Levítico 25 - CHUYA QELLQA La Biblia en Quechua de Ayacucho 2012

Mana tarpuna watamantawan chakra kutichina watamanta

^1-2 Israelpa mirayninkunaman ninanpaqmi Moisesta Tayta Dios Sinaí orqopi kaynata nirqa: Qonay allpaman yaykuspaqa ñoqa Tayta Diospaqmi chay allpata samachinkichik.

³ Soqta watam chakrapi tarpunkichik. Soqta watataqmi uvas plantaykichikkunatapas kallmankichik hinaspam cosechankichik.

⁴ Qanchis kaq watapim ichaqa chay chakraqa, ñoqa Tayta Diospaq samanqa. Chay watapiqa amam tarpunkichikchu, amataqmi uvas plantakunatapas kallmankichikchu.

⁵ Qanchis kaq watapi kikillanmanta wiñamuq kawsaykunataqa amam rutunkichikchu, uvasnikichikpa ruruntapas amam pallankichikchu. Chay wataqa chakraykichikpa samanan watam kanqa.

⁶ Samasqan watapi allpapa rurunkunaqa haypanqam mikunaykichikpaq, haypanqataqmi serviqnikichikkunapaqpas, llamkapakuq runakunapaqpas chaynataq qamkunawan yachaq huklaw llaqtayuqkunapaqpas;

⁷ animalnikikuna mikunanpaqpas chaynataq purun animalkuna mikunanpaqpas. Allpaykipi kikillanmanta imapas qespiqqa mikunapaqmi kanqa.

⁸ Qanchis kutikamam qanchis watakunata yupanki, chaymi tawa chunka isqonniyuq watakuna kanqa.

⁹ Qanchis kaq killapa chunka punchawninpim otaq hucha pampachana punchawpim cornetata tocankichik. Chaytaqa nacionnikichikpim kuchun-kuchun ruwankichik.

¹⁰ Pichqa chunka kaq watatam ñoqapaq sapaqchankichik. Chay wataqa nacionpi yachaq llapallan preso kaqkunatawan esclavo kaqkunata libre kacharina watam kanqa. Chay wataqa jubileo watam kanqa. Chay watapiqa sapakamam chakraykichikman chaynataq aylluykichikkunamanpas kutikunkichik.

¹¹ Chay pichqa chunka wataqa jubileo watam qamkunapaq kanqa, chay watapiqa amam tarpunkichikchu nitaqmi kikillanmanta wiñaq kawsaykunatapas cosechankichikchu. Amam uvastapas kallmankichikchu nitaqmi ruruntapas pallankichikchu.

¹² Chay wataqa jubileo watam, ñoqapaq sapaqchasqa watapaqmi hapinkichik, chakrapi kikillanmanta qespiqkunataqa mikunkichikmi.

¹³ Chay jubileo watapiqa sapakamam musoqmanta chakraykichikta kutichikunkichik.

¹⁴ Pipas chakranta rantikuspaqa otaq rantispanqa amam runamasinta engañanqachu.

¹⁵ Chay chakra rantiq runaqa jubileo watamanta yupaspam paganqa, chaynataqmi rantikuqninpas precionta mañanqa haykataraqmi cosecha qespinanta yupaykuspan.

¹⁶ Achka wataraq cosecha qespinan kaptinqa chay chakraqa allinmi cuestanqa, pisi watallaña tarpunapaq kaptinqa precionpas menosmi kanqa. Chakrapa precionqa kanqa hayka cosecha hurqona kasqanman hinam.

¹⁷ Amam runamasikitaqa engañankichu, aswanqa Diosnikichiktam kasukunkichik. Ñoqa Tayta Diosmi Diosnikichik kani.

¹⁸ Kamachikuyniykunata ruwayman churaychik, yachachikuykunata kasukuychik. Chaykunata ruwayman churaspaqa qonay allpapim hawka kawsakunkichik.

¹⁹ Allpaykichik ruruptinmi saksanaykichikkama mikunkichik, hinaspam chay allpapi hawkalla kawsakunkichik.

²⁰ Ichapas niwaqchik: “Qanchis kaq watapi mana tarpuchkaspaqa nitaq mana cosechachkaspaqa ¿imatataq mikusaqku?” nispaykichik.

²¹ Chay soqta kaq watapim ñoqa bendecisqaykichik, hinaptinmi kimsa watapaq haypaqta cosechankichik.

²² Soqta kaq watapi cosechasqaykichiktam mikunkichik pusaq kaq watapi tarpusqaykichikta isqon kaq watapi cosechanaykichikkama.

²³ Allpataqa amam wiñaypaqqa ran-tikunkichikchu, allpaqa ñoqapam, qam-kunaqa huklaw llaqtayuq hinaspa samapakuqniy hinallam kankichik.

²⁴ Tarpusqayki chakrakunata punta kaq dueñon kutichikuyta munaptinqa amam kutichikunanta harkakunkichikchu.

²⁵ Sichum hukkaq llaqtamasiki wakchayaruspan chakranta rantikurusunki hinaptinqa hukkaqnin ayllunmi pagaspan chay wakcha runapa chakranta kutichipunqa.

²⁶ Sichum chay rantikuq runapa mana pininpas chay allpanta kutichipunanpaq kaptinqa kikinñam huñusqan qollqeta pagaspan kutichikunqa.

²⁷ Chayna kaptinqa rantikusqan watamanta qallarispam hayka watañam pasarusqanta yupanqa, hinaspam faltaq watakunapi cosechananta tanteaykuspan chay chakrata kutichikunanpaq pagapunqa.

