Marcos 14 - CHUYA QELLQA La Biblia en Quechua de Ayacucho 2012

Jesusta wañuchiy munasqankumanta

¹ Iskay punchawllañam Pascua fiestapaq otaq mana levadurayuq tanta mikunanku fiestapaq faltachkarqa. Llapa Sacerdotekunapa kamachiqninkunawan Diospa leynin yachachiqkunañataqmi Jesusta engañollawan hapiruspa wañurachinankupaq tanteanakurqaku.

² Chaymi ninakurqaku: Fiestapiqa ama hapisunchu, yanqañataq runakuna chaqwakunmanku, nispanku.

Jesusman perfumeta huk warmipa tallisqanmanta

³ Jesusmi Betania llaqtapi kachkarqa lepramanta sanoyaq Simonpa wasinpi. Chaypi mikuchkaptinmi huk warmi chayaramurqa rumimanta pomochapi achka qollqepa chanin perfume aparisqa, hinaspanmi chay pomochata pakiruspan Jesuspa umanman talliykurqa.

⁴ Hinaptinmi chaypi kaqkunamanta wakiqninku piñakuspa ninakurqaku: ¿Imanasqataq kay achka qollqepa chanin perfumeta usurachin?

⁵ Kaytaqa huk wata jornalpa chanin qollqepi rantikuruspam wakchakunata yanapanmanku karqa, nispanku. Chaynata nispanku warmita qaqchaptinkum,

⁶ Jesusñataq nirqa: Upallaychik, ¿imanasqataq kay warmipa contranpi rimankichik? Payqa allintam ñoqapaq ruwarun.

⁷ Wakchakunaqa haykapikamapas qamkunawanmi kanqa, chaynapi munarisqaykichik hora yanapanaykichikpaq, ñoqam ichaqa manaña tukuy tiempochu qamkunawan kasaq.

⁸ Kay warmiqa imam atisqantam ruwarun, cuerpoy pampasqa kananpaqmi perfumewanraq talliwaspan alistarun.

⁹ Cheqaptapunim nikichik, kay pachapi maypipas Diosmanta allin noticia willakusqa kaptinmi kay warmipa ruwasqanpas willakusqa kanqa, chaynapi paymanta yuyarinankupaq, nispa.

Jesusta entregananpaq Judaspa ofrecekusqanmanta

¹⁰ Judas Iscariotem Jesusta entre-gananpaq sacerdotekunapa kamachiqninkunawan rimaq rirqa, payqa chay chunka iskayniyuq discipulokunapa hukninmi karqa.

¹¹ Paykunam Judaspa nisqanta uyariykuspanku kusikurqaku hinaspam qollqeta paganankupaq prometekurqaku. Chaymantapunim Judasqa Jesusta imaynam entregaykuyta maskarqa.

Discipulonkunawan Jesuspa cenasqanmanta

¹² Mana levadurayuq tantata mikunanku fiestapa qallariynin punchawpim otaq Pascua carnerota wañuchinanku punchawpim, Jesusta discipulonkuna tapurqaku: ¿Maypitaq cenanaykipaq Pascua mikuyta ruwamusaqku? nispanku.

¹³ Chaymi iskay discipulonkunata kamachirqa: Llaqtaman rispaykichikmi puyñupi yaku apachkaq runawan tupankichik, payta qatispaykichikmi,

¹⁴ maymi yaykusqan wasipa dueñonta ninkichik: “Yachachikuqmi nin: ¿Mayqan cuartopitaq Pascua mikuyta discipuloykunawan cenasaq?” nispa.

¹⁵ Payñataqmi wasipa altosninpi hatun cuartota allichasqataña qawachisunkichik, chaypim mikunanchikpaq ruwamunkichik, nispa.

¹⁶ Chay iskay discipulonkunam llaqtaman chayaruspanku, Jesuspa nisqanman hina tarirurqaku, hinaspam Pascua mikuyta ruwarurqaku.

¹⁷ Tutaykamuchkaptinñam chunka iskayniyuq discipulonkunapiwan Jesús chayaramurqa.

¹⁸ Chaymi mikuspa tiyachkaptinku Jesús nirqa: Cheqaptam nikichik, kaypi ñoqawan mikuqmantam hukkaqnikichik entregawanqa, nispa.

¹⁹ Chaymi paykunañataq llakisqallaña sapakama tapukurqaku: ¿Ñoqachu? nispanku.

²⁰ Hinaptinmi Jesusñataq nirqa: Qamkunamanta ñoqawan kuska platoman tanta challpuqmi.

²¹ Runapa Churinqa Qellqapa nisqanman hinam ripukunqa, ichaqa ¡imaynaraq kanqa traicionaqnin runaqa, amapas nacenmanchu karqa! nispa

²² Mikuchkaptinkum tantata Jesús hapiykuspan Diosman graciasta qorqa, tantata pakiykuspanmi paykunaman kaynata nispan aypurqa: Hapiychik, kaymi cuerpoy, nispa.

²³ Chaymantam vasota hapiykuspan Diosman graciasta qorqa, hinaspam paykunaman qoykuptin vasomanta llapallanku tomarqaku.

