Marcos 16 - CHUYA QELLQA La Biblia en Quechua de Ayacucho 2012

Jesuspa kawsarimusqanmanta

¹ Samana punchaw pasaruptinmi, Magdala llaqtayuq María, Jacobopa maman María hinaspa Salomeypiwan, perfumekunata rantiramuspanku Jesuspa cuerponta untaq rirqaku.

² Hinaspankum domingo tutapayta, chayllaraq inti qespimuchkaptin sepulturaman rirqaku,

³ kaynata ninakuspanku: ¿Piraq sepulturapa punkunpi rumita suchuchipuwasunchik? nispanku.

⁴ Sepulturaman chayaruspankum, chay rumita huklawman suchuchisqataña tariykurqaku. Chay rumiqa hatunmi karqa.

⁵ Chaymi sepulturaman yaykuruspanku, huk joventa yuraq qoysu pachayuqta alleq lawpi tiyachkaqta rikururqaku, hinaspam mancharikurqaku.

⁶ Chay jovenñataqmi nirqa: Ama manchakuychikchu, qamkuna-qa Nazaretmanta kaq chakatasqanku Jesustam maskachkankichik, payqa manam kaypiñachu kawsarirunñam, hamuspayá maypim churasqankuta qawaykuychik.

⁷ Chaynaqa, rispaykichikyá Pedromanwan wakin discipulonkunaman willamuychik, Jesusqa Galilea lawman ñawpasqanta, chaypim nisqanman hina payta rikuykunkichik, nispa.

⁸ Hinaptinmi chay warmikunaqa sepulturamanta kallpaylla lloqsimurqaku manchakuymanta katkatatastin. Ichaqa manchakusqankuraykum mana pimanpas willakurqakuchu.

Magdala llaqtayuq Mariaman Jesuspa rikurisqanmanta

⁹ [Domingo tutapaytam, wañus-qanmanta Jesús kawsariruspan Magdala llaqtayuq Mariaman puntata rikuriykurqa, kay warmimantam ñawpaqta qanchis demoniokunata Jesús qarqorurqa.

¹⁰ Chaymi Mariaqa pasaspan Jesuspa puriqmasinkunaman willamurqa, paykunaqa llumpayta llakikuspankum waqachkarqaku.

¹¹ Paykunam ichaqa “Jesustam rikuramuni, payqa kawsachkasqam” nispa Mariapa nisqanta mana creerqakuchu.

Iskay discipulonkunaman Jesuspa rikurisqanmanta

¹² Chaypa qepantam, chakraman richkaptinku iskay discipulonkunaman Jesús rikuriykurqa.

¹³ Chaymi paykunapas pasaspanku wakin discipulokunaman willamurqaku, paykunam ichaqa mana creerqakuchu.

Ripukunallanpaqña Jesuspa kamachikusqanmanta

¹⁴ Chaymantam Jesusqa chunka hukniyuq discipulonkunaman rikuriykurqa, mikunankupaq mesapi tiyachkaptinku, hinaspam mana creesqankumantawan rumi sonqo kasqankumanta qaqcharqa. Paykunaqa Jesusta kawsachkaqtaña rikuqkunapa willakusqantam mana creerqakuchu.

¹⁵ Chaymi paykunata Jesús nirqa: Tukuy hinastinman rispaykichik kay evangeliota llapa runakunaman willakamuychik.

¹⁶ Pipas iñispa bautizasqa kaqmi salvasqa kanqa, mana iñiqñataqmi condenasqa kanqa.

¹⁷ Ñoqapi iñiqkunam kaykunata ruwanqaku: Sutiypim demoniokunata qarqonqaku, musoq rimaykunatam rimanqaku,

¹⁸ maqta urukunatam hapinqaku; imataña venenoyuqta tomaruptinkupas manam imananqachu; onqoqkunamanmi makinkuta churanqaku, hinaptinmi sanoyanqaku, nispan.

Hanaq Pachaman Jesuspa ripukusqanmanta

¹⁹ Señor Jesusmi discipulonkunawan rimayta tukuruspan hanaq pachaman hoqarisqa karqa, hinaspanmi Diospa alleq lawninpi tiyaykurqa.

²⁰ Chaymi discipulonkuna rispanku tukuy hinastinpi willakamurqaku, kikin Señormi paykunata yanaparqa willakusqankuta milagrokunawan cheqapchaspan].