Malaquías 2 - CHUYA QELLQA La Biblia en Quechua de Ayacucho 2012

Sacerdotekuna castigasqa kananmanta

¹ Chaynaqa, Sacerdotekuna, kay kamachikuymi qamkunapaq:

² Qamkunam kasukuspa cheqaptapuni tukuy sonqowan yupaychawanaykichik. Mana kasukuspaqa ñakasqam kankichik. Cheqaptapuni mana yupaychawaptikichikqa, sacerdote kasqaykichikrayku bendecisqa kasqaykichiktapas ñakaymanmi tikrarusaq. Tukuy Atiyniyuq Tayta Diosmi chaynata nin.

³ Ñoqaqa atiynikichikta qechuruspaymi, sacrificanaykichikpaq apamusqaykichik animalpa akanwan uyaykichikman laqaykusqaykichik. Hinaptinmi chay akawan kuska wischusqa kankichik.

⁴ Chaynapim kay kamachikuytaqa ñoqapuni qomusqayta yachankichik, chaynapi Leviywan pacto ruwasqay takyananpaq. Tukuy Atiyniyuq Tayta Diosmi chaynata nin.

⁵ Leví aylluwanqa pactota ruwarqani hawka kanankupaqwan allin kawsakunankupaqmi. Pactotaqa ruwarqani kasuwaspa hatunchawananpaqmi, chaymi payqa manchakuwaspa hatunchawarqa.

⁶ Paykunaqa cheqap kaqtam yachachirqaku, siminkupiqa manam llullakuypas karqachu. Allinta ñoqawan kawsakuspankum achkaqta huchamantapas karuncharqaku.

⁷ Sacerdotekunapa ruwayninqa ñoqa Diosta reqsiwanankupaq runakunata yachachiymi, chayraykum runakunapas paykunamanta yachachikuyta chaskinanku, paykuna ñoqa Diosmanta willakuqkuna kasqankurayku.

⁸ Sacerdotekuna, qamkunam ichaqa allin ñanmanta karunchakurunkichik, mana allinkunata yachachispam llapa runata pantarachinkichik. Chaynapim Leviywan pacto ruwasqayta yanqacha-runkichik.

⁹ Chaynaqa, mana kasuwaspaykichik munasqaykichikman hina kawsaspa, runakunamanpas hukta-hukta yachachisqaykichikraykum, ñoqapas llapa runakunapa millakusqanta hinaspa usuchisqanta ruwasqaykichik. Tukuy Atiyniyuq Tayta Diosmi chaynata nin.

Diosmanta Judá karunchakurusqanmanta

¹⁰ ¿Manachum huk taytayuqlla kanchik? ¿Manachum ñoqanchiktaqa huk Dioslla unanchawarqanchik? Hinaptinqa, ¿imaynanpimá ñawpaq taytanchikkunawan Diosninchikpa pacto ruwasqanta qepanchakuruspa kikinchikpuraqa traicionanakunchik?

¹¹ Judá nacionmi Tayta Diosta qepanchakurun, Israel nacionpiwan Jerusalén llaqtapipas millakuypaq kaqkunallatam ruwachkanku. Judá nacionmi Diospa templonta millakuypaq huchata ruwaspan qachacharun, qarikunapas huklaw nacionkunapa diosninkunata yupaychaq warmikunawanmi casarakurunku.

¹² Chayna ruwaq runataqa Tayta Diosmi Jacobpa ayllunmanta qarqorunqa. Pi runaña kaptinpas, Tukuy Atiyniyuq Tayta Diosmanña ofrendakunata apamuptinpas payqa qarqorunqam.

¹³ Chaywanpas qamkunaqa chayna runamantapas mastaraqmi ruwanki-chik: Qamkunaqa Diospa altarnintapas weqekichikwan nuyuchispam qaparis-paraq waqankichik. Chaynataqa ruwan-kichik ofrenda apamusqaykichikta Tukuy Atiyniyuq Tayta Dios manaña chaskisuptikichikmi.

¹⁴ Hinaspam tapukunkichikraq: ¿Imanasqataq kaykunaqa pasawachkanchik? nispaykichikraq. Diosmi testigo joven kachkaspallaraq akllakusqayki warmita, wañunayki punchawkama kuyanaykipaq casarachkaspa traicionasqaykimanta. Paytam vida pasaqmasiki kachkaptin traicionarunki.

¹⁵ ¿Manachum runataqa Dios unancharqa huk cuerpoyuqlla hinaspa huk espirituyuqlla kananpaq? ¿Imapaqtaq Diosqa chaynata unancharqa? Chaynataqa unancharqa runakunapa miraynin Diosllapaqña kananpaqmi. Chaynaqa, Diospa qosusqaykichikta waqaychaspayá, jovenllaraq kachkaspa akllakusqaykichik warmikichiktaqa ama traicionaychikchu.

¹⁶ Israelpa yupaychasqan Tukuy Atiyniyuq Tayta Diosmi kaynata nin: Ñoqaqa cheqninim rakinakuytaqa, cheqninim millakuypaq huchata ruwaspa warminta ñakarichiq runatapas. Chaynaqa, cuerpoykichikta waqaychaspayá jovenllaraq kachkaspa akllakusqaykichik warmikichiktaqa ama traicionaychikchu, nispa.

Juicio punchawmanta

¹⁷ Tayta Diosqa amirunñam mañakusqaykichiktapas. Ichaqa qamkunam tapukunkichikraq: ¿Imatañataq nirunchik amiruwananchikpaqqa? nisparaq.