Lamentaciones 4 - CHUYA QELLQA La Biblia en Quechua de Ayacucho 2012

Jerusalén llaqta vencesqa kasqanmanta

¹ ¡Imaynamá qoriqa yanayarunqa! ¡Akllasqa qoripa kanchariyninpas imaynamá chinkarunqa! ¡Templopa suma-sumaq ruminkunapas callekunapa esquinankunapim wischusqa kachkan!

² Sión llaqtapi ancha kuyasqa runakunam qorimantapas aswan allinpaq hapisqa runakunam, allpa manka hinaña rikurirunku, runapa ruwasqan allpa manka hinañam rikurirunku.

³ Atoqkunapas uñachankunataqa ñuñunmi, llaqtaymi ichaqa chunniqpi aveztrus hina wawankunata saqeruspan mana llakipayakuq rikurirun.

⁴ Ñuñuq wawakunapa qallunmi siminkuman yakumanta laqakurun; warmakuna tantata mañakuptinpas manam pipas qoykuqnin kanchu.

⁵ Allinllanta mikukuq runakunam callekunapi wañunayachkanku; allin pachakunallawan pachakuqkunam wanu wischunapiña chutarayachkanku.

⁶ Llaqtamasiykunapa huchanqa Sodomapa huchanmantapas aswan llumpaymi; Sodomaqa mana pipa imanasqallanmi, qonqaymanta puchukachisqa karqa.

⁷ Akllasqa runankunapas ritimantapas aswan yuraqraqmi karqaku, lechemantapas aswan yuraqraqmi karqaku; coral alhaja rumimantapas aswan pukaraqmi karqaku, cuerponkupas zafiro rumimantapas kuyayllapaqmi karqa.

⁸ Kunanqa tutayaymantapas aswan yanaraqmi rikurirunku, callekunapipas manaña reqsinam rikurirunku, kaspi hina tullunwan qarallanñam rikurirunku.

⁹ Yarqaymanta wañuqkunamantaqa guerrapi wañuqkunaraqmi aswan allinqa, kaykunaqa mikunankupaq kawsay manaña kaptinmi allimanta wañurqaku.

¹⁰ Jerusalén llaqta tuñichisqa kasqan punchawpim, allin sonqoyuq warmikunapas, wawankuta yanuruspa mikurqaku.

¹¹ Tayta Diosmi piñakuyninta kachaykamurqa, sinchi piñakuynintam chaqchurimurqa, Sión llaqtatam ninawan kañaykurqa, cimientonkamaraqmi llaqtata chinkarachirqa.

¹² Nacionkunapi reykunapas manam creerqakuchu kay pachapi yachaqkunapas manam piensarqakuchu, Jerusalenpa punkunta enemigonkuna yaykunantaqa.

¹³ Chaykunaqa pasakurqa profetakunapa huchanmantam, sacerdotekunapa mana allinkuna ruwasqanmantam, inocente runakunata llaqta ukupi wañuchisqankumantam.

¹⁴ Paykunaqa llaqtapa callenkunapim ñawsa hina tamsaykacharqaku; yawarkamallaña pachayuqmi purirqaku, manam pipas pachankutaqa llapchaykuyta munarqachu.

¹⁵ Paykunatam runakuna nirqaku: “¡Kaymanta anchuychik, qamkunaqa millay runakunam kankichik, ama llapchawaykuchu! ¡Manam ñoqaykuwanqa yachawaqchikchu!” nispanku.

¹⁶ Tayta Diosmi paykunata cheqerachirqa, manañam paykunataqa qawarirqañachu, sacerdotekunapas manaña respetasqam karqaku, yuyaqkunapas manaña llakipayasqam karqaku.

¹⁷ Ñawiykupas utisqam yanapaqniykuta yanqa suyachkaniku, uyan-uyanllam kachkaniku, mana salvay atiq naciontam suyachkaniku.

¹⁸ Purisqaykupas wateqasqallam kachkan, manam callekunamanpas lloqsiyta atinikuchu. Puchukanayku punchawmi hichpamuchkanña, wañunayku punchawmi chayamuchkanña.

¹⁹ Qatikachawaqniykuqa ankamantapas utqayman kallpaqkunam karqaku, orqokunapim paykunaqa qatikachawarqaku, chunniqkunapim wichinaykupaq trampata churarqaku.

²⁰ Tayta Diospa sapaqchasqan reytam presota aparqaku, payqa kawsachiqniykum karqa, paymantam nirqaniku: “Llaqtakunapa chawpinpipas paypa nanachikusqanmi kawsakusaqku”, nispa.

²¹ Edom nacionpi kaqkuna, asikuychik; Uz lawpi yachaqkuna, kusikuychik. Qanmanpas tomanayki copam chayamunqa, sinkaruspa qalalla kanaykikamam chayamunqa.

²² Sión llaqta, castigasqa kaynikiqa tukurunñam, Tayta Diosqa manañam presota apachisunkiñachu. Edom nacionpi kaqkuna, Tayta Diosmi huchaykichikmanta castigasunkichik, huchaykichiktam lliwman qawachinqa.