²⁴ Chaymi Jesús nirqa: Kaymi qamkunawan musoq pacto ruwasqay yawarniy, kay yawarmi achkaqpa rantinpi chaqchusqa kanqa.

²⁵ Cheqaptapunim nikichik, manañam uvaspa rurunmantaqa tomasaqñachu Diospa munaychakuyninpi musoq vinota tomanaykama, nispa.

Jesusta Pedro negananmanta

²⁶ Himnokunata takiruspankum Olivos moqoman pasarqaku.

²⁷ Chaypim Jesús nirqa: Kunan tutam llapallaykichik saqewankichik, Chuya Qellqapim nichkan: “Michiqta wañurachiptiymi ovejakuna cheqerunqaku”, nispa.

²⁸ Ichaqa kawsariramuspaymi qamkunamanta puntata Galileaman risaq, nispa.

²⁹ Pedroñataqmi nirqa: Llapallankuña saqesuptikipas ñoqaqa manam saqesqaykichu, nispa.

³⁰ Chaymi Jesús nirqa: Cheqaptam niki, kunan tutam manaraqpas utulu iskay kutikama waqachkaptin kimsa kutikama negawanki, nispa.

³¹ Pedroñataqmi kutipakuspan nirqa: Qanwan kuskaña wañunay kaptinpas manapunim negasqaykichu, nispa. Chaynallatam llapallan discipulonkunapas nirqaku.

Getsemaniypi Jesuspa mañakusqanmanta

³² Getsemaniyman chayaruptinkum, discipulonkunata Jesús nirqa: Diosta mañakamunaykama kayllapi tiyachkaychik, nispa.

³³ Hinaspanmi Pedrotawan, Jacobota chaynataq Juanta pusarikurqa, chaypim sinchi llakikuywan manchakuy payman yaykuykurqa.

³⁴ Chaymi paykunata nirqa: Sonqoymi wañukunaypaq hinaña ancha llakisqallaña kachkan, chaynaqa kaypi qepaspayá rikchanpalla kachkaychik, nispa.

³⁵ Chaymantam waklawniqman pasas-pan qonqorakuykuspan pampakama kumukuykurqa, hinaspam Diosta mañakurqa, sichu pay munaptinqa chay ñakarinan hora ama chayamunanpaq.

³⁶ Mañakuspanmi nirqa: Taytalláy, qampaqqa tukuy imapas atinallaykim, kay ñakariymantayá libraykullaway, ichaqa amayá ñoqapa munasqaychu kachun aswanqa qampa munasqaykiyá, nispa.

³⁷ Discipulonkunapa kasqanman kutispanmi puñuchkaqta tariykurqa, chaymi Pedrota nirqa: Simón, ¿puñuchkankichu? ¿Mana-chu huk horallatapas rikchayta atir-qanki?

³⁸ Rikchaspayá Diosta mañakuychik ama tentasqa kanaykichikpaq. Espirituykichikqa chayllam kachkan yanapasunaykichikpaq, aychaykichikmi ichaqa mana kallpayuq kachkan, nispa.

³⁹ Jesusmi huktawan rispan hina chaynallata mañakurqa.

⁴⁰ Huktawan Kutimuspanmi discipulonkunata puñuchkaqta tariykurqa. Puñuymi paykunata llumpayta intuykurqa, chaymi manaña ima niytapas atirqakuchu.

⁴¹ Kimsa kaq kutipi mañakamusqanmanta kutiramuspanmi nirqa: ¿Hinallaraqchu puñuspa samachkankichik? Hinañayá kachun, runapa Churinta huchasapakunapa makinman entregananku horam chayaramunña.

⁴² ¡Hatariychik, hakuña! Traicionawaqniymi hamuchkanña, nispa.

Jesusta presochasqankumanta

⁴³ Jesús rimachkaptinraqmi Judas chayaramurqa, payqa chunka iskayniyuq discipulonkunapa hukninmi karqa. Paywanmi achkallaña runakuna hamurqaku espadayuqkama hinaspa kaspintinkama. Paykunaqa hamurqaku sacerdotekunapa kamachiqninkunapa, Diospa leynin yachachiqkunapa hinaspa ancianokunapa kachamusqankum.

⁴⁴ Judasmi chay runakunata kaynata yachachimurqa: Pim muchaykusqay kaqtam hapinkichik, paytam ama kacharispa apankichik, nispa.

⁴⁵ Chaymi Judasqa Jesusman asuykuspan nirqa: Yachachikuq, nispa. Chaynata niykuspanmi muchaykurqa.

⁴⁶ Hinaptinmi llapa runakunañataq Jesusta hapiruspa presocharurqaku.

⁴⁷ Ichaqa chaypi kaqkunamantam hukkaqninku, espadanta hurqoykuspan sumo sacerdotepa criadonpa rinrinta qorururqa.

⁴⁸ Jesusñataqmi chay runakunata nirqa: ¿Suwata hina hapiwanaykichikpaqchu espadayuqkama chaynataq kaspikuyuqkama hamurqankichik?

