Marcos 13 - CHUYA QELLQA La Biblia en Quechua de Ayacucho 2012

Templo tuñichisqa kananmanta

¹ Templomanta Jesús lloqsichkaptinmi huknin discipulon nirqa: Yachachikuq, ¡kay suma-sumaq templotawan ruminkunata qaway! nispan.

² Chaymi Jesusñataq nirqa: ¿Qawachkankichu kay suma-sumaq templota? Manam chulla rumillapas perqasqaqa puchunqachu, lliwmi tuñichisqa kanqa, nispa.

Jesuspa kutimunanpa ñawpaqninta imakunam pasakunanmanta

³ Chaymantam templopa chimpan Olivos moqoman rirqaku. Chaypi Jesús tiyaykuptinmi, Pedrowan Jacobo, Juan hinaspa Andrés sapaqpi tapurqaku:

⁴ Yachachikuq, ¿haykapitaq kay nisqaykikunaqa kanqa? ¿Ima señalkunataq kanqa tukuy chaykuna cumplikusqanta yachanaykupaq? nispanku.

⁵ Hinaptinmi Jesusñataq nirqa: Pipas pantachisunaykichikmantayá allinta cuidakuychik.

⁶ Achkaqmi ñoqapa sutiypi hamunqaku: “Ñoqam Cristo kani” nispanku; chaynata rimaspankum achkaqta pantachinqaku.

⁷ Guerrakunamanta otaq guerrakuna kananmanta rimayta uyarispaykichikqa amam manchakunkichikchu, chaykunaqa pasakunanpunim, ichaqa manaraqmi kay tiempopa tukupayninraqchu.

⁸ Huk nacionmi huk nacionpa contranpi hatarinqa, huk reymi huk reypa contranpi hatarinqa; terremotokunapas kaypi chaypim kanqa, muchuykunapas kanqam. Chaywanpas kaykunaqa ñakariykunapa qallariyllanraqmi.

⁹ Qamkunaqa kikikichikyá cuidakuychik, juezkunaman entregasqam kankichik, sinagogakunapim maqasqa kankichik. Ñoqaraykum kamachikuqkunapa chaynataq reykunapa qayllanman apasqa kankichik, chaynapim paykunamanpas ñoqamanta willakunkichik.

¹⁰ Manaraq kay tiempo tukuchkaptinmi kay evangelio lliw nacionkunapi willakusqa kanqa.

¹¹ Autoridadkunaman apasuptikichikqa amam llakikunkichikchu imam rimanaykichikmantaqa, aswanqa Diosmi yachachisunkichik chay ratopi imam rimanaykichiktaqa, manam kikillaykichikmantachu rimankichikqa. Chuya Espiritum yachachisunkichik imam rimanaykichikta.

¹² Huk runam wawqenta wañuyman entreganqa, taytapas churintam entre-ganqa; wawa-churikunapas tayta-mamankupa contranpi hatarispam wañuchinqaku.

¹³ Ñoqaraykum lliw runakuna cheqnisunkichik, ichaqa tukupaykama takyaqmi salvasqa kanqa.

¹⁴ Sichum [Profeta Danielpa qellqasqanman hina] templopi millakuypaq kaqkuna ruwasqata rikuspaykichikqa (pipas kayta leeqqa entiendechunyá), Judeapi kaqkunayá orqokunaman ayqeychik.

¹⁵ Wasipa hawanpi kaqpas amañayá wasinmanqa imapas hurqoqqa uraykuchunñachu.

¹⁶ Chakrapi kaqpas amañayá capan hoqariqqa kutichunchu.

¹⁷ ¡Imaynaraq kanqaku chay punchawkunapi wiksayuq otaq ñuñuq wawayuq warmikunaqa!

¹⁸ Diostayá mañakuychik kaykunaqa ama para tiempopichu kananpaq.

¹⁹ Chay punchawkunapiqa hatu-hatun ñakariymi kanqa, chayna ñakariyqa manam kay pachata Dios unanchasqanmanta kunankamapas karqachu, manataqmi qepamanpas kanqachu.

²⁰ Sichum chay punchawkunata mana Dios asllayachiptinqa manachá pipas wañuymanta librakunmanchu. Aswanqa akllasqankunaraykum chay punchawkunata asllayachinqa.

²¹ Chaynaqa, sichum pipas nisunkichik: “Qawaychik, kaypim Cristo kachkan”, otaq “Wakpim Cristo kachkan” nispa, hinaptinqa amam creenkichikchu.

²² Cristo tukuqkunawan profeta tukuqkunam rikurimunqaku, hinaspam admirakuypaq milagrokunata ruwaspanku Diospa akllasqan kaqkunatapas engañanqaku.

²³ Chaynaqa, waqaychakuychikyá, manaraq imapas pasakuchkaptinmi tukuy kaykunataqa willachkaykichikña.

Imaynam Jesucristopa kutimunanmanta

²⁴ Chay punchawkunapi ñakariykuna pasaruptinmi, inti tutayarunqa, killapas manañam kanchanqañachu,

²⁵ chaskakunam wichimunqa, cielokunapi tukuy ima kaqkunapas katkatatanqam.

²⁶ Chaymi runapa Churinta puyupi tukuy atiyniywan hinaspa kanchariyniywan hamuchkaqta llapallan runakuna rikunqaku.

²⁷ Paymi angelninkunata kamachinqa llapallan akllasqankunata kay pachapa patanmanta-patankama may karupiña kaptinkupas huñumunankupaq.

Jesucristoqa qonqayta kutimunanmanta

²⁸ Higos sachamantayá yachaychik: Kallmankuna llulluyariptinmi llaqenkuna ikllimun, chaymi yachankichik qoni tiempo hichpamusqanta.

²⁹ Chaynataqmi qamkunapas, kay nisqaykuna pasakuqta rikuspaykichikqa, runapa Churin kutimunan tiempo hichpallaña kasqanta yachankichik.

³⁰ Cheqaptapunim nikichik, tukuy kaykunaqa cumplikunqa manaraqpas kay miray runakuna tukuchkaptinmi.

³¹ Hanaq pachawan kay pachapas tukunqam, palabraykunam ichaqa wiñaypaq takyanqa.

³² Chaywanpas ima punchawmi hinaspa imay horatam runapa Churin kutimunantaqa manam pipas yachanchu, hanaq pachapi angelkunawan runapa Churinpas manam yachankuchu, aswanqa Dios Taytallam.

³³ Chaynaqa, rikchan-rikchanlla kaspayá Diosta mañakuychik, manam yachankichikchu haykapim kutimunayta.

³⁴ Nisqayqa rikchakun, imaynam huk runa karuman illananpaq serviqninkunaman nanachikunankupaq wasinta saqeykuqmanmi, paymi sapakamaman imam ruwanankupaq saqerqa. Punku cuidaqtapas rikchan-rikchanlla kananpaqmi kamachirqa.

³⁵ Chaynaqa, qamkunapas rikchan-rikchanllayá kaychik, manam yachankichikchu wasiyuqpa imay horam kutimunantapas. Ichapas tutaykuqta, chawpi tutata, utulu waqayta otaq achikyamuytapas kutiramunqa.

³⁶ Yanqañataq qonqaymanta chayaramuspan puñuchkaqta tariramusunkichikman.

³⁷ Qamkunaman willasqaytaqa lliwmanmi willani, chaynaqa rikchan-rikchanllayá kaychik, nispa.