuna huñunakaramurqaku, hinaspam wistukunata, wañusqa makiyuqkunata, ñawsakunata, mana rimaqkunata chaynataq tukuy rikchaq onqoyniyuqkunata apamuspanku Jesuspa ñawpaqninman asuykachiptinku sanoyachirqa.

³¹ Chaymi mana rimaqkuna rimaptin, wañusqa makiyuqkuna sanoyaptin, wistukuna puriptin hinaspa ñawsakuna qawarikuptin llapa runakuna admirakurqaku. Chayraykum Israel nacionpa Diosninta yupaycharqaku.

Tawa waranqata Jesús mikuchisqanmanta

³² Discipulonkunata qayaspanmi Jesús nirqa: Kay runakunamantam llakikuni, paykunaqa kimsa punchawñam ñoqawan kachkanku, manam imapas mikunankupaq kanchu. Mana mikusqataqa manam wasinkuman kutichiymanchu, yanqañataqmi ñanpi desmayarunmanku, nispan.

³³ Chaymi discipulonkuna nirqaku: ¿Kaychika runaman mikuchinaykupaqqa maymantataq tantata kay chunniqpiqa hurqoramusaqku? nispanku

³⁴ Hinaptinmi paykunata Jesús tapurqa: ¿Haykataq tantaykichik kachkan? nispa. Paykunañataqmi nirqaku: Qanchis tantawan as challwallam, nispanku.

³⁵ Chaymi llapa runakunata pampapi tiyaykunankupaq Jesús kamachirqa.

³⁶ Hinaspam chay qanchis tantatawan as challwakunata hapiykuspa Dios-man graciasta qorqa, chaymantam partiruspan discipulonkunaman qoykup-tin runakunaman aypurqaku.

³⁷ Llapa-llankum saksanankukama mikurqaku, puchuqnintañataqmi qanchis canasta huntataraq huñururqaku.

³⁸ Lliw mikuqkunam tawa waranqa qarikuna karqaku, warmikunawan wawakunaqa manam yupasqachu karqaku.

³⁹ Runakunata aviaruspanmi Jesusñataq barcaman qespiykuspan Magdala lawman pasa-kurqa.