Levítico 22 - CHUYA QELLQA La Biblia en Quechua de Ayacucho 2012

Pikunam Tayta Diospa ofrendanta mikunankumanta

^1-2 Aaronman hinaspa churinkunaman ninanpaqmi Moisesta Tayta Dios nirqa: Israel castakunapa sapaqchapuwasqan ofrendakunata allinta nanachikuchunku, chaynapi chuya sutiyta ama penqayman churanankupaq. Ñoqaqa Tayta Diosmi kani.

³ Kunanpas hinaspa hamuq punchawkunapipas, mirayninkunamanta pipas millakuypaq kachkaspan Israel castakunapa sapaqchapuwasqan ofrendaykunaman asuykuspanqa, ñawpaqniymanta chinkachisqam kanqa. Ñoqa Tayta Diosmi chaynata nini.

⁴ Chaynaqa, Aaronpa mirayninkunamanta pipas lepra onqoywan otaq qeya ispaywan kaspaqa amam ñoqapaq sapaqchasqa kaqkunataqa mikunqachu, mikunqakuqa chuyanchakuruspañam. Manataqmi mikunmanchu runapa ayan llapcharuqpas, puñuchkaptin qari kayninmanta muhun kikillanmanta lloqsiptinpas,

⁵ qasqonpa puriq animalta llapcharuqpas, nitaq millakuypaq kaq runata llapcharuqpas.

⁶ Pipas chaykunata llapcharuq runaqa tutaykuqkamam millakuypaq kanqa. Ñoqapaq sapaqchasqa kaqkunataqa manaraq bañakuchkaspaqa amam mikunqachu.

⁷ Inti seqaykuptinñam chuya kanqa, chayñam ñoqapaq sapaqchasqa kaqkunata mikunqa, chaykuna paypa mikuynin kasqanrayku.

⁸ Kikillanmanta wañuq animalpa aychantaqa amam mikunqachu nitaq purun animalpa wañuchisqan animalpa aychantapas, chaykunata mikuspanqa millakuypaqmi kanqa. Ñoqaqa Tayta Diosmi kani.

⁹ Chaynaqa, kay kunasqaykunata kasukuchunku, chaynapi ama huchalli-kunankupaq hinaspa kay kunasqaykunata penqayman churaspa ama wañurunankupaq. Ñoqa Tayta Diosmi paykunataqa kikiypaq sapaqchani.

¹⁰ Mana sacerdote kachkaspaqa amam pipas ñoqapaq sapaqchasqa ofrendaykunataqa mikunqachu. Sacerdotepa samapakuqninpas nitaq llamkapakuqninpas amam mikunqachu.

¹¹ Sacerdotepa rantisqan criadowan wasinpi naceq criadom ichaqa ñoqapaq sapaqchasqa ofrendamanta mikunqa.

¹² Sacerdotepa warmi churin mana sacerdote kaq runawan casarakuspanqa, amam mikunqachu sacerdoteman qosqa ofrendamantaqa.

¹³ Sichum sacerdotepa warmi churin manaraq wawayuq kachkaspa viudayarunman otaq qosan saqeruptin taytanpa wasinman kutiykuruspanqa, sipas kayninpi hinam chay ofrendamanta mikunqa. Sacerdote castamanta sapaq runaqa amam mikunqachu.

¹⁴ Sichum pipas pantaruspan ñoqapaq sapaqchasqa mikuyta mikurunqa hinaspaqa sacerdotemanmi sayachipunqa pichqa parteman rakisqapa huknin parten yapasqata.

¹⁵ Sacerdotekunaqa Israel casta runakunapa ñoqa Tayta Diospaq apamusqanku ofrendaykunataqa amam qachachanqakuchu.

¹⁶ Chaynata ruwaspankuqa kikillankum huchata qepikuchkanku. Ñoqa Tayta Diosmi chaykunataqa kikiypaq sapaqchani, nispa.

Imaynatam animalkunata Tayta Diospaq wañuchinankumanta

^17-18 Aaronmanwan churinkunaman chaynataq Israelpa mirayninkunaman ninanpaqmi Moisesta Tayta Dios kaynata nirqa: Israel runakunamanta otaq paykunawan yachaq huklaw llaqtayuqkunamanta pipas prometekusqanta ruwayman churaspa otaq lliw kañana animalta mana pipa nisqallan ofrecewaspanqa,

¹⁹ chaskisqa kananpaqmi sano orqo animalta ofrecewanqa, manam imananchu torota, carnerota otaq chivatota kaspapas.

²⁰ Mana sano kaq animaltaqa amam ofrecewanqachu, chayna kaptinqa manam chaskisaqchu.

²¹ Ñoqa Tayta Dioswan allinlla kasqanmanta ofrendata pipas prometekusqanmanta otaq voluntadninmanta ofrecewaspanqa, toromanta otaq carne-romanta kaspapas sanotam apamuwanqa.

²² Ñoqa Tayta Diosmanqa amam ofrecewankichikchu ñawsata, chakin pakisqata, imanpas qorusqata, qeyapakuqta, seqsipakuyniyuqta nitaq qarapakuchkaq animaltapas. Chayna ofrendakunataqa amam altarpipas kañapuwankichikchu.

²³ Volun-tadninkumanta ofrenda kaptinmi ichaqa chullan chaki torotapas otaq carnerotapas ofrecewankiman, prometekusqanku ofrenda kaptinmi ichaqa mana chaskisqaykichu.

²⁴ Amataqmi ofrecemuwankichikchu dañasqa run-tuyuq, llapisqa runtuyuq, chutasqa runtuyuq hinaspa capasqa animaltaqa. Nacionnikichikpiqa amam chaynataqa ruwankichikchu.

²⁵ Huklaw llaqtayuq runakunamantapas chayna animalkunataqa amam chaskinkichikchu, Diosnikichikpa mikuynin kananpaqqa, chaykunataqa mana sano animalkuna kasqanraykum mana chaskisqaykichikchu, nispa.

Diosman ofrecesqa animalkunata imaynatam wañuchinankumanta

²⁶ Moisestam Tayta Dios nirqa:

²⁷ Vacapa, ovejapa otaq cabrapa naceruq uñachanqa qanchis punchawraqmi mamanwan kanqa, pusaq punchawmantam ichaqa ofrendata hina ñoqa Tayta Diosman kañapuwankichik.

²⁸ Chay punchawllapiqa amam vaca-tapas nitaq ovejatapas uñantintaqa wañuchinkichikchu.

²⁹ Ñoqa Tayta Diosman graciasta qowanaykichikpaq animalta wañuchispaqa chaskinaypaq hinam ruwankichik,

³⁰ hinaspam chay punchawllapi mikunkichik, amam paqarinnintinkamaqa pu-chunkichikchu. Ñoqaqa Tayta Diosmi kani.

³¹ Kamachikuyniykunata kasukuspa ruwayman churaychik. Ñoqaqa Tayta Diosmi kani.

³² Chuya sutiytaqa amam penqaymanqa churankichikchu, chaynapim Israelpa mirayninkunapi chuya kasqayta yachankichik. Ñoqaqa chuyanchaqnikichik Tayta Diosmi kani.

³³ Ñoqam Egipto nacionmanta hurqomurqaykichik Diosnikichik kanaypaq. Ñoqaqa Tayta Diosmi kani, nispa.