Lamentaciones 5 - CHUYA QELLQA La Biblia en Quechua de Ayacucho 2012

Diospa llakipayakuyninta mañakusqankumanta

¹ Dios Taytallayku, sasachakuypi kasqaykuta yuyariy, penqakuypaq kasqaykuta qawariy.

² Tukuy imayku kaqpas huklaw llaqtayuqkunapa makinpiñam, wasiykupas mana reqsisqayku runakunapañam.

³ Mana taytayuqñam rikuriruniku, mamaykupas warmisapañam rikurirun.

⁴ Tomanayku yakutapas rantinikuñam, yantatapas preciowanñam rantiniku.

⁵ Qatikachawaqniykum hichpallaykupiña kachkanku, pisiparuspaykupas manañam samariyta tarinikuñachu.

⁶ Saksanaykukama mikunaykupaqmi, Egipto nacionman Asiria nacionman makillaykuta haywariniku.

⁷ Tayta-mamaykum huchallikuruspa wañurunku, paykunapa huchanmantam ñoqayku ñakarichkaniku.

⁸ Criadokunapa munaychakusqanñam kachkaniku, manam pipas paykunamanta libraqniyku kanchu.

⁹ Chunniqpi wañuchiqkunamanta lluptistinmi, vidaykuta wañuypa patanman churaykuspa mikunaykutapas apamuniku.

¹⁰ Cuerpollaykupas yarqaymantam horno hinaraq calenturawan ruparichkan.

¹¹ Sión llaqtapi warmikunatam abusarqaku, Judá nacionpi sipaskunatam abusarqaku.

¹² Kamachikuqkunatam makinkumanta warkurqaku, yuyaqkunatapas manam respetarqakuchu.

¹³ Jovenkunatam molinopi kutanankupaq aparurqaku, warmakunapas llasaq yantakuna qepisqankupim eqoyarqaku.

¹⁴ Ancianokunapas llaqtapa punkunpiqa manañam kanñachu, jovenkunapas manañam takinkuñachu.

¹⁵ Sonqoykupi kusikuyniykum chinkarun, tusuyniykupas llakikuymanñam tikrakurun.

¹⁶ Umaykupi coronaykupas wichirunmi, ¡imallapiraq rikukuniku, huchallikurunikum!

¹⁷ Chayraykum sonqoykupas onqochkan, chayraykum ñawiykupas tutayarun.

¹⁸ Sión llaqtam purmarun, purun animalkunallañam chaypiqa muyurichkanku.

¹⁹ Dios Taytalláy, qanmi ichaqa wiñaypaq munaychakunki, munaychakuynikiqa wiña-wiñaypaqmi takyanqa.

²⁰ ¿Imanasqataq pasaypaqta qonqaruwankiku? ¿Imanasqataq unay tiempo saqeruwankiku?

²¹ Dios Taytalláy, qanman kutirikunaykupaq kutirichiwayku, ñawpaq tiempopi hina musoqyachiwayku.

²² ¿Pasaypaqtachu qepanchakuruwankiku? ¿Pasaypaqtachu contraykupi piñakurunki?