Marcos 2 - CHUYA QELLQA La Biblia en Quechua de Ayacucho 2012

Suchuta Jesús sanoyachisqanmanta

¹ Punchawkuna pasaruptinmi, Capernaúm llaqtaman huktawan Jesús kutirqa. Chaymi wasipiña kasqanta yacharuspanku,

² llapa runakuna huñunakaramurqaku punkunta manaña yaykuy atinankukama. Jesusñataqmi Diospa chuya siminta yachachirqa.

³ Chaymanmi huk suchu runata tawa runakuna chakanapi apamurqaku.

⁴ Huntallaña kasqankuraykum Jesuspa kasqankamaqa mana apaykuyta atirqakuchu, chaymi wasipa qatanta Jesuspa kasqan lawta kicharamuspanku chay suchuta uraykachimurqaku.

⁵ Jesusñataqmi apamuqkunapa iñiyninkuta qawaykuspan chay suchuta nirqa: Churilláy, huchaykikunaqa pampachasqañam, nispa.

⁶ Chaypitaqmi tiyachkarqaku Diospa leynin yachachiqkunapas, paykunam kaynata yuyaymanarqaku:

⁷ ¿Imanasqataq kay runaqa chaynataqa riman? Chaynata nispaqa Diospa contranpim rimachkan, Diosllam huchakunataqa pampachan, nispanku.

⁸ Jesusñataqmi paykunapa yuyayma-nasqanta musyaruspan nirqa: ¿Imanasqataq chaynakunata yuyay-manachkankichik?

⁹ ¿Mayqantaq fácil kanman: Kay suchuta “huchaykikunaqa pampachasqañam” niychu, icha “hatarispayki chakanaykita hoqarispa puriy” niychu?

¹⁰ Kunanmi yachankichik Diosmanta hamuq runapa Churinqa huchakunata pampachananpaq kay pachapi atiyniyuq kasqanta, nispan. Chaynata niruspanmi suchuta nirqa:

¹¹ Qamtam niki, hatariy, chakanaykita hoqarispa wasikiman ripukuy, nispa.

¹² Suchuñataqmi chaylla hatarirurqa, hinaspam lliw runakuna qawachkaptin chakananta hoqarispa pasakurqa. Chayraykum llapa runakunaqa admirakuspanku Diosta yupaycharqaku kaynata: “Manam haykapipas kaynataqa rikurqanchikchu”, nispanku.

Leviyta Jesús qayasqanmanta

¹³ Chaymantam huktawan qochapa patanman Jesús rirqa, llapa runakuna payman asuykuptinñataqmi yachachirqa.

¹⁴ Richkaspanmi Jesús rikururqa Alfeopa churin Leviyta, Romapaq impuesto cobrananpi tiyachkaqta. Paytam nirqa: Qatiway, nispa. Chaymi Leviyqa hatarispan Jesusta qatikurqa.

¹⁵ Leviypa wasinpi Jesús mikuptinmi impuesto cobraqkunawan wakin huchasapa runakunapas, Jesuswan chaynataq discipulonkunawan kuska mikurqaku. Achkallaña runakunam payta qatikurqaku.

¹⁶ Diospa leynin yachachiqkunawan fariseokunañataqmi, Jesusta rikururqaku impuesto cobraqkunawan hinaspa huchasapakunawan mikuchkaqta, hinaspankum Jesuspa discipulonkunata tapurqaku: ¿Imanasqataq payqa impuesto cobraqkunawan hinaspa huchasapa runakunawan mikuchkan? nispanku.

¹⁷ Chayta uyariruspanmi paykunata Jesús nirqa: Sano runakunaqa manam medicotaqa necesitankuchu, aswanqa onqoqkunallam. Ñoqaqa hamurqani manam justo runakuna qayaqchu, aswanqa huchasapakuna qayaqmi, nispan.

Ayunomanta

¹⁸ Bautizaq Juanpa discipulonkunawan fariseokunapa discipulonkuna ayunachkaptinkum llapa runakuna Jesusman asuykuspanku tapurqaku: Juanpa discipulonkunawan fariseokunapa discipulonkunaqa ayunankum. ¿Imanasqataq discipuloykikunaqa mana ayunankuchu? nispanku.

¹⁹ Chaymi Jesusñataq nirqa: ¿Yaqachum casamientopi kaqkuna ayunanmanku paykunawan novio kach-kaptin? Chaypi novio kanankamaqa manam ayunanmankuchu.

²⁰ Chayamun-qam punchaw novio apasqa kananpaq, chay punchawpim ichaqa ayunanqaku.

²¹ Mawka pachataqa manam pipas musoq latapawanqa remiendanmanchu. Musoq latapaqa chintiruspanmi mawka pachata astawan llikirunman.

²² Manataqmi pipas mana poqosqa vinotaqa mawka odrekunamanqa hillpunmanchu, yanqañataq chay vino poqoruspan mawka odrekunata lliki-runman, hinaptinñataq vinopas chaynataq odrekunapas yanqachakurunman. Chayraykum mana poqosqa vinotaqa musoq odrekunaman hillpuna.

Espigakunata samana punchawpi rachusqankumanta

²³ Samana punchawpim Jesús richkarqa tarpusqa chakrapa chawpinta, richkaptinkum discipulonkunañataq trigo rachuyta qallaykurqaku.

²⁴ Hinaptinmi Jesusta fariseokuna nirqaku: ¿Imanasqataq discipuloykikunaqa samana punchawpi mana ruwana kaqkunata ruwanku? nispanku.

²⁵ Jesusñataqmi nirqa: ¿Manachu leerqankichik Davidwan puriqmasinkuna yarqaymanta kaspanku imam ruwasqankuta?

²⁶ Abiatar sumo sacerdote kachkaptinmi Diospa wasinman David yaykurqa, hinaspam Diospaq sapaqchasqa tantata sacerdotekunapa mikunallan kachkaptinpas mikuruspan puriqmasinkunamanpas qoykurqa.

²⁷ Kaytapas nisqaykichiktaqyá: Samana punchawqa runaraykum ruwasqa karqa, manam runatachu samana punchawrayku ruwarqa.

²⁸ Chayraykum nikichik, runapa Churinqa samana punchawpapas Señorninmi, nispa.