Jueces 8 - CHUYA QELLQA La Biblia en Quechua de Ayacucho 2012

Madianitakunapa reyninkunata Gedeón presochasqanmanta

¹ Gedeontam Efraín castakuna nirqaku: ¿Imanasqataq kayta ruwawankiku? ¿Imanasqataq madianitakunawan peleaq richkaspaqa mana qayaykamuwarqankikuchu? nispanku. Paywan llumpayta churanakuruspankum piñakururqaku.

² Chaymi Gedeón nirqa: Qamkunapa ruwasqaykichikmantaqa ñoqaqa asllatam ruwaruni, qamkunapa ruwasqaykichikqa aslla kaspapas ñoqaykupa ruwasqaykumantaqa aswan masraqmi.

³ Diosmi Madián tropakunapa kamachiqninku Orebtawan Zeebta qoykusurqankichik, chaynaqa ñoqapa ruwasqayqa manam imallanpas kanchu qamkunapa ruwasqaykichikmantaqa, nispa. Chaynata niruptinmi Gedeonpa contranpi piñakuyninku tanirurqa.

⁴ Gedeonmi kimsa pachak runankunapiwan Jordán mayuta chimparurqaku. Pisipasqa kachkaspankupas enemigonkutam qatirqaku.

⁵ Sucot llaqtaman chayaruptinkum, chaypi runakunata Gedeón nirqa: Ama hina kaspaykichik, kay riqmasiy runakunaman ima mikuyllaykichiktapas qoykapuwaychik, paykunaqa pisipasqam kachkanku. Madianitakunapa reynin Zebatawan Zalmunatam qatichkaniku, nispa.

⁶ Hinaptinmi Sucot llaqtapi kamachikuqkuna nirqaku: ¿Zebatawan Zalmunataqa hapirunkiñachu tropaykikunaman mikuchinaykupaqqa? nispanku.

⁷ Chaymi Gedeón nirqa: Zebatawan Zalmunata makiyman Tayta Dios churaykamuptinmi, chunniqpi tukuy rikchaq kichkakunawan cuerpoykichikta llikiparusaq, nispa.

⁸ Peniel llaqtaman chayaruspapas hina chaynallatam mañakurqa, hinaptinmi chaypi yachaqkunapas Sucot llaqtayuqkuna hinalla nirqaku.

⁹ Hinaptinmi Gedeón nirqa: Venceramusqaymanta kutimuspayqa wak torrekichiktam tuñirachisaq, nispa.

¹⁰ Zebawan Zalmunaqa, Carcor llaqta-pim kachkarqaku, paykunawanmi yaqa chunka pichqayuq waranqa tropa-kunapas kachkarqaku, chay tropaku-naqa karqa intipa qespimunan lawmanta hamuqkunamanta puchuq tropakunam, paykunamantam espadawan peleaq soldadokuna pachak iskay chunka waranqa wañururqaku.

¹¹ Gedeonmi carpapi yachaqkunapa purinanku ñanman chayarurqa, chay ñanmi karqa Noba llaqtapa chaynataq Jogbeha llaqtapa intipa qespimunan lawninpi; hinaspam chay tropakunapa campamentonta qonqayllamanta atacarurqa.

¹² Chaymi Zebawan Zalmuna lluptirurqaku, hinaptinmi Gedeón qatispan madianitakunapa iskaynin reyninkunata presocharurqa, tropankunatapas sinchillatañam mancharirachirqa.

¹³ Chaymantam Joaspa churin Gedeón, guerramanta Heres qasanta kutimurqa.

¹⁴ Sucot llaqtapi yachaq joventa hapiruspan tapuptinmi, Sucot llaqtapa qanchis chunka qanchisniyuq kamachikuqkunapa sutinta qellqaykuspan qoykurqa.

¹⁵ Sucot llaqtaman chayaruspanmi, chaypi yachaq runakunata Gedeón nirqa: ¿Yuyachkankichikchu Zebamantawan Zalmunamanta? Paykunaraykum penqayman churawaspa niwarqankichik: “¿Hapirunkiñachu Zebatawan Zalmunata, pisipasqa tropaykikunaman mikuchinaykupaq?” nisqaykichikta. ¡Kayqayá chay reykuna! nispa.

¹⁶ Chaykunata niruspanmi Gedeonqa, Sucot llaqtapi ancianokunata hapiruspan, chunniqpi tukuy rikchaq kichkakunawan waqtaparurqa.

¹⁷ Chaynallataqmi Peniel llaqtapa torrentapas tuñirachirqa, hinaspam runakunatapas wañurachirqa.

