Lamentaciones 2 - CHUYA QELLQA La Biblia en Quechua de Ayacucho 2012

Jerusalenta Tayta Dios castigasqanmanta

¹ ¡Tayta Diosmi, llumpay piñakuyninwan Sión llaqtata tutayarachin! Cielomanta pampaman chamqamuchkaq hinam, Israelpa kuyayllapaq kayninta tuñirachin. Piñakuyninpim chakinpa sarunan llaqtatapas mana yuyarirqachu.

² Señorqa mana llakipayarispam Jacobpa wasinkunata tuñirachin, piñakuywanmi Judá nacionpa sumaq perqankunata tuñirachin, kamachikuqkunapa munaychakuynintam penqayman churarun.

³ Sinchita piñakuspanmi Israelpa tukuy atiyninta chinkarachin, enemigopa qayllanpim yanapakuyninta karuncharachin, Jacob castakunapa llaqtankunapim lenwachkaq ninata ratarachin, muyuriqninpi tukuy tarisqanta ruparunanpaqmi ratarachin.

⁴ Señorqa enemigo hinam flechana armanta allinta hapiykurqa, enemigo hinam alleq makinta hoqarirqa, tukuy kuyayllapaq kaqkunatam chinkarachirqa, Sión llaqtamanmi piñakuyninta ninata hina kachaykamurqa.

⁵ Señorqa enemigo hinam ruwarun: Israeltam palacionkunatawan lliwta tuñirachirqa, muyuriqninpi murallankunatam purmarachirqa. Kuyayllapaq Judá naciontam ñakarichispan waqachirqa.

⁶ Chukllata hinaraqmi templontapas tuñirachin, huñunakunanku templotam purmarachin, Tayta Diosmi Sionpi fiestakunata qollurachin, samana punchawkunatam qonqarachin. Sinchi piñakuyninpim reytawan sacerdotetapas wischururqa.

⁷ Señorqa altarnintapas qepanchakururqam, santuariontapas wischupakururqam, llaqtapa perqantapas enemigonkunamanmi qoykurqa, enemigonkunam fiesta punchawpi hinaraq Tayta Diospa templonpi chaqwakunku.

⁸ Tayta Diosmi tantearurqa, Sionpa perqankuna tuñichiyta, chay tanteasqantam mana samaykuspa ruwarun, llaqtapa uku lawninpi perqankunatam tuñirachin, llaqtapa hawa lawninpi perqankunatam purmarachin.

⁹ Punkunkunapas lliwmi tuñirun, punku cerrojonkunatapas pasaypaqtam pakiparun. Reyninpas kamachiqninkunapas Diosta mana reqsiq runakunapa chawpinpiñam kachkanku, profetankunapas manañam Diosmanta visionkunata chaskinkuñachu.

¹⁰ Kuyayllapaq Sionpa ancianonkunapas pampapim upallalla tiyachkanku, umankuman uchpata machqekuykuspam luto pachawan churakurunku. Jerusalenpa sipas wawankunam pampamam kumuykunku.

¹¹ Ñawillaypi weqellaykunapas tukurunñam, llaqtaypa tuñisqanta qawaspaymi ancha hukmayasqa kachkani, ñuñuq wawakuna yarqaymanta plazakunapi wañuqta qawaspaymi hukmanyasqallaña kachkani.

¹² Mamankutam wawakuna ninku: ¿Maytaq tantawan vino? nispanku. Chaynata nispankum callekunapi wañunayanku, mamankupa oqllayninpim wañururqaku.

¹³ Jerusalén llaqta, ¿pitaq qampa rantikipi rimarinman? ¿Pimantaq rikchanachikiman sonqoykita tiyachinaypaq? Sión llaqta lamar qocha hina hatunmi llakikuynikiqa, ¿pitaq hampiykusunkiman?

¹⁴ Profetaykikunapas pantaykunallatam willasurqanki manam huchaykikunataqa qawachisurqankichu, mana chayqa manam preso riwaqchu karqa, aswanqa llullakunatawan mana pasaqkunallatam willasurqanki chaykunawanmi pantachisurqanki.

¹⁵ Haykam ñanninta puriqkunam makinta taqllakuspa asikusunki, umankutapas aywirisparaqmi qanmanta kaynata ninku: ¿Kay llaqtatachu “suma-sumaq Jerusalén” llaqta nirqaku? ¿Kay llaqtamantachu llapallan nacionkunapa kusikunan llaqta nirqaku? nispanku.

¹⁶ Enemigoykikunam contraykipi rimanku, burlakususpaykim kirunkuta kirichichisparaq ninku: Paytaqa ¡millpurusunchikmi! ¡Cheqaptapunim suyasqanchik punchaw chayaramun! ¡Kayqaya rikurunchikraq! nispanku.

¹⁷ Tayta Diosqa tanteasqantam ruwarun, payqa nisqantam cumplirun, ñawpaqmantaraq tuñichiy munasqantam mana llakipayarispan tuñirachin, enemigoykikuna asipayasunaykipaqmi chayta ruwarun, cheqnisuqnikipa atiynintam hatuncharun.

¹⁸ Kuyayllapaq Sión llaqta, Señorta tukuy sonqoykiwan qayakuy. Tuta punchaw waqasqaykipi weqekipas mayu hina kallpachun, mana samaykuspa waqay, ñawikipas ama samaykuspa waqachun.

¹⁹ Tuta hatarispa qapariy yakuta tallichkaq hina sonqoykimanta Señorman willakuy, makikita hoqarispayki wawaykikunapaq mañakuy, paykunam callekunapi yarqaymanta wañunayachkanku.

²⁰ Dios Taytalláy qawarispa yuyaymanariy, ¡manam pitapas kaynaniraqtaqa ruwarqankichu! ¿Yaqachu warmikuna wachakusqan wawata mikurunmanku? ¿Hinachu sacerdotekunawan profetakunapas temploykipi wañuchisqa kanqaku?

²¹ Warmakunawan yuyaqkunam callekunapi wischurayachkanku, jovenkunawan sipaskunam espadapi wañurunku, piñakusqayki punchawpim wañurachinki, mana llakipayarispam wañurachinki.

²² Fiestaman hinam mancharichiqniykuta tukuy hinastinmanta huñuramunki. Dios Taytalláy, piñakusqayki punchawpiqa manam pipas kawsachkaqqa ayqerqachu, Allinta uywaspa qespichisqaytapas enemigoymi hamuruspan wañurachin.