Marcos 15 - CHUYA QELLQA La Biblia en Quechua de Ayacucho 2012

Gobernador Pilatoman Jesusta apasqankumanta

¹ Achikyaruptinmi sacerdotekunapa kamachiqninkunawan ancianokuna, Diospa leynin yachachiqkuna hinaspa cortepi kamachikuqkuna huñunakururqaku, hinaspam Jesusta chaqnaruspanku gobernador Pilatoman entregaykurqaku.

² Chaymi Jesusta Pilato tapurqa: ¿Qamchu kachkanki judiokunapa reynin? nispa. Hinaptinmi payñataq nirqa: Qanmi nirunki, nispan.

³ Sacerdotekunapa kamachiqninkunam Jesusta tukuy imamanta llumpayta acusarqaku.

⁴ Chaymi Jesusta huktawan Pilato tapurqa: ¿Manachu imallatapas rimarinki? Uyariyá contraykipi tukuy ima rimasqankuta, nispa.

⁵ Jesusmi ichaqa mana imatapas rimarirqachu, chaymi Pilatoqa hukman-yarurqaraq.

Jesusta wañunanpaq sentenciasqankumanta

⁶ Sapa Pascua fiestapim Pilatoqa llapa runakunapa mañakusqanman hina huk presota kachariq.

⁷ Carcelpim kachkarqa huk preso Barrabás sutiyuq, paymi wakin runakunawan kuska chaqwata ruwaspa runakunata wañurachirqa.

⁸ Chaymi llapa runakuna hamuspanku Pilatota mañakurqaku costumbrenman hina huk presota kacharinanpaq.

⁹ Hinaptinmi Pilato nirqa: ¿Munankichikchu judiokunapa reynin kacharinayta? nispa.

¹⁰ Chaynataqa tapurqa Jesusmanta envidiakuspanku llapa sacerdotekunapa kamachiqninkuna payman entregasqankuta musyaruspam.

¹¹ Ichaqa sacerdotekunapa kamachiqninkunam llapa runakunata yacharachirqaku: “Barrabasta kachariy”, nispa mañakunankupaq.

¹² Pilatoñataqmi huktawan tapurqa: Chaynaqa, ¿ima ruwanaytataq mu-nankichik “judiokunapa Reynin” nisqaykichikwanqa? nispa.

¹³ Paykunañataqmi huktawan qapa-rirqaku: ¡Chakatay! nispanku.

¹⁴ Chaymi Pilato nirqa: ¿Ima mana allintañataq ruwarurqa? nispa. Ichaqa runakunam astawanraq qapa-rirqaku: ¡Chakatay! nispanku.

¹⁵ Chaymi Pilatoqa llapa runakunawan allinpi kananrayku Barrabasta carcelmanta kachaykachirqa, Jesustañataqmi azoterachispan chakatamunankupaq entregaykurqa.

¹⁶ Hinaptinmi llapa soldadokunañataq palaciopa pationman aparuspanku llapa tropata huñururqaku.

¹⁷ Chaypim morado pachawan hinarachispanku umanmanñataq kichkamanta simpasqa coronata churaykurqaku.

¹⁸ Hinaspam burlakuspanku nirqaku: ¡Kawsachun judiokunapa Reynin! nispanku.

¹⁹ Soqoswanmi umanpi waqtarqaku, hinaspam toqaykurqaku. Qonqo-rakuspankum hatunchaq tukuspankuraq burlakurqaku.

²⁰ Burlakuyta tukuruspankum morado pachata hurqoykuspa kikinpa pachanwan churarachirqaku, hinaspankum chakatanankupaq aparqaku.

Jesusta chakatasqankumanta

²¹ Cirene llaqtayuq Simonmi chakramanta hamuchkarqa, payqa karqa Alejandropawan Rufopa taytanmi. Simontam chayninta pasachkaqta soldadokuna hapiruspanku Jesuspa cruzninta hombrochirqaku.

²² Jesustam Golgotaman aparurqaku. Golgotaqa “Calavera” ninanmi

²³ Hi-naspankum mirra nisqanwan chaqrusqa vinota tomananpaq qorqaku, Jesusmi ichaqa mana tomarqachu.

²⁴ Jesusta chakataruspankum, llapa soldadokuna Jesuspa pachanta sortearqaku apakunankupaq.

²⁵ Isqon hora paqariytam Jesusta chakatarurqaku.

