Marcos 1 - CHUYA QELLQA La Biblia en Quechua de Ayacucho 2012

Bautizaq Juan purunpi willakusqanmanta

¹ Kaykunam Diospa Churin Jesu-cristomanta allin noticiakunapa qallariynin.

² Profeta Isaiasmi kaynata qellqarqa: “Qanmanta puntatam ñoqamanta willakuqta kachani, paymi rinayki ñanta allichanqa.

³ Huk qapariymi purunpi uyarikun: ¡Señorpa hamunan ñanta allichaychik, purinan ñanta derechaychik!” nispa.

⁴ Juanmi purunpi bautizaspa kaynata nirqa: Huchaykichikmanta wanakuspa bautizachikuychik, chaynapi huchaykichikta Tayta Dios pampachasunaykichikpaq, nispa.

⁵ Payta uyarinankupaqmi Judea lawmantawan Jerusalén llaqtamanta lliw runakuna rirqaku, hinaspam huchankuta willakuptinku Juanñataq Jordán mayupi bautizarqa.

⁶ Juanpa pachanmi karqa camellopa pelonmanta, weqaw watakunanñataqmi qaramanta karqa. Mikunanñataqmi karqa aqaruway urukunawan purun abejapa miskin.

⁷ Juanmi willakuspan nirqa: Qepaytam hamuchkan ñoqamanta aswan atiyniyuq. Ñoqaqa manam usutanpa watullantapas paskanaypaq hinachu kani.

⁸ Ñoqaqa yakullawanmi bautizarqaykichik, paymi ichaqa Chuya Espirituwan bautizasunkichik, nispa.

Jesuspa bautizachikusqanmanta

⁹ Chay punchawkunapim Galilea lawpi Nazaret llaqtamanta Jesús hamurqa, hinaspanmi Juanwan Jordán mayupi bautizachikurqa.

¹⁰ Yakumanta lloqsimuchkaspanmi Jesusqa qonqayta rikururqa hanaq pacha kicharikuchkaqta hinaspa Diospa Espiritun paloma hina payman uraykamuchkaqta.

¹¹ Hinaptinmi hanaq pachamanta huk rimay uyari-kamurqa: “Qanmi kuyasqay Churiy kanki, qamraykum kusisqa kachkani”, nispa.

Jesús tentasqa kasqanmanta

¹² Chaymantam Diospa Espiritunqa Jesusta purunman aparurqa.

¹³ Chaypim purun animalkunapa kasqanpi tawa chunka punchaw kamurqa, hinaspam Satanaspa tentasqan karqa; angelkunañataqmi Jesusta servirqaku.

Jesuspa willakuy qallarisqanmanta

¹⁴ Juanta carcelaruptinkum Galilea lawman Jesús rirqa Diospa munaychakuyninmanta allin noticiata kaynata willakustin:

¹⁵ Tiempom chayaramunña, Diospa munaychakuyninmi hichparamunña, huchaykichikmanta wanakuspaykichik Diosmanta allin noticiata chaskikuychik, nispa.

Challwaqkunata Jesuspa qayasqanmanta

¹⁶ Jesusmi Galilea qochapa patanpi purichkaspan Simontawan wawqen Andresta rikururqa. Paykunaqa challwaqkunam karqaku hinaspam mallankuwan challwachkarqaku.

¹⁷ Chaymi paykunata Jesús nirqa: Qatiwaychik, runakuna challwaqtañam ruwasqaykichik, nispa.

¹⁸ Hinaptinmi mallankuta saqespa Jesusta chaylla qatikurqaku.

¹⁹ Chaymanta richkaspanmi Jesús rikururqa Jacobotawan Juanta, mallan-kuta barcapi sirapachkaqta; paykunaqa Zebedeopa churinkunam karqaku.

²⁰ Chaymi paykunatapas nirqa: Qatiwaychik, nispa. Chaymi taytanku Zebedeotawan yanapaqninkunata barcapi saqeruspanku Jesusta qatikurqaku.

Demonioyuq runata Jesús sanoyachisqanmanta

²¹ Capernaúm llaqtaman chayaruptinkum, samana punchawpi sinagogaman Jesús yaykurqa, hinaspam yachachiyta qallaykurqa.

²² Runakunañataqmi Jesuspa yachachisqanwan admirasqallaña karqaku, Diospa leynin yachachiqkunamantaqa atiywan yachachisqanrayku.