²⁸ Sichum chay chakranta kutichikunanpaq qollqeta mana tariptinqa chay chakraqa rantiqpa makinpim jubileo wata chayamunankama qepanqa. Chay watapiñam chay chakraqa punta dueñonpa makinman kutinqa.

²⁹ Sichum pipas murallasqa llaqta ukupi wasita rantikurunqa hinaptinqa huk watapunim plazo kanqa dueñon kutichikunanpaq, wata pasaruptinqa manañam kutichikunmanñachu.

³⁰ Sichum huk watapi mana kutichikuptinqa, chay wasiqa rantiqninpa chaynataq mirayninkunapa makinpiñam wiñaypaq qepanqa, jubileo watapipas manam kutichikunmanñachu.

³¹ Mana murallasqa llaqtakunapi wasikunam ichaqa chakrakuna hina kanqa, chay wasikunataqa atinmankum kutichikuyta, jubileo watapipas kutichipusqataqmi kanqa.

³² Leví miraykunapa yachasqan llaqtakunapi rantikusqa wasinkutam ichaqa haykapipas reclamanmanku.

³³ Leví ayllumanta wasita rantiqqa jubileo wata chayaramuptinmi chay yachasqan wasimanta lloqsinqa. Israelpa miray-ninkuna ukupi, Leví castakunapa kapu-qninqa yachasqanku llaqtapi kaq wasillankum.

³⁴ Leví ayllukunapa llaqtankupa muyuriqninpi echaderonkutapas manam rantikunmankuchu. Chaykunaqa wiñaypaqmi paykunapaq kanqa.

³⁵ Sichum hukkaqnin llaqtamasiki wakchayaruspan qamkuna ukupi mana yanapaqniyuqña rikuriruptinqa paytam yanapaykunki. Mana llaqtayuq otaq samapakuq hinañam payqa wasikipi yachanqa.

³⁶ Chay wakcha runamanqa amam imatapas mirayniyuqpaqqa qonkichu, aswanqa ñoqa Diosnikitam respetawanki. Chay aylluykiqa wasikipim yachanqa.

³⁷ Mikuytapas, qollqekitapas, amam mirayniyuqpaqqa qonkichu.

³⁸ Ñoqa Tayta Diosnikichikmi Egipto nacionmanta hurqomurqaykichik Canaán allpata qonaypaq hinaspa Diosnikichik kanaypaq.

³⁹ Sichum llaqtamasiki wakchayaruspan kikintapas qanman rantikurusuptikiqa amam criadowan hinaqa servichikunkichu.

⁴⁰ Llamkapakuqwan otaq samapakuqwan hinallam paywanqa servichikunki, jubileo watakamallam payqa servisunki.

⁴¹ Chay watapim churinkunapiwan libre lloqsispan, ayllunkunapa kasqanman chaynataq ñawpaq taytankunapa allpanman kutikunqa.

⁴² Paykunaqa Egipto nacionmanta hurqomusqay serviqniykunam, criado hinaqa manam rantikusqaqa kanqakuchu.

⁴³ Ama ñakarichispallam paykunawanqa servichikunki. Ñoqa Diosnikitam kasuwanki.

⁴⁴ Criadoyuq otaq criadayuq kayta munaspaykiqa muyuriqniki nacionkunamantam rantinki.

⁴⁵ Qamkunawan yachaq huklaw llaqtayuqkunatapas rantiwaqchikmi chaynataq nacionnikichikpi paykunamanta naceqkunatapas, chaynapi qamkunapaña kanapaq.

⁴⁶ Chay serviqnikikunatam herenciata hina churikichikkunaman saqenkichik, hinaspam tukuy tiempo paykunawan servichikunkichik. Israelpa mirayninkunawanmi ichaqa ama ñakarichispalla servichikunkichik.

⁴⁷ Sichum qanwan yachaq huklaw llaqtayuq runa apuyarunqa, hinaptin paywan yachaq hukkaqnin llaqtamasiki wakchayarullanman hinaspa criado kananpaq kikinta rantikurunman chay apu runaman otaq chay runapa ayllunman, hinaptinqa

⁴⁸ rantikusqaña kachkaspapas payqa reclamasqam kanqa. Paytaqa hukkaqnin ayllunmi reclamanqa,

⁴⁹ tion kaspapas, primonpas otaq hukkaqnin ayllunpas; qollqen kaptinqa kikillanpas reclamakunmanmi.

⁵⁰ Haykatam pagapunanpaqmi dueñonwan tanteanakunqa kikinta rantikurusqan watamanta qallarispa jubileo watakama. Watan-watan sapa punchaw llamkasqanpa pagonman hinam hayka paganantapas tanteanakunqaku, chayta pagaykuspan lloqsikunqa.

⁵¹ Sichum achka watakunaraq jubileo watapi libre kananpaq faltaptinqa chayman hinam rantiqnin runaman qollqenta kutichipunqa.

⁵² Sichum pisi watakunallaña jubileo watapaq faltanqa, hinaptinqa reclamasqa kananpaqmi tanteaykuspan rantiqnin runaman qollqenta kutichipunqa.

⁵³ Chay criadotaqa watan-watan llamkapakuqta hinallam llamkachinqa. Amam saqenkichikchu rantiqnin ñakarichinantaqa.

⁵⁴ Pi criadopas mana reclamasqa kaspaqa jubileo wata chayaramuptinmi churinkunapiwan kuska libre lloqsikunqaku.

⁵⁵ Israelpa mirayninkunaqa serviqniykunam, paykunataqa serviqniy kasqankuraykum Egipto nacionmanta hurqomurqani. Ñoqa Tayta Diosmi Diosnikichik kani.