Malaquías 1 - CHUYA QELLQA La Biblia en Quechua de Ayacucho 2012

Israel nacionta Dios kuyasqanmanta

¹ Kaykunam Israel nacionpa contranpi Malaquiasnintakama Tayta Diospa rimarisqan simikuna.

² Tayta Diosmi kaynata nin: Ñoqaqa anchatam kuyarqaykichik, nispa. Qamkunam ichaqa ninkichik: “¿Imay-natataq kuyawarqankiku?” nispaykichik. Tayta Diosñataqmi nin: “Qamkunataqa kuyaykichik imaynam Jacobta kuyasqayta hinam. Esauwan Jacobqa wawqentinmi karqaku, ichaqa Jacobtam kuyarqani,

³ Esautañataqmi cheqnirqani. Chayraykum yachanan orqokunatapas chunnirachispay allpankunatapas atoqkunapa yachananmanña tikrarurqani”, nispa

⁴ Esaupa miraynin Edom runakunam ninku: “Tuñirachiwaptinchikpas musoqmantam purmachisqa nacionninchiktaqa hatarichisun”, nispanku. Ichaqa Tukuy Atiyniyuq Tayta Diosmi kaynata nin: “Huktawan hatarirachiptikichikpas yapamantam purmarachisqaykichik. Hinaptinmi nacionnikichik sutichasqa kanqa mana allinpa kanan nacionwan hinaspa Tayta Diospa wiñaypaq ñakasqan nacionwan”, nispa.

⁵ Chayta qawaspam qamkunañataq ninkichik: “Israel nacionmanta qallaykuspa tukuy hinastinpi Tayta Dios yupaychasqa kachun”, nispaykichik.

Sacerdotekunata Tayta Dios qaqchasqanmanta

⁶ Tukuy Atiyniyuq Tayta Diosmi sacerdotekunata kaynata nin: Warmakunaqa taytankutam respetan, criadokunapas patronninkutam kasukunku. Sichum taytaykichik ñoqa kaptiyqa, ¿imanasqataq mana respetawankichikchu? Sichum patronnikichik kaptiyqa ¿imanasqataq mana kasuwankichikchu? Qamkunaqa sutiyta despreciachkaspapas kaynataraqmi ninkichik: “¿Imapitaq ñoqayku despreciarqaykiku?” nisparaq.

⁷ Qamkunaqa altarniypipas millakuypaq mikuykunatam ofrecewankichik, hinas-pam ninkichikraq: “¿Imapitaq piñara-chikiku?” nisparaq. Qamkunaqa piña-chiwankichik altarniyta wischupakus-paykichikmi,

⁸ ñawsa animalkunata, wistu animalkunata hinaspa onqosqa animalkunata ofrecewaspa allin kasqanta piensaspaykichikmi. Chayna animalkunatayá kamachiqnikichikkunaman aparuychik, yaqachus paykuna kusikuywan chaskiykususpaykichik imallapipas yanapaykusunkichik. Tukuy Atiyniyuq Tayta Diosmi chaynata nin.

⁹ Chaynaqa, llakipayariwananchik-paq Tayta Diosta kunan mañakuychik. Ichaqa, chayna mana valeq ofrendakunata qochkaspaykichikqa, amayá piensaychikchu Diospas kusikuywanraq chaskiykusunaykichiktaqa. Tukuy Atiyniyuq Tayta Diosmi kaynata nin:

¹⁰ ¡Ima allinraq kanman templopa punkunta hukkaqnikichik wichqaruptinqa, chaynapi amaña pipas yanqapaq altarniypi ninata ratachinanpaq! Manañam qamkunawanqa kusisqañachu kani, nitaqmi ofrendaykichiktapas chaskisqaykichikñachu.

¹¹ Ñoqataqa intipa qespimunan lawmanta qallaykuspa intipa seqaykunan lawkamam lliw nacionkuna hatunchawanku, yupaychawanankupaqpas tukuy hinastinpim inciensokunatawan suma-sumaq ofrendakunata kañapuwanku. Llapallan nacionkunapim sutiyqa hatunchasqa. Tukuy Atiyniyuq Tayta Diosmi chay-nata nin.

¹² Qamkunam ichaqa piñachiwachkankichik, Tayta Diospa mesanqa millakuypaqmi, millakuypaqtaqmi mikuyninpas, nispaykichik.

¹³ Ninkichiktaqmi: ¡Mayna amiruypaqñam kaykunaqa! Chaynata nispam despreciawankichik. Hinaspam suwasqa animalkunata, wistu animalkunata, onqosqa animalkunata apamuwaspa kusikusqaytaraq piensankichik. Chaynaqa, ¿yaqachum chaykunata chaskisqaykichik? Tayta Diosmi chaynata nin.

¹⁴ Ñoqa Tayta Diosman prometekuwachkaspan, kanchanpi allinnin orqo animalninkuna kachkaptin onqoq animalta kañapuwaqniy runaqa ñakasqayá kachun. Ñoqaqa Tukuy Atiyniyuq Reymi kani, llapallan nacionkunapa yupaychananmi kani. Tukuy Atiyniyuq Tayta Diosmi chaynata nin.