Marcos 5 - CHUYA QELLQA La Biblia en Quechua de Ayacucho 2012

Demoniokunapa ñakarichisqan runamanta

¹ Qochata chimparuspankum Gadara lawman chayarurqaku.

² Barcamanta Jesús uraykamuptillanmi mana allin espiritukunapa huntasqan runa panteonmanta lloqsiramuspan Jesusman asuykamurqa.

³ Chay runaqa panteonpim yachaq, paytaqa cadenakunawanpas manam chaqnayta atiqkuchu.

⁴ Achka kutipim cadenawan watarqaku, ichaqa chayllam tipiparuq, manam pipas sujetayta atiqchu.

⁵ Tutapas punchawpas panteonkunapi hinaspa orqokunapim qaparkachaspan rumikunawan takakustin purikuq.

⁶ Jesusta karullamantaraq rikuruspanmi kallpaspan ñawpaqninpi qonqorakuykurqa.

⁷ Hinaspam hatunmanta qaparispan nirqa: Tukuy imapa hawanpi munaychakuq Diospa Churin Jesús, ¿imatataq ñoqawan munanki? Diosraykum mañakuyki ama ñakarichiwanaykipaq, nispa.

⁸ Chaynataqa nirqa: ¡Mana allin espíritu kay runamanta lloqsiy! nispa Jesuspa nisqanraykum.

⁹ Hinaptinmi Jesús tapurqa: ¿Imataq sutiki? nispa. Chaymi payñataq nirqa: Legionmi, ñoqaykuqa achkallañam kaniku, nispan.

¹⁰ Jesustam llumpayta ruegakurqa: Amayá llumpay karumanqa qarqoruwaykuchu, nispan.

¹¹ Orqopa hichpanpim achka-achka kuchikuna mikuchkarqaku.

¹² Chaymi Jesusta ruegakuspa demoniokuna kaynata nirqaku: Wak kuchikunaman yaykurunaykupaqyá kachaykuwayku, nispanku.

¹³ Chaymi Jesús allinmi niptin mana allin espiritukunaqa runamanta lloqsiruspanku kuchikunaman ustururqaku, hinaptinmi waqtanta kallpaspanku qochaman pawaykuspa heqeparurqaku. Chay kuchikunaqa yaqa iskay waranqam karqaku.

¹⁴ Kuchi michiqkunañataqmi ayqespanku llaqtapi chaynataq chakrakunapipas willakachakururqaku, chaymi llapa runakuna imam pasakusqanta qawanankupaq kallparqaku.

¹⁵ Jesuspa kasqanman chayaruspankum demoniokunapa huntasqan runataqa allin pachasqata hinaspa yuyayninman kutisqataña tiyachkaqta tariykurqaku; chaymi llumpayta mancharikururqaku.

¹⁶ Demoniopa huntasqan runatawan kuchikunata imam pasarusqanta rikuqkunañataqmi llapa runakunaman willarurqaku.

¹⁷ Chaymi llapa runakuna Jesusta ruegarqaku llaqtankumanta pasakunanpaq.

¹⁸ Barcaman Jesús qespichkaptinmi demoniokunapa huntasqanmanta sanoyaq runa ruegakurqa: Qanwan riytam munani, nispa.

¹⁹ Jesusñataqmi mana munaspan nirqa: Wasikiman rispayki aylluykikunaman willakamuy, Diospa qanwan imam ruwasqanmantawan imaynam llakipayasusqaykimanta, nispa.

²⁰ Chay runam pasaspan Jesuspa sanoyarachisqanmanta Decápolis lawpi kaq chunkantin llaqtakunapi willakuyta qallaykurqa, hinaptinmi llapa runakuna uyarispanku admirakurqaku.

Jairopa churin kawsarisqanmantawan onqoq warmipa sanoyasqanmanta

²¹ Barcapi kutiramuspan qochapa patanpiña Jesús kachkaptinmi llapa runakuna huñunakaramurqaku, chayraykum patallanpi qeparurqa.