⁴⁹ Sapa punchawmi ñoqaqa templopi yachachispay qamkunawan karqani, ¿imanasqataq mana chaypiqa presochawarqankichikchu? Kaykunaqa pasakun Qellqapa nisqan cumplikunanpaqmi, nispa.

⁵⁰ Hinaptinmi llapa discipulonkuna Jesusta sapallanta saqeruspa ayqekurqaku.

Huk jovenpa lluptikusqanmanta

⁵¹ Huk jovenmi sabanaswan wankikuykuspa Jesusta qatirqa. Paytam hapirurqaku.

⁵² Ichaqa paymi sabanasta wikutispan qalalla lluptikururqa.

Jesusta cortepi tapupayasqankumanta

⁵³ Sumo sacerdotepa qayllanmanmi Jesusta pusarurqaku, chaypim llapa sacerdotekunapa kamachiqninkunawan ancianokuna hinaspa Diospa leynin yachachiqkuna huñunakururqaku.

⁵⁴ Pedroñataqmi sumo sacerdotekunapa pationkama karu qepallanta qatirqa. Chaypim ninapi qonikuspan guardiakunawan kuska tiyaykurqa.

⁵⁵ Sacerdotekunapa kamachiqninkunawan cortepi kaqkunam Jesuspa contranpi tukuy imata maskarqaku, chaywan acusaspa wañuchinankupaq, ichaqa manam imatapas tarirqakuchu.

⁵⁶ Achka runakunam Jesuspa contranpi llullakuspa rimarqaku ichaqa rimasqankum mana tuparqachu.

⁵⁷ Wakiq-ninkum sayarispanku yanqamanta Jesusta acusaspanku kaynata nirqaku:

⁵⁸ Kay runam uyarichkaptiyku nirqa: “Ñoqam runakunapa ruwasqan templota tuñirachisaq, hinaspam mana runapa ruwasqan templotaña kimsa punchawllapi hatarirachisaq”, nispan.

⁵⁹ Ichaqa chaynata nichkaptinkupas rimasqankuqa manam tuparqachu.

⁶⁰ Hinaptinmi sumo sacerdote hatarispan chawpinkupi sayaykuspan Jesusta tapurqa: ¿Manachu imallatapas rimarinki? ¿Imatataq kay runakuna contraykipi rimachkanku? nispa.

⁶¹ Jesusmi ichaqa mana imatapas rimarispan upallalla karqa. Hinaptinmi sumo sacerdote huktawan tapurqa: ¿Qamchu kachkanki Diospa Churin Cristo? nispa.

⁶² Chaymi Jesusñataq nirqa: Arí, ñoqam kani. Qamkunam runapa Churinta rikunkichik Tukuy Atiyniyuq Diospa alleqninpi tiyachkaqta hinaspa hanaq pachamanta puyupi hamuchkaqta, nispa.

⁶³ Sumo sacerdoteñataqmi piñakuspanraq pachankunata llikipakuspan nirqa: ¿Imapaqñataq testigokunatapas mu-nachwan?

⁶⁴ Qamkunapas uyarichkankichikmi Diospa contranpi rimasqantaqa, ¿imaninkichiktaq? nispa. Chaymi llapallanku nirqaku: ¡Hucha-yuqmi, wañuchun! nispanku.

⁶⁵ Chaynata nispankum wakiqninku toqaykurqaku, wakinñataqmi ñawinta taparuspa takarqaku, hinaspam nirqaku: Niykuwayku, ¿pitaq takasuchkanki? nispanku. Guardiakunapas uyanpim laqechurqaku.

Jesusta Pedro negasqanmanta

⁶⁶ Uku patiopi Pedro kachkaptinmi sumo sacerdotepa criadan hamururqa, hinaspanmi Pedrota ninapi qonikuchkaqta rikururqa,

⁶⁷ hinaspanmi nirqa: Qampas Nazaretmanta kaq Jesuswan puriqmi kachkanki, nispan.

⁶⁸ Pedroñataqmi nirqa: Imatachá rimakunkipas, paytaqa manam reqsinichu, nispa. Chaynata nispanmi punkuman lloqsirurqa, hinaptinmi utulu waqaramurqa.

⁶⁹ Huktawan rikuruspanmi chaypi kaqkunaman chay criada nirqa: Kay runaqa Jesuspa puriqmasinmi, nispa.

⁷⁰ Pedrom ichaqa huktawan negakurqa. Tumpa unayllanmanmi chaypi kaqkunapas Pedrota nirqaku: Cheqaptapunim paykunapa huknin kanki, qampas Galileamantam kanki, nispanku.

⁷¹ Chaymi Pedroqa ñakaspanraq jurarqa: Manam wak runataqa reqsinichu, nispa.

⁷² Chayllamanmi utuluqa iskay kutitakama waqaramurqa hinaptinmi Pedro yuyarirurqa Jesuspa kayna nisqanta. Paymi nirqa: “Manaraqpas iskay kutita utulu waqachkaptinmi kimsa kutikama negawanki”, nispa. Chayta yuyariruspanmi waqakuyta qallaykurqa.