²⁶ Hinaspankum imamantam wañuchisqankuta huk letrerota qellqarqaku: “KAYMI JUDIOKUNAPA REYNIN”, niqta.

²⁷ Jesustawan kuskatam iskay suwakunata chakatarurqaku, huknintam alleq lawninpi, huknintañataq ichoq lawninpi.

²⁸ [Chaynapim Qellqapa kayna nisqan cumplikurqa: Huchasapakunawan hukllawasqam karqa], nispa.

²⁹ Chaynin puriqkunapas umankuta aywispam kaynata kamirqaku: ¡Yaw! Qamqa templotapas tuñichispam kimsa punchawllapi hatarichisaq nirqanki,

³⁰ chaynaqa kikikita librakuspaykiyá chay cruzmanta uraykamuy, nispanku.

³¹ Chaynallataqmi sacerdotekunapa kamachiqninkunawan Diospa leynin yachachiqkunapas Jesusmanta burlakuspanku ninakurqaku: Wakinkunatam librarqa kikinmi ichaqa mana librakuyta atinchu.

³² ¡Israelpa reynin Cristo kaspaqa kunanyá cruzmanta uraykamuchun, chayta qawaspa iñinanchikpaq! nispanku. Jesuswan kuska chakatasqa kaqkunapunipas kamirqakum.

Jesuspa wañukusqanmanta

³³ Chawpi punchawmanta kimsa hora tardeykuykamam kay pacha tutayarurqa

³⁴ Hinaptinmi chay horata Jesús qaparirqa: Eloi, Eloi, ¿lama sabactani? nispan. Chayqa: “Diosnilláy, Diosnilláy, ¿imanasqataq saqerullawanki?” ninanmi.

³⁵ Chaypi kaqkunamantam wakiqninku chayta uyarispa nirqaku: Uyariychik profeta Eliastam qayakuchkan, nispanku.

³⁶ Hinaptinmi huk runa kallpaykuspan esponjata vinagreman challpuykurqa, hinaspam soqosman wataruspan Jesusman tomachinanpaq haywarqa: Qawasunchik, yaqachus cruzmanta uraykachinanpaq Elías hamurunqa, nispan.

³⁷ Jesusmi ichaqa nisyuta qaparispan wañukurqa.

³⁸ Hinaptinmi templopi velo hanaymanta urayman llikikuruspan iskayman rakikururqa.

³⁹ Soldadokunapa capitanninmi Jesuspa chimpanpi sayachkarqa. Paymi imaynam Jesuspa wañusqanta qawaspan nirqa: Cheqaptapunim kay runaqa Diospa Churin kasqa, nispan.

⁴⁰ Chaypitaqmi kachkarqaku wakiqnin warmikunapas karullamanta qawaspanku. Paykunawanmi kachkarqa Magdala llaqtayuq Mariawan sullka kaq Jacobopa, Joseypa hinaspa Salomeypa mamanku Mariapas.

⁴¹ Chay warmikunam Galilea lawpi puriptin Jesusta qatispa yanaparqaku. Chaypitaqmi kachkarqaku Jesuswan kuska Jerusalenman hamuq warmikunapas.

Jesusta pampasqankumanta

⁴² Viernes punchaw tardeykuytam (chay punchawpim samana punchawpaq allichakuqku), manaraq tutaykuruchkaptin,

⁴³ Arimatea llaqtayuq José kallpanchakuspan Pilatopa kasqanman yaykurqa Jesuspa cuerponta mañananpaq. Joseyqa karqa judiokunapa cortenpi reqsisqa runam, paypas Diospa munaychakuynintam suyachkarqa.

⁴⁴ Pilatoñataqmi Jesuspa wañukusqantaña yachaykuspan hukmanyarurqa, chaymi soldadokunapa capitanninta qayaspa tapurqa ima horatam wañukusqanta yachananpaq.

⁴⁵ Pilatoman Jesuspa wañukusqanta capitán willaykuptinmi, Jesuspa cuerponta Joseyman qoykunankupaq kamachikurqa.

⁴⁶ Chaymi Joseyqa Jesuspa cuerponta cruzmanta uraykachispan rantimusqan fino sabanaswan wankuykurqa. Chaymantam qaqapi toqosqa sepulturaman churaykuspan hatun rumiwan punkunta taparurqa.

⁴⁷ Magdala llaqtayuq Mariawan Joseypa maman Mariañataqmi maypim pampasqankuta qawarqaku.