Levítico 16 - CHUYA QELLQA La Biblia en Quechua de Ayacucho 2012

Huchakuna pampachana punchawmanta

¹ Aaronpa iskaynin qari churinkuna Tayta Diosman asuykuspa wañurusqankumanta qepatam, Moisesta Tayta Dios nirqa:

² Wawqeki Aaronta niy, carpapi “Chuyay-chuyay” lugarmanta “Chuya” lugarta rakinaq velopa qepanmanqa otaq Arcapa tapanpa ñawpaqninmanqa ama sapa kutilla yaykunanpaq, chaynapi ama wañurunanpaq. Ñoqam Arcapa tapanpa hawanpi puyupi sutillata rikurisaq.

³ Aaronqa carpaman yaykuspanqa kaykunatam apanqa: Hucharayku ofrendapaq malta torota chaynataq lliw kañanapaq carnerota.

⁴ Yaykunanpaqmi churakunqa linomanta chuya tunicanwan, linomanta calzoncillowan, weqawnintam linomanta chumpiwan watakunqa, umanmanpas linomanta ruwasqa mitrawanmi churakunqa. Chay pachakunaqa ñoqallapaqña sapaqchasqam; chay pachakunawanmi sumaqta bañakuruspan churakunqa.

⁵ Israelpa mirayninkunapa rantinpiñataqmi huchamanta ofrendapaq iskay chivatokunata Aarón apamunqa, apamunqataqmi lliw kañanapaq huk carnerotapas.

⁶ Chaymantam kikinpa huchanmantawan ayllunpa huchankunamanta malta torota Aarón ofrecewanqa, chaynapi huchankuta pampachanaypaq.

⁷ Chay iskaynin chivatokunatam asuykuwananku carpapa punkunpi ñoqa Tayta Diosman ofrecewanqa.

⁸ Hinaspam Aarón iskaynin chivatokunata sorteanqa, huknintam ñoqa Tayta Diospaq akllanqa, huknintañataqmi Azazelpaq.

⁹ Chaypim Aaronqa ñoqa Tayta Diospaq akllapuwasqan chivatota wañuchipuwanqa, chaytaqa huchamanta ofrendapaqmi ofrecewanqa.

¹⁰ Azazelpaq akllasqan chivatotañataqmi kawsachkaqllata ñoqa Tayta Diospa qayllayman churanqa huchakunata pampachanaypaq, hinaspam Azazelpaq chunniqman kachaykunqa.

¹¹ Aaronmi huk malta torota kikinpa huchanmantawan ayllunpa huchankunamanta ofrecewanqa, huchanku-namanta ofrenda kasqanrayku, chaynapi huchankumanta pampachanaypaq.

¹² Chaymantañataqmi ñoqa Tayta Diospa qayllaypi kaq altarmanta nina sansayuq incienso qontichinata hurqoykunqa, hapiykunqataqmi miski asnaq kutasqa inciensotapas iskay aptayta, hinaspam carpapi velopa qepanman apaykunqa.

¹³ Chay inciensotam ñoqa Tayta Diospa qayllaypi sansaman hinaykunqa. Chaypim inciensopa qosniynin chunkantin kamachikuykuna waqaychana Arcapa tapanta pampaykunqa, chaynapim Aaronqa mana wañunqachu.

¹⁴ Chaymantam malta toropa yawar-ninman dedonta challpuykuspan Arcapa tapanpa intipa qespimunan lawninman challanqa, chaynataqmi tapapa ñawpaqninmanpas chay yawarwan qanchis kutikama challanqa.

¹⁵ Chaymantam chivatota wañuchinqa llaqtapa huchankunamanta ofrecewananpaq, yawarnintañataqmi carpapi velopa qepanman apaykunqa, hinaspam tapapa hawanman chaynataq tapapa ñawpaqninman challanqa, imaynam malta toropa yawarninwan ruwasqanta hina.

¹⁶ Chaynatam Diosman asuykuna carpata chuyanchanqa Israelpa mirayninkunapa millakuypaq kayninkumanta, mana kasukusqankumanta hinaspa llapa huchankumanta. Hina chaynallatam santuariotapas chuyanchanqa, millakuypaq chawpinkupi kasqanrayku.

¹⁷ Huchakuna pampachasqa kananpaq Diosman asuykuna carpaman Aarón yaykuptinqa, chay asuykuwananku carpapiqa amam pipas kanqachu, carpamanta Aarón lloqsimunankama. Kikinpa huchanta, ayllunkunapa huchankunata hinaspa Israelpa mirayninkunapa huchanta pampacharuptiyñam,

¹⁸ Aaronqa ñoqa Tayta Diospa qayllaypi altarta chuyanchananpaq lloqsinqa. Chaypaqmi malta toropa chaynataq chivatopa yawarninta apanqa, hinaspam altarpa llapallan waqrachankunata llusinqa.

¹⁹ Chay yawarwantaqmi altarta qanchis kutikama dedonwan challanqa, chaynatam Israelpa mirayninkunapa millakuypaq ruwasqankumanta chuyanchanqa.

²⁰ “Chuyay-chuyay” lugarta, asuykuwananku carpata hinaspa altarta Aarón chuyanchayta tukuruspanmi kawsachkaq chivatota pusachimunqa.

²¹ Hinaspanmi Aaronqa chivatopa umanman makinkunata churaykuspan Israelpa mirayninkunapa mana allinkuna ruwasqankuta, mana kasukuyninkuta chaynataq huchankutapas ñoqaman willawanqa, hinaspam chay chivatota chunniqman pusachinqa chaypaq akllasqa runawan.

²² Huchanku apachkaq hinam chay chivato paykunapa llapallan mana allin ruwasqankuta chunniqman apanqa.

²³ Chaymantam asuykuwananku carpaman Aarón yaykunqa, hinaspam “Chuyay-chuyay” lugarman yaykunanpaq churakusqan linomanta pachanta chustukuspan chay carpapi saqeykunqa.

²⁴ Hinaspam carpapi bañakuspan pachakunqa, chaymantañam asuykamuwanqa. Lloqsimuspanñataqmi kikinmantawan llaqtanmanta lliw kañana animalta ofrecemuwanqa chaynataq hucharayku ofrendatapas. Chaynapim huchankuta pampachasaq.

²⁵ Hinaspam altarpi hucharayku ofrenda wiratapas kañanqa.

²⁶ Azazelman chivato pusaqpas pachanta taqsakuspanmi bañakunqa, hinaspañam campamentoman yaykunqa.

²⁷ Huchamanta wañuchisqa malta torotapas chaynataq chivatotapas campamentomanta hawamanmi hurqonqaku, hinaspam qaranta, aychanta chaynataq akantapas kañanqaku. Chay animalkunapa yawarninqa santuarioman apas-qam kanqa huchakuna pampachasqa kananpaq.

²⁸ Chay kañaq runapas pachantam taqsakunqa chaynataqmi cuerpontapas bañakunqa hinaspañam campamentomanqa yaykunqa.

²⁹ Kaymi qamkunapaq wiña-wiñaypaq decretoy kanqa: Qanchis kaq killapa chunka punchawninpim ayunankichik hinaspam ama llamkankichikchu, amataqmi llaqtamasikichikpas llamkanqachu nitaq qamkunawan kaq huklaw llaqtayuqpas.

³⁰ Chay punchawpim ñoqa Tayta Dios tukuy huchaykichikta pampachasaq, chaynapim chuyanchasqaña kankichik.

³¹ Chay punchawqa samana punchawmi qamkunapaq kanqa. Chay punchawpim ayunankichik, wiña-wiñaypaq decretoymi kayqa.

³² Taytanpa rantinpi sacerdote kananpaq aceitewan tallispa sapaqchasqa runaqa, huchakunata pampachana ofrendatam ofrecewanqa, chaynataqa ruwanqa ñoqapaq sapaqchasqay linomanta pachawan pachakuspam.

³³ Chuyanchanqataqmi ñoqaman asuykuwananku carpata, “Chuyay-chuyay” lugarta chaynataq altartapas. Sacerdotekunapa huchankunata chaynataq llaqtapa huchankunata pampachanaypaqmi hucharayku ofrendata ofrecewanqa.

³⁴ Kaymi qamkunapaq wiña-wiñaypaq kamachikuy kanqa. Watapim huk kutita kayta ruwankichik Israelpa mirayninkunapa huchanta pampachanaypaq, nispa. Chaymi Tayta Diospa imaynam kamachisqanman hina Moisés ruwarqa.