Levítico 18 - CHUYA QELLQA La Biblia en Quechua de Ayacucho 2012

Qarikunapaq kamachikuykunamanta

^1-2 Israelpa mirayninkunaman ninanpaqmi Moisesta Tayta Dios kaynata nirqa: Ñoqam Tayta Dios kani.

³ Egipto nacionpi runakunapa ruwas-qankuta hinaqa amam imatapas ruwan-kichikchu. Canaán nacionpi yachaspaykichikpas amam chay llaqtayuq runakunapa ruwas-qankutaqa ruwankichikchu, amataqmi costumbrenman hinaqa kawsankichikchu.

⁴ Kamachikuyniykunatawan decretoykunata kasukuspa chaykunaman hina kawsaychik. Ñoqa Tayta Diosmi, Diosnikichik kani.

⁵ Chaynaqa, kamachikuyniykunatawan decretoykunata kasukuychik. Pipas chaykunata ruwayman churaqqa kawsanqam. Ñoqa Tayta Diosmi chaynata nini.

⁶ Amam pi qaripas ayllullanmanta kaq warmiwanqa kakunqachu. Ñoqa Tayta Diosmi chaynata nini.

⁷ Mamallaykiwan kakuspaqa amam taytaykita penqaymanqa churankichu. Payqa mamaykim, amam paywanqa kakunkichu.

⁸ Taytaykipa yapakusqan warminwan kakuspaqa amam taytaykita penqaymanqa churankichu.

⁹ Taytaykipa churyapakusqan otaq mamaykipa wachapakusqan panikiwanqa amam kakunkichu wasikipi naceq kaptinpas otaq huklaw wasipi naceq kaptinpas.

¹⁰ Amam penqayman churakunkichu willkaykiwan kakuspaqa, warmi churikipa otaq qari churikipa kaptinpas.

¹¹ Taytaykipa yapay warminpa warmi wawanwanqa amam kakunkichu. Tay-taykipa churinqa panikim.

¹² Taytaykipa paninwanqa amam kakunkichu, payqa taytaykipa ayllunmi.

¹³ Mamaykipa ñañanwanqa amam kakunkichu, payqa mamaykipa ayllunmi.

¹⁴ Taytaykipa wawqenpa warminwan kakuspaqa amam tioykita penqayman churankichu. Payqa tiaykim.

¹⁵ Llumchuynikiwanqa amam kakunkichu, payqa churikipa warminmi.

¹⁶ Cuñadallaykiwan kakuspaqa amam wawqekitaqa penqayman churankichu.

¹⁷ Huk warmiwanqa amam wawantillanwanqa kakunkichu, amataqmi qari wawanpa warmi churinwanpas casarakunkichu nitaq warmi wawanpa warmi wawanwanpas. Tukuy chaykuna ruwayqa aylluntillan kasqanraykum millakuypaq hucha.

¹⁸ Warmiki kawsachkaptinqa amam warmikipa ñañantaqa casarankichu, nitaqmi paywanqa kakunkichu, yanqañataq iskayninwan kasqaykirayku cheq-ninakunmanku.

¹⁹ Killanwan kaq warmiwanqa amam kakunkichu.

²⁰ Runamasikipa warminwanqa amam kakunkichu. Chaynata ruwaspaqa millakuypaqmi kawaq.

²¹ Moloc idolopaqqa amam churikitaqa ninapi kañankichu. Chaynata ruwaspaqa ñoqapa sutiytam penqayman churawaq. Ñoqa Tayta Diosmi chaynata nini.

²² Warmiwan hinaqa amam qarimasikiwanqa kakunkichu, chay ruwayqa pasaypaq millakuypaqmi.

²³ Warmiwan hinaqa amam animalwanqa qachakunkichu, chaynata ruwaspaqa millarikuypaqtam ruwachkanki. Warmipas qariwan hinaqa amataqmi animalwanqa qachakunqachu, chayqa pasaypaq millakuypaq ruwaymi.

²⁴ Amam chaykunata ruwaspa millakuypaqtaqa ruwakunkichikchu. Chaykunata ruwaspam qayllaykichikmanta wischu-nay llapa nacionkunapas millakuypaqta qachachakurqaku.

²⁵ Chayna ruwayku-nawanmi allpapas millakuypaqña rikurirurqa, chayraykum chay mana allinkuna ruwasqankumanta castigarqani, allpapas chay runakunataqa atqochkaq hinam atqorurqa.

²⁶ Israel casta runakuna, kamachikuyniykunatawan yachachikuyniykunata kasukuychik chaynataq qamkunawan yachaq huklaw llaqtayuqkunapas; hinaspayá kay millarikuypaq kaqkunataqa ama ruwaychikchu.

²⁷ Tukuy kay millarikuypaq kaqkunatam qamkunamanta chay allpapi punta yachaq runakuna ruwarqaku, hinaptinmi chay allpapas millarikuypaq karqa.

²⁸ Millakuypaq kaqkunata ruwaptikichikqa yanqañataq qamkunatapas atqochkaq hina chay allpa wischurusunkichikman, chaynatam chay allpapi puntata yachaq runakunatapas wischururqa.

²⁹ Pipas chay millarikuypaq kaqkunata ruwaq runaqa llaqtamantam chinkachisqa kanqa.

³⁰ Chaynaqa, kay kamachisqaykunatayá kasukuychik, amayá millakuypaq kaqkunataqa ruwaychikchu imaynam qamkunamanta ñawpaq runakuna hinaqa. Chaykunawanqa amayá millarikuypaqtaqa ruwakuychikchu. Ñoqa Tayta Diosmi, Diosnikichik kani, nispa.