Levítico 13 - CHUYA QELLQA La Biblia en Quechua de Ayacucho 2012

Lepra onqoymanta

¹ Moisestawan Aarontam Tayta Dios kaynata nirqa:

² Sichum hukkaqnin runapa aychanpi punkiy, siksipakuy, yuraq mancha, otaq lepraman rikchakuq ima isupas rikuriruptinqa, sacerdote Aaronmanmi otaq hukkaqnin churin sacerdotemanmi apanqaku.

³ Chay sacerdotem runapa aychanpi isuta qawanqa. Sichum chay isupi kaq chukcha yuraqman tikrakurunqa chaynataq isupas ukuniqman yaykuruptinqa, chayqa lepra onqoymi. Chayta sacerdote sumaqta qawaykuspanmi chay runata millakuypaqña kasqanta ninqa.

⁴ Sichum chay runapa aychanpi yuraq mancha mana ukuniqman yaykuruptinqa chaynataq chukchapas yuraqman mana tikrakuruptinqa, sacerdotem chay runata qanchis punchawpaq wichqarunqa.

⁵ Qanchis punchawmantam huktawan sacerdote chay runapa aychanta qawanqa, sichum chay aychanpi isu hinalla kaspa mana miraruptinqa, sacerdotem yapatawan chay runata qanchis punchawtawanraq wichqarunqa.

⁶ Qanchis punchawmantam huktawan qawanqa, sichum chay aychanpi isu chinkaypi rinqa hinaspa manaña wiñaptinqa, sacerdotem chay runata chuya kasqantaña ninqa; chay onqoyninqa siksipakuyllam. Chaynapim chay runaqa pachanta taqsakuspan chuyaña kanqa.

⁷ Sichum chay runa qawarachikuspan sanopaqña chaskisqa kachkaptin, aychanpi pusllucha mirayta qallaykuptinqa sacerdotemanmi qawachikunanpaq kutinqa.

⁸ Chaymi sacerdoteñataq chay runapa aychanpi isu mirarusqanta qawaykuspan chay runata millakuypaqña kasqanta ninqa. Payqa leprawanmi onqochkan.

⁹ Sichum huk runapa aychanpi lepra onqoy rikuriruptinqa, chay runatam sacerdoteman pusamunqaku.

¹⁰ Hinap-tinmi chay runapa onqoyninta sacerdote qawanqa, sichum chay aychanpi punkiy yuraq kaptinqa hinaspa chaypi chukchapas yuraqman tikrakuruptinqa chaynataq llullu aychapas sutilla rikuriptinqa,

¹¹ chay runapa onqoyninqa mana sanoyaq lepra onqoymi. Chay runataqa amañam wichqanqañapaschu, ñam yachakunña lepra onqoy kasqanta.

¹² Sichum runapa aychanpi chaki puntanmanta uma puntankama lepra apurawman miraruptinqa,

¹³ sacerdotem qawanqa. Chay runapa aychan yuraqman tikrakuruptinqa sacerdotem ninqa allinyarusqantaña. Chay onqoyqa yuraqmanmi tikrakurun, chayraykum chay runaqa allinyarunña.

¹⁴ Sichum chay runapa isunpi llullu aycha rikuriruptinqa millakuypaqñam rikurirun.

¹⁵ Sacerdotem chay llullu aychata qawaspan chay runata millakuypaqña kasqanta ninqa; chayqa lepra onqoymi.

¹⁶ Sichum chay llullu aycha yuraqman tikrakuruptinqa chay runam sacerdoteman hamunqa

¹⁷ qawachikunanpaq, sichum chay isu yuraqman tikrakurunqa hinaptinqa sacerdotem chay runata chuya kasqantaña ninqa; payqa manam lepra onqoywanñachu kachkan.

¹⁸ Hukkaqnin runapa aychanpi isu rikuriruspan sanoyarunqa,

¹⁹ hinaspa punkiramunqa otaq pukayasqa yuraq mancha rikuriramunqa, hinaptinqa sacerdotewanmi qawachikunqa.

²⁰ Sichum sacerdote qawaspan chay isupa kasqan ukuniqña kaptinqa chaynataq chaypi chukchapas yuraqman tikrakuruptinqa chay onqoqtam millakuypaqña kasqanta ninqa. Chay isupi rikuriqqa lepra onqoymi.