²² Chayllamanmi sinagogapi kamachikuq Jairo hamuruspan Jesuspa ñawpaqninpi qonqorakuykurqa.

²³ Hinaspanmi Jesusta ruegakuspan nirqa: Warmi churiymi wañuruchkanña, ama hina kaspa wasiyta hakuchik, makikita churaykamuptikiqa sanoyaspam kawsanqa, nispan.

²⁴ Jairowan Jesús pasaptinmi achkallaña runakuna ñitinakustin qatirqaku.

²⁵ Paykunapa chawpinpim, yaqa chunka iskayniyuq wataña yawarpakuywan onqoq warmi kachkarqa.

²⁶ Achka medicokunawanmi hampichikurqa, ichaqa manam sanoyayta atirqachu, tukuy kapuqnintapas yanqapaqmi gastarqa, aswanmi punchawkunapa pasasqanman hina peorchakurqa.

²⁷ Kay warmim Jesusmanta uyariruspan, runakunapa chawpinta rispan Jesuspa capanpa patanta qepanmanta llapchaykurqa,

²⁸ paymi nirqa: Pachallantapas llapchaykuspayqa sanoyarusaqmi, nispan.

²⁹ Llapchaykuptillanmi yawarpakuynin taniramurqa, hinaptinmi chay onqoymanta cuerpon sanoña kasqanta musyakururqa.

³⁰ Jesusñataqmi atiynin lloqsirusqanta musyakuruspan muyuriqninpi runakunata tapurqa: ¿Pitaq pachayta llapchaykamun? nispa.

³¹ Discipulonkunañataqmi nirqaku: Qawachkankitaq kaynaña runakuna ñitimususqaykitaqa. Chaychu ninki: “¿Pitaq llapchaykamuwan” nispayki?

³² Jesusmi ichaqa muyuriqninta qawarirqa llapchaykuqninta reqsinanpaq.

³³ Chay warmiñataqmi sanoyarusqanta musyakuruspan manchakuymanta katkatatastin qonqorakuykuspan imam kaqta willakurqa.

³⁴ Hinaptinmi chay warmita Jesús nirqa: Churilláy, iñiynikiman hinam sanoyarunki, kunanqa hawkañayá pasakuy, onqoynikimantaqa sanoyarunkiñam, nispa.

³⁵ Chaynata Jesús nichkaptinmi Jairopa wasinmanta hamuruspanku payman kaynata willarqaku: Churikiqa wañukunñam ¿imapaqñataq yachachikuqta pusanki? nispanku.

³⁶ Jesusñataqmi chay nisqankuta mana uyariqpas tukuspan Jairota nirqa: Ama manchakuychu, iñiy hinalla, nispa.

³⁷ Hinaspam runakuna qatinanta mana munarqachu, aswanqa Pedrotawan Jacobota hinaspa Jacobopa wawqen Juanllatam pusarikurqa.

³⁸ Jairopa wasinman chayaruspanmi llapa runakunata qaparispa waqachkaqta tariykurqa.

³⁹ Yaykuruspanmi paykunata nirqa: ¿Imanasqataq qaparillawanña wa-qachkankichik? Warmaqa manam wañusqachu kachkan aswanqa puñuchkanmi, nispa.

⁴⁰ Runakunañataqmi Jesusmanta burlakurqaku. Hinaptinmi Jesusqa llapa runakunata hawaman qarqoramuspan, warmapa taytanta, mamanta hinaspa riqmasin discipulonkunata pusarikuspan warmapa kasqanman yaykurqa.

⁴¹ Hinaspanmi warmata makinmanta hapiykuspan nirqa: ¡Talita cumi! nispan. Chayqa: “Warma, qamtam niki, hatariy”, ninanmi.

⁴² Hinaptinmi chay warma chaylla hatariruspan puriyta qallaykurqa. Payqa chunka iskayniyuq watanpiñam karqa. Llapa runakunañataqmi llumpayta admirakurqaku.

⁴³ Jesusmi ichaqa paykunata kamachirqa ama pimanpas willakunankupaq, kamachirqataqmi warmaman mikuchinankupaqpas.