²³ Chaypim kachkarqa demoniopa huntasqan runa, hinaspam qaparirqa:

²⁴ ¡Nazaret llaqtayuq Jesús! ¿Imata-taq ñoqaykuwan munanki? ¿Chinkachi-qniykuchu hamurunki? Ñoqaqa reqsikim, qamqa Diospa Churinmi kanki, nispa.

²⁵ Jesusñataqmi demoniota qaqchaspan nirqa: ¡Upallay, kay runamanta lloqsiy! nispa.

²⁶ Chaymi demonioqa runata taspiparuspan qaparisparaq lloqsirurqa.

²⁷ Llapa runakunañataqmi admirakuspa ninakurqaku: ¿Imataq kayqa? ¿Ima yachachikuytaq kayqa atiywan kamachiptin demoniokunapas kasunanpaqqa? nispanku.

²⁸ Jesuspa tukuy chaykuna ruwasqantam tukuy Galilea lawpa muyuriqninpi kaqkuna chaylla yacharurqaku.

Pedropa suegranta Jesús sanoyachisqanmanta

²⁹ Jesusmi sinagogamanta lloqsiruspan, Jacobowan chaynataq Juanwan kuska rirqaku, Simonpawan Andrespa wasinman.

³⁰ Chaypim Simonpa suegran llumpay calenturawan camapi kachkarqa, chaytam Jesusman willaykurqaku.

³¹ Jesusñataqmi asuykuspan makinmanta hatarirachirqa, hinaptinmi calenturan pasaruptin paykunata servirqa.

Achka onqoqkunata Jesús sanoyachisqanmanta

³² Tutaykamuptinmi llapa onqoqku-natawan demoniopa huntasqankunata Jesusman pusamurqaku.

³³ Llaqtapi lliw runakunakunañataqmi punkuman huñunakaramurqaku.

³⁴ Jesusñataqmi tukuy rikchaq onqoyniyuqkunata sanoyachirqa; demoniokunatapas qarqorqam, ichaqa demoniokuna imapas rimanantam mana saqerqachu, Jesusqa pim kasqanta reqsisqankurayku.

Galileapi Jesús willakusqanmanta

³⁵ Jesusmi paqarinnintin tutapayta manaraqpas sumaqta achikyamuchkaptin, llaqtamanta lloqsispan chunniqman rirqa, hinaspam Diosta chaypi mañakurqa.

³⁶ Simonñataqmi puriqmasinkunawan kuska maskaqnin rirqaku.

³⁷ Chaymi tariruspanku nirqaku: Llapa runakunam maskasuchkanki, nispanku.

³⁸ Jesusñataqmi nirqa: Huklaw taksa llaqtakunaman hakuchik, chaykunapipas willakamunaypaq; chaypaqmi ñoqaqa kay pachaman hamurqani, nispa.

³⁹ Chaynapim Jesusqa tukuy Galilea lawkunapi purirqa, sinagogakunapi willakustin chaynataq runakunamanta demoniokunata qarqostin.

Leprawan onqoq runata Jesús sanoyachisqanmanta

⁴⁰ Leprawan onqoq runam Jesuspa qayllanpi qonqorakuykuspan nirqa: Munaspaykiqa kay onqoyniymantayá sanoyaykachillaway, nispan.

⁴¹ Jesusñataqmi paymanta llakipayarikuspa makinta haywarispa llapchaykurqa, hinaspam kaynata nirqa: Arí, munanim, Sanoña kay, nispa.

⁴² Chaynata rimaruptillanmi onqoynin chinkaruptin sanoyarurqa.

⁴³ Hinaptinmi Jesusñataq chay runata chunkay-chunkayta nirqa:

⁴⁴ Amam pimanpas willakunkichu, aswanqa sacerdotewan qawachikamuspam Moisespa kamachisqanman hina sanoña kasqaykimanta Diosman ofrendata qomunki, chaynapi sanoña kasqaykita lliw yachanankupaq, nispa.

⁴⁵ Chay runam pasaspan Jesuspa sanoyachisqanmanta llapa runaman willakachakuyta qallaykurqa, chaynapim Jesusqa maylaw llaqtamanpas mana rikuchikuspallaña yaykuq, payqa chunniqllantañam puriq. Chaywanpas tukuy hinastinmantam runakunaqa Jesusman hamurqaku.