²¹ Chay isupa kasqanpi chukcha mana yuraqyaptinqa hinaspa isupas ukuniqman mana yaykuptinqa chaynapi sanoyaytaña qallaykuptinqa chay runatam sacerdote qanchis punchawpaq wichqarunqa.

²² Sichum chay runapa aychanpi isu miraruptinqa sacerdotem chay runata millakuypaqña kasqanta ninqa. Chayqa lepra onqoymi.

²³ Chay yuraq mancha mana miraptinmi ichaqa chay isu chakichkanña, hinaptinqa sacerdotem chay runata chuya kasqantaña ninqa.

²⁴ Huk runa ninawan pusllurachikuptin chay pusllusqa aychanpi pukayasqa otaq yuraq mancha rikuriruptinqa

²⁵ sa-cerdotem qawanqa. Sichum chay manchapi chukcha yuraqman tikrakuruptinqa hinaspa chay manchapas ukuniqman yaykuruptinqa, lepra onqoymi chay pusllusqapi rikurirun. Chaynaqa, sacerdotem chay runata millakuypaqña kasqanta ninqa; chayqa lepra onqoymi.

²⁶ Sichum chay manchata qawaspan sacerdote mana ima yuraq chukchatapas tarinqachu chaynataq isupas mana ukuniqman yaykuspa aswan menosyaptinqa, chay runatam qanchis punchawpaq sacerdote wichqarunqa.

²⁷ Qanchis punchawpiñataqmi sacerdote huktawan chay runata qawanqa. Sichum chay mancha miraruptinqa chay runatam millakuypaqña kasqanta ninqa; chay isupiqa lepra onqoymi rikurirun.

²⁸ Chay mancha mana wiñaspan taksayaptinqa kañakurusqanpa punkiyllanmi. Chaynaqa, sacerdotem chay runata chuyaña kasqanta ninqa. Chayqa kañakurusqanpa chakisqallanmi.

²⁹ Qaripa otaq warmipa umanpi isu rikuriruptinqa otaq kakichunpipas isu rikuriruptinqa

³⁰ sacerdotem qawanqa. Sichum chay isu ukuniqman yaykuruptinqa hinaspa chaypi tarikuq chukchapas qelluyaspa asllayaptinqa, sacerdotem chay runata millakuypaqña kasqanta ninqa. Chay runataqa caracham hapirun, chayqa umanpi otaq kakichunpi rikuriruq lepra onqoymi.

³¹ Sichum sacerdote qawanqa chay carachata hinaspa mana tarinqachu ukuniqman yaykurusqanta manataq ima yana chukchatapas tarinqachu, hinaptinqa carachawan onqoqtam qanchis punchawpaq wichqarunqa.

³² Qanchis kaq punchawpiñataqmi sacerdote qawanqa chay carachata, sichum chay caracha mana mirarispa ukuniqman mana yaykuruptinqa chaynataq chukchapas mana qelluyaptinqa,

³³ chay runatam sacerdote kamachinqa chukchanta kachiy-kachiyta rutuchikunanpaq, carachapa kasqantam ichaqa ama rutuchikunqachu; sacerdotem chay runata huk qanchis punchawtawanraq wichqanqa.

³⁴ Qanchis kaq punchawpiñataqmi huktawan sacerdote chay carachata qawanqa, sichum chay caracha mana wiñaruptinqa hinaspa ukuniqman mana yaykuruptinqa sacerdotem chay runata chuyaña kasqanta ninqa. Chay runañataqmi pachanta taqsakuspan chuyaña kanqa.

³⁵ Sichum sanopaqña hapisqa kachkaptin chay caracha miraruptinmi ichaqa,

³⁶ sacerdote huktawan qawanqa. Sichum chay caracha miraruptinqa amañam maskanqachu qellu chukchatapas. Chay runaqa millakuypaqñam rikurirun.

³⁷ Sacerdotepaq chay caracha allinyaruqpaq hinaña rikchakapuptinqa hinaspa yana chukchapas chaypi wiñaruptinqa, chay runaqa chuyañam. Hinaptinqa sacerdotem chay runata chuya kasqantaña ninqa.