¹⁸ Chaymantam Zebatawan Zalmunata Gedeón tapurqa: Tabor moqopi wañuchisqaykichik runakunaqa ¿imayna runakunataq karqaku? nispa. Hinaptinmi paykunañataq nirqaku: Paykunaqa qam kaqllam karqaku, sapakamam reypa churinman rikchakurqaku, nispanku.

¹⁹ Chaymi Gedeón nirqa: Paykunaqa mamaypa wawankuna kaspam wawqeykuna karqaku. Tayta Diosraykum jurani: Paykunata mana wañuchiptikichikqa, ñoqapas manam wañuchikichikmanchu karqa, nispa.

²⁰ Hinaspanmi piwi churin Jeterta Gedeón nirqa: Hatarispa kay runakunata wañuchiy, nispa. Jetermi ichaqa, warmaraq kasqanrayku manchakuspan, espadanta mana hurqorqachu.

²¹ Chaymi Zebawan Zalmunañataq Gedeonta nirqaku: Qari kaspaykiqa qamyá wañuchiwayku, nispanku. Hinaptinmi paykunata kikin Gedeón wañurachispan camellonkunapa kunkanpi llullu killaman rikchakuq adornokunatapas apakurqa.

²² Israelpa miray-ninkunañataqmi Gedeonta nirqaku: Madianitakunamanta librawachkaspaykikuqa qamñayá kamachiwayku, miraynikikunapas kamachiwachunkutaqyá, nispanku.

²³ Chaymi Gedeón nirqa: Manam ñoqapas nitaq mirayniykunapas kamachikikumanchu, Tayta Diosmi qamkunataqa kamachisunkichik.

²⁴ Ichaqa kayllatam mañakuykichik: Sapakamayá qechumusqaykichik aretekunata qoykuwaychik, nispa. Chay vencerachikuq runakunaqa Ismael castakuna kasqankuraykum qori areteyuqkama karqaku, nispa.

²⁵ Hinaptinmi Gedeonta Israelpa mirayninkuna nirqaku: Tukuy sonqoykumantam qosqaykiku, nispanku. Chaymi llikllata mastaykuspanku qechumusqanku aretekunata sapakama churarqaku.

²⁶ Gedeonman qosqanku qorimanta llapallan aretekunapa llasayninmi yaqa chunka isqonniyuq kilo karqa; llullu killaman rikchakuq adornokunatawan, huk rikchaq aretekunata, madianitakunapa reykunapa grosella pachankunata, camellonkunapa kunkanpi collarkunataqa manam yuparqakuchu.

²⁷ Chay adornokunamantam huk Efodta Gedeón ruwachirqa, hinaspam Ofra llaqtanpi churarachirqa; chaymi Israelpa llapallan mirayninkunaqa Tayta Diosta saqeruspanku chay efodtaña yupaycharqaku. Chaywanmi Gedeonpas chaynataq ayllunkunapas huchallikurqaku.

²⁸ Chaynatam madianitakunaqa Israel castakunapa munaychakusqan karqaku, manañam haykapipas umankuta hoqarirqakuñachu. Chaymantam tawa chunka wata guerra mana karqachu, Gedeón kawsanankamaqa hawkallam kawsakurqaku.

Gedeonpa wañukusqanmanta

²⁹ Joaspa churin Jerobaalwan sutichasqanku Gedeonmi wasinman pasakuspan chaypi yacharqa.

³⁰ Payqa achka warmiyuq kasqanraykum qanchis chunka churiyuq karqa.

³¹ Gedeonqa churyarqataqmi Siquem llaqtapi kaq churiwachanpipas, paytam Abimelecwan suticharqa.

³² Joaspa churin Gedeonqa llumpay machuñam wañukurqa, hinaptinmi taytan Joaspa sepulturanpi pamparurqaku, Abiezer castakunapa kasqan Ofra llaqtapi.

³³ Gedeón wañukuptinmi, Israelpa mirayninkunaqa Tayta Diosta saqeruspanku kaqllamanta huchallikuyta qallaykurqaku, hinaspam Baal idolokunapa qepantaña pasakurqaku, paykunaqa diosninkupaqpas Baal-berit sutiyuq idolotañam akllakuykurqaku.

³⁴ Israelpa mirayninkunaqa, muyuriqnin nacionkunapi llapallan enemigonkumanta libraqnin Tayta Diostam qonqarurqaku.

³⁵ Manataqmi reqsikurqakuchu Israel castakunapaq Jerobaalwan sutichasqa Gedeonpa tukuy allinkuna ruwasqantapas.