³⁸ Qaripapas otaq warmipapas aycha qaranpi yuraq manchakuna rikuriruptinqa

³⁹ sacerdotem qawanqa, sichum tarirunqa oqeyariq manchakunata hinaptinqa chayqa suchillam. Chay runaqa chuyam kachkan.

⁴⁰ Sichum huk qaripa chukchankuna wichiruptinqa payqa paqlayarunmi. Payqa chuyam.

⁴¹ Urkun lawmanta chukchan wichiruptinqa paqla urkullam kachkan. Payqa chuyam.

⁴² Sichum umanpa qepa lawnin paqlayasqanpi otaq urkun paqlayasqanpi pukayasqa yuraq isu rikuriruptinqa lepra onqoymi rikurichkan.

⁴³ Chaytaqa sacerdotem qawanqa. Sichum chay paqlanpi punkisqa isu pukayasqa yuraq kaptinqa,

⁴⁴ chay runaqa leprawanmi onqochkan, chay runaqa millakuypaqmi kachkan. Sacerdotem chay runata millakuypaqña kasqanta ninqa.

⁴⁵ Lepra onqoyniyuq runaqa llikipasqa pachayuq hinaspa qala umallam purinqa. Payqa uyanta tapakuykuspanmi qaparinqa: “¡Millakuypaqmi kani! ¡Millakuypaqmi kani!” nispa.

⁴⁶ Leprayuq runaqa isun chinkanankamam millakuypaq kanqa; campamentomanta karupim sapallan yachanqa.

Qoqarasqamanta yachachikuykuna

⁴⁷ Sichum millwamanta otaq linomanta pachapi qoqarasqa mancha rikuriruptinqa,

⁴⁸ chaynataq linomanta otaq millwamanta awasqapi qoqarasqa mancha rikuriruptinqa chaynataq qarapi otaq qaramanta ruwasqapi

⁴⁹ verdeyasqa otaq pukayasqa qoqaraykuna rikuriruptinqa, chayqa lepra onqoymi. Chaykunataqa sacerdotemanmi qawachinqaku.

⁵⁰ Sacerdote qawaykuspanmi, chay qoqarasqakunata qanchis punchawpaq wichqanqa.

⁵¹ Qanchis kaq punchawpim chay qoqarasqakunata sacerdote qawanqa; sichum pachapi, awasqapi, qarapi, otaq qaramanta imapas ruwasqapi qoqaraykuna miraruptinqa, chay qoqarayqa lepra onqoymi. Chaykunaqa millakuypaqmi kanqa.

⁵² Imapas chayna qoqarasqa kaqqa kañasqam kanqa; chay qoqarayqa lepra onqoymi.

⁵³ Sichum sacerdote imapipas chay qoqarayta mana mirasqanta tarispaqa,

⁵⁴ kamachikunqam chay qoqarayuq kaqkunata taqsanankupaq, hinaspam qanchis punchawtawanraq wichqarunqa.

⁵⁵ Chay qoqarayuq kaqta taqsaruptinkum sacerdote qawanqa. Sichum chay qoqaray mana miraruspa hinalla kaptinqa, chaykunaqa millakuypaq kasqanraykum kañasqa kanqa; chayqa hawanpi kaspa otaq ukunpi kaspapas uchkuq qoqaraymi.

⁵⁶ Sichum chay qoqarasqata taqsaruptinku yanayaspa taksayasqanta sacerdote qawaspanqa, pachamanta, qaramanta, awasqamanta kaptinpas, chay qoqarasqa lawtam kuchurunqa.

⁵⁷ Sichum pachapi, awasqapi, otaq imapas qaramanta ruwasqa kaqpi qoqaray huktawan rikuriruspa miraptinqa, chaytaqa kañanqakupunim.

⁵⁸ Ichaqa pachata, awasqata, otaq imapas qaramanta ruwasqa kaqta taqsaruptinku qoqaray chinkaruptinqa yapamantam taqsanqaku, hinaptinmi chuyaña kanqa.

⁵⁹ Kaykunam qoqaray lepra onqoymanta yachachikuykuna, millwamanta pachapi kaptin, linomanta pachapi kaptin, awasqapi kaptin, otaq ima qarapi kaptinpas. Chaynapi chuya kasqanta otaq millakuypaq kasqantapas yachanaykichikpaq